«قازىرگى ۋاقىتتا وڭىرىمىزدەگى ءۇش اۋىسىمدا جۇمىس ىستەيتىن ءۇش مەكتەپ بار. وسى ءبىلىم وردالارى اقتوبە قالاسىنداعى «ەسەت باتىر» تۇرعىن ءۇي الابى مەن «التىنوردا» شاعىن اۋدانىندا ورنالاسقان. جايلى مەكتەپتەردىڭ قۇرىلىسى تولىق اياقتالسا, وڭىرىمىزدە ءۇش اۋىسىمدى مەكتەپتەر ماسەلەسى تولىعىمەن شەشىلەدى دەگەن ويدامىز», دەيدى وبلىستىق ءبىلىم باسقارماسىنىڭ باسشىسى بۇلبۇل كۇزەمباەۆا.
ءساۋىر ايىندا اقتوبەدەگى «ەسەت باتىر» تۇرعىن ءۇي الابىندا ەسىگىن اشقان №82 مەكتەپتىڭ 1863 وقۋشىسى وقۋ جىلىن اياقتادى. مۇندا ەرەكشە ديزاين ۇلگىسىمەن بەزەندىرىلگەن, زاماناۋي جيھازدارمەن جانە وقۋ-قۇرالدارىمەن تولىق جابدىقتالعان, جايلىلىق پەن ىڭعايلىلىققا نەگىزدەلگەن 52 وقۋ كابينەتى بار. تاراتىپ ايتساق, 28 باستاۋىش, 7 مەكتەپ الدى دايارلىق توبى, 14 اعىلشىن كابينەتى, STEM زەرتحاناسى, روبوتتەحنيكا بولمەسى, حيميا, فيزيكا, بيولوگيا, مۋزىكا, بەينەلەۋ ونەرى, تىگىن جانە العاشقى اسكەري دايىندىق كابينەتتەرى بالالاردىڭ بىلىمگە دەگەن قۇلشىنىسىن ارتتىرادى. وقۋ ورنىندا ەرەكشە ءبىلىم بەرۋ قاجەتتىلىگى بار بالالارعا جاعداي جاسالعان. اسىرەسە ءجۇرىپ-تۇرۋى قيىن وقۋشىلارعا وتە ىڭعايلى پارتالار قويىلدى. ساباقتان تىس ۋاقىتتا قوسىمشا ءبىلىم الۋعا ىڭعايلاستىرىلعان زاماناۋي كىتاپحانا مەن 50 ورىندىق وقۋ زالى, كوۆوركينگ ورتالىعى, 444 وقۋشىنىڭ ءبىر مەزگىلدە تاماقتانۋىنا لايىقتالعان اسحانانىڭ ەسىگى ءاردايىم اشىق. مەكتەپ اۋلاسىندا بەلسەندى ويىندارعا لايىقتالعان الاڭدار دا سالىندى.
«مەكتەبىمىزدە ءارتۇرلى سپورت تۇرلەرىنە لايىقتالعان ءتورت زال بار. ءبىر زال شاحمات, دويبى, توعىزقۇمالاق ويىندارى ءۇشىن جابدىقتالسا, تاعى ءبىر زالدا ۇلتتىق ويىندارعا ارنالعان ارقان, كيىز, اسىقتار قويىلدى. سپورتقا قاجەتتى بارلىق جابدىقتى العاش كورگەنىمدە ءوز كوزىمە سەنبەدىم», دەيدى دەنەشىنىقتىرۋ ءپانىنىڭ مۇعالىمى ساعادات يسماعۇلوۆ.
روبوتحولداعى جابدىقتار – ءىرى ءوندىرىس ورىندارىنداعى قۇرال-جابدىقتاردىڭ كىشىرەيتىلگەن ءتۇرى. ونى باسقارۋدى مەڭگەرگەن وقۋشى بولاشاقتا وندىرىستەگى قوندىرعىلارمەن جۇمىس ىستەي الاتىن داعدى قالىپتاستىرادى.
