وبلىستىق تاريحي-ولكەتانۋ مۋزەيىنىڭ ماماندارى ەل ىشىندە ءبىر اۋلەتتىڭ عانا مۇلكى بولىپ وتىرعان وسىنداي مۇرالار كوپ ەكەنىن ايتادى. وسىدان دا مۋزەي باستاماسىمەن 2017 جىلدان بەرى «جاس ولكەتانۋشى» جوباسى قولعا الىندى. مۋزەي جانىنان ولكەتانۋشىلار ۇيىرمەسى جۇمىس ىستەي باستادى. مۋزەيلەر كۇنى اياسىندا عىلىمي جوباعا قاتىسقان مەكتەپ وقۋشىلارىنىڭ جۇمىسى ساراپقا سالىنىپ, تابىلعان جادىگەر كوميسسيا ىرىكتەۋىنەن وتەدى.
«اۋىل-ايماقتاعى قۇندى جادىگەرلەردى جيناقتايتىن جوباعا قاتىسۋشىلار قاتارى جىل ساناپ ارتىپ كەلەدى. بىلتىر جينالعان 500-گە جۋىق جادىگەردىڭ 300-ءىن, بيىل 200-دەن استامىن ىرىكتەپ الدىق. وسى جىلعى تابىسىمىز جالاعاش اۋدانى ت.جۇرگەنوۆ اۋىلىنداعى ءا.وڭالباەۆ اتىنداعى №117 ورتا مەكتەپتىڭ 7-سىنىپ وقۋشىسى ەركەناز قۋانىشبەك اتتى وقۋشىنىڭ عىلىمي جۇمىسىنا وزەك بولعان وسى ساپتاما ەتىك بولىپ وتىر. جان-جاقتى زەرتتەۋ جۇرگىزگەن اۋىل مەكتەبىنىڭ وقۋشىسى سەرالى بالۋان تۋرالى كوپ دەرەك جيناپتى. ەل اۋزىنداعى اڭگىمەلەرگە قاراعاندا سەرالى دۇيسەن ۇلى كورنەكتى مەملەكەت جانە قوعام قايراتكەرى تەمىربەك جۇرگەنوۆتىڭ اكەسى قارا جۇرگەن ۇلىنىڭ بالۋانى بولعان كورىنەدى. قازىر عىلىمي قىزمەتكەرلەر ەتىكتى زەرتتەپ جاتىر, الداعى ۋاقىتتا ەكسپوزيتسيا قاتارىنان ورىن الادى», – دەيدى وبلىستىق تاريحي ولكەتانۋ مۋزەيىنىڭ ءبولىم مەڭگەرۋشىسى ەڭلىك ابىلقاسىموۆا.
بالۋانعا ارنايى تىگىلگەن ساپتاما ەتىكتىڭ قونىشى تىزەنى جاباتىنداي ۇزىن ءارى كەڭ تىگىلىپتى. ىشىندە ماتامەن استارلانعان كيىز بايپاعى بار. تابانى مەن وكشەسى شەگەلەنىپ بەكىتىلگەن. ەتىكتىڭ تابانى – 44, ال بيىكتىگى – 46 سانتيمەتر.
كونەنىڭ كوزىن كورگەن قاريالار ەرتەدە «قارانىڭ بالۋانى» اتانعان سەرالىنىڭ ۇستالىعىن دا ايتىپ وتىرادى ەكەن. ۇرپاقتارى قولىندا ءماسى, ەتىك تىگىپ, ەر شاپقان بالۋان جاساعان اسادال مەن ساندىق تا ساقتالىپتى.
وتكەن عاسىر ورتاسىنا دەيىن ءومىر سۇرگەن سەرالىنىڭ ەتىگى بالاسى ناعاشىبەككە قالىپتى. جاۋىرىنى جەر يىسكەمەگەن بالۋاننىڭ تالاي جەڭىسىنىڭ كۋاگەرى ەندى مۋزەيدەگى قۇندى جادىگەرلەر قاتارىن تولىقتىرادى.
قىزىلوردا
