قوستاناي. 6 مامىر. قوستانايدا گەنەرال-مايور تالاپ قابدەنوۆتىڭ 70 جاسقا تولۋىنا وراي وعان قۇرمەت كورسەتىلدى. بۇل تۋرالى egemen.kz ءتىلشىسى حابارلادى.
قازاقستان رەسپۋبليكاسى ىشكى ىستەر مينيسترلىگىنىڭ ەڭبەك سىڭىرگەن قىزمەتكەرى, حالىقارالىق اقپاراتتاندىرۋ اكادەمياسىنىڭ اكادەميگى, پروفەسسور, قۇقىقتانۋ دوتسەنتى, گەنەرال-مايور تالاپ قابدەنوۆتىڭ ەڭبەك جولىنىڭ ءبىرازى ىشكى ىستەر مينيسترلىگىنىڭ ۆەدومستۆولىق ءبىلىم بەرۋ ءىسىن قالىپتاستىرۋ مەن ونى دامىتۋعا ارنالدى. ول ىشكى ىستەر مينيسترلىگىنىڭ قوستاناي اكادەمياسىنىڭ قۇرىلۋىنا ۇلكەن ەڭبەك سىڭىرگەن بولاتىن. وقۋ ورنى قازىر ەلىمىزدەگى ىرگەلى ءبىلىم ورداسىنا اينالدى. ودان ىشكى ىستەر سالاسىنىڭ تاماشا ماماندارى ءوسىپ شىقتى.
توي يەسىن وبلىس اكىمى نۇرالى سادۋاقاسوۆ قۇتتىقتاپ, يىعىنا شاپان جاپتى.
نۇرالى سادۋاقاسوۆ: « ۇلى جەڭىستىڭ قۇرداسى تالاپ قابدەن ۇلىنىڭ كۇش-جىگەرى, ومىرگە ىنتىزارلىعى, وتانعا قىزمەتى بارلىعىمىزعا ۇلگى بولارلىق. ول قوستانايداعى شاعىن زاڭ كوللەدجىن بۇگىنگىدەي بىرەگەي اكادەمياعا اينالدىرۋعا ەرەن ەڭبەك ەتتى. 1996 جىل اۋىر ۋاقىت ەدى. سول جىلداردىڭ وزىندە مۇمكىندىكتەر تاۋىپ, اكادەميانىڭ ماتەريالدىق بازاسىن نىعايتتى. قازىر بۇل وقۋ ورنى ىشكى ىستەر سالاسىنا بىلىكتى ماماندارىن, جەتەكشى كادرلارىن دايىندايدى. كاپيتان شەنىنەن گەنەرال-مايورعا دەيىن ءوسۋ ومىردە جاۋاپكەرشىلىكتى الدىڭعى ورىنعا قوياتىن تالاپ قابدەن ۇلىنىڭ ادال ەڭبەگىنىڭ ارقاسى بولاتىن. ال مۇنداي ءومىر جاستارعا ۇلگى», دەدى.
گەنەرالعا ارنالعان سالتاناتتى كەشتە ونىڭ زامانداستارى, ۋاقىتىندا قىزمەتتەس بولعان كەنجەبەك ۋكين, توقتارباي قادامباەۆ ءسوز الىپ, توي يەسىنە ىزگى تىلەكتەر ايتتى. مۇنان كەيىن جينالعاندار وبلىستىق فيلارمونيا ونەرپازدارىنىڭ كۇشىمەن قويىلعان كونتسەرتتى تاماشالادى. كونتسەرتتە كومپوزيتور قاليبەك دەرىپسالدين «تالاپ اعا» اتتى جاڭا ءانىن تارتۋ ەتتى.
ءنازيرا جارىمبەتوۆا.
دەرەك, سۋرەت: egemen.kz