وقۋ جىلىن اياقتاعان ۇجىم بۇگىندە مەكتەپ جانىنداعى ساۋىقتىرۋ لاگەرىنىڭ اشىلۋىنا قىزۋ دايىندىق ۇستىندە. «جازعى لاگەردى ەكى ماۋسىمعا جوسپارلاپ وتىرمىز. العاشقى كەزەكتەگىلەر 2-13 ماۋسىمدا كەلسە, كەيىنگىسى 16-27 ماۋسىمدا دەمالادى. وقۋ جىلىنىڭ سوڭعى كۇندەرى لاگەرگە 40 وقۋشى جازىلدى. جەكەلەگەن ساناتتاعى وتباسى بالالارى جەرگىلىكتى بيۋدجەت قارجىسىمەن تەگىن دەمالادى. جۇمىستان بوساي المايتىن اتا-انا بالاسى قاراۋسىز قالادى دەپ الاڭداسا, بىزگە اقىلى نەگىزدە بەرە الادى. ونىڭ باعاسى دا قىمبات ەمەس. اتا-انانىڭ تولەگەن قاراجاتى ءۇش مەزگىل تاماققا جۇمسالادى. لاگەر جۇمىسى تاڭەرتەڭگىلىك 9.00-دەن كەشكى 18.00-گە دەيىن سوزىلادى. ماقساتىمىز – بالانىڭ بوس ۋاقىتىن ءتيىمدى وتكىزۋ, ولارعا قاۋىپسىز ورتا قالىپتاستىرۋ, الەۋمەتتەندىرۋ, تاربيە جۇمىسىن كۇشەيتۋ جانە اتا-اناسىنا كومەك كورسەتۋ. پاتريوتتىق, مادەني, سپورتتىق باعىتتا تانىمدىق ەكسكۋرسيالار, سايىستار مەن قىزىقتى ويىندار وتكىزىلەدى. بالالار ۇيىرمە, شەبەرلىك ساباقتارىن وزدەرى تاڭدايدى. ولاردىڭ دەنساۋلىعىن كۇنبە-كۇن قاداعالاپ, اتا-اناسىمەن كەرى بايلانىس جاسايمىز. دەمالىس اياقتالعاندا جەتىستىكتەرى باعالانىپ, ماراپاتتالادى», دەيدى №82 مەكتەپ ديرەكتورىنىڭ وقۋ ءىسى جونىندەگى ورىنباسارى اينۇر بايميشەۆا.
ساباقتان بوس كەزدەگى دەمالىس ۇستاز بەن شاكىرتتىڭ بايلانىسىن كۇشەيتىپ, وقۋىنىڭ قابىلەت-قارىمىن اشۋعا مۇمكىندىك بەرەدى. مەكتەپ ۇجىمى شىلدە ايىنا دەيىن تىنىم تاپپايدى. بۇل كۇندەرى مەكتەپ اينالاسىن اباتتاندىرۋ, گۇل وتىرعىزۋ, كوگالداندىرۋ جۇمىسى قىزىپ جاتىر. وعان مەكتەپتىڭ كىشى تەحنيكالىق قىزمەتكەرلەرىمەن بىرگە مۇعالىمدەر مەن وقۋشىلار دا ۇلەس قوسادى. وقۋ مەن ەڭبەكتى, تاربيەنى قاتار ۇشتاستىرعان «كەلەشەك مەكتەپتەرىندەگى» ىشكى احۋال ۇستازدار مەن ونى باسقاراتىن ديرەكتوردىڭ شەبەرلىگى مەن ۇيىمداستىرۋ قابىلەتىنە بايلانىستى قالىپتاسادى. قانشا جەردەن بەزەندىرسە دە, ۇجىم ىشىندەگى, مۇعالىم مەن وقۋشى اراسىنداعى قارىم-قاتىناس ادامگەرشىلىك پەن ىزگىلىككە نەگىزدەلمەسە, تۇبەگەيلى ناتيجە كۇتۋ قيىن.
اقتوبە وبلىسى
