ريمدە (يتاليا) زورلىق ەكسترەميزمگە قارسى ءىس-قيمىل جونىندەگى حالىقارالىق كونفەرەنتسيانىڭ اعا لاۋازىمدى تۇلعالارىنىڭ ۇيلەستىرۋ كەڭەسى ءوتىپ, وعان 65 مەملەكەت پەن 10 حالىقارالىق ۇيىمنىڭ وكىلدەرى قاتىستى.
ءىس-شارا بارىسىندا اتالعان ماسەلەگە قاتىستى جاھاندىق وڭىرلىك كونفەرەنتسيالاردىڭ قورىتىندىلارى مەن الداعى قىركۇيەكتە نيۋ-يوركتە مەملەكەتتەر باسشىلارىنىڭ قاتىسۋىمەن وتەتىن ءسامميتتىڭ كۇن ءتارتىبى تالقىلاندى. قازاقستاندىق دەلەگاتسيانى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى تيمۋر ورازاەۆ باسقاردى. قازاقستاندىق تاراپ ءىس-شارا قاتىسۋشىلارىن بيىلعى 29-30 ماۋسىمدا استانادا وتكەن ورتالىق جانە وڭتۇستىك ازيا ەلدەرى بويىنشا وڭىرلىك كونفەرەنتسيا تۋرالى حاباردار ەتتى. اتاپ ايتقاندا, وسى تەكتەس قاتەرلەردىڭ وسىمىنە جانە ولاردىڭ لاڭكەستىك ارەكەتتەرگە اۋىسىپ كەتۋىنە ىقپال ەتەتىن جاعدايلارعا جول بەرمەۋگە باعىتتالعان ۇيلەستىرىلگەن ءىس-قيمىلدار ازىرلەۋ جانە ەكسترەميزمگە قارسى ناقتى شارالار تۋرالى اڭگىمە قوزعالدى. دەلەگاتتار ەكسترەميزم مەن لاڭكەستىكتى ءبىر-بىرىنە ۇقساس قۇبىلىستار رەتىندە قاراستىرعان ءجون دەي كەلىپ, قازىرگى زاماننىڭ وسى باستى جاھاندىق قاۋىپ-قاتەرلەرىنە قارسى قيمىلدار ءۇشىن جاۋاپكەرشىلىك ءاربىر مەملەكەتتىڭ موينىندا بولۋى كەرەك دەگەن پىكىر ءبىلدىردى. بۇل قاۋىپ-قاتەرلەرگە قارسى تۇرۋدىڭ بىرلەسكەن قيمىلدارى, سونىڭ ىشىندە لاڭكەستىك ۇيىمداردىڭ جانە ولاردى دەمەۋشىلەردىڭ بىرىڭعاي تىزبەسى جاسالۋى قاجەت ەكەنى اتاپ ءوتىلدى. بۇل ۇدەرىسكە بيىلعى ماۋسىم ايىندا استانادا جاھاندىق كونفەسسياارالىق جانە مادەنيەتارالىق ۇنقاتىسۋدى نىعايتۋ ماقساتىندا وتكەن الەمدىك جانە ءداستۇرلى دىندەر كوشباسشىلارى V سەزىنىڭ قوسقان ۇلەسى ەرەكشە اتالدى. قازاقستاندىق ديپلومات سامميت يدەياسىن قولداپ, وسى سالاداعى ەكسترەميزم مەن لاڭكەستىككە قارسى ىنتىماقتاستىقتى جالعاستىرۋعا ەلىمىزدىڭ دايىن ەكەندىگىن ءبىلدىردى.
«ەگەمەن-اقپارات».
