بيىل حاكىم ابايدىڭ تۋعانىنا – 170 جىل. شىعىس ءوڭىرى بۇل مەرەيتويعا جان-جاقتى ازىرلەنۋدە. قازاقتىڭ باس اقىنىنىڭ تويى سەمەي قالاسى مەن اباي اۋدانىندا كەڭىنەن اتالىپ وتەدى. «مەرەكەلىك ءىس-شارا بارىسىنداعى جۇمىستاردىڭ ارقايسىسى قازاقتىڭ جازبا ادەبيەتىندەگى تۇڭعىش كلاسسيگىنىڭ ءومىرى مەن شىعارماشىلىعىن جاڭا قىرىنان تانىتادى دەپ كۇتىلۋدە», – دەيدى وبلىس اكىمىنىڭ ورىنباسارى جاقسىلىق ومار.
تويعا بەلگىلى مەملەكەت جانە قوعام قايراتكەرلەرى, اقىندار مەن جازۋشىلار, عالىمدار, تۇركولوگتار, اۋدارماشىلار كەلەدى. ءىس-شارا 5 تامىزدا سەمەي قالاسىندا ساعات 18.00-دە مۋزىكالىق كەشپەن اشىلادى. وعان اباي اتىنداعى اكادەميالىق وپەرا جانە بالەت تەاترىنىڭ ءانشىسى, مەملەكەتتىك سىيلىقتىڭ لاۋرەاتى شاھيماردان ءابىلوۆ, بەلگىلى ابايتانۋشى عاريفوللا ەسىموۆ قاتىسادى. 6 تامىزدا بابانىڭ ءومىرى مەن شىعارماشىلىعىنىڭ بەيمالىم قىرلارى باياندالاتىن «ابايدىڭ ۇلى جۇمباعى» اتتى دەرەكتى ءفيلمى ۇسىنىلادى. ۇلى ويشىل تۋرالى رۋحاني-اعارتۋشىلىق باعىتتاعى ينتەرنەت-ەنتسيكلوپەديا پرەزيدەنتتىڭ باستاماسى بويىنشا ەلباسىنا بەرىلگەن «جىبەك جولى» الەمدىك سىيلىعىنىڭ قارجىسىنا ءتۇسىرىلدى. اتالعان ءفيلمدى مەملەكەتتىك «دارىن» جانە «سەرپەر» سىيلىقتارىنىڭ لاۋرەاتى اقبەرەن ەلگەزەك «Tengri Films» كينوكومپانياسىمەن بىرگە ءتۇسىردى. تاپسىرىس بەرۋشى – مەملەكەتتىك ءتىلدى دامىتۋ قورى.
قازاقستان قوعامىن ۇلى ويشىل مۇرالارىمەن تانىستىرۋ ارقىلى جاڭعىرتۋ بۇگىنگى زامان اعىمى ءۇشىن وتە وزەكتى. وسى ماقساتتى كوزدەگەن «اباي جانە الەم وركەنيەتى» اتتى حالىقارالىق عىلىمي-تاجىريبەلىك كونفەرەنتسيا ساعات 10.00-دە شاكارىم اتىنداعى سەمەي مەملەكەتتىك ۋنيۆەرسيتەتىندە وتەدى. بۇل جيىنعا الىس جانە جاقىن شەت-ەلدەردەن, قازاقستاننان بەلگىلى ادەبيەتتانۋشىلار, ءتىل ماماندارى, اباي شىعارمالارىن اۋدارۋشىلار, تاريحشىلار, پەداگوگتەر قاتىسادى. ساعات 14.30-دا اباي اتىنداعى تەاتردا «ادامزاتتىڭ ابايى» سالتاناتتى شاراسى ءوتىپ, اقىن تۋىندىلارى بويىنشا تەاترلاندىرىلعان قويىلىم, كونتسەرت ۇسىنىلادى. 7 تامىزدا اقىن مەرەيتويى اباي اۋدانىندا جالپىحالىقتىق مەرەكەلەۋگە ۇلاسادى. مەيماندار «اباي-شاكارىم» مەموريالدى كەشەنى, اقىننىڭ مۋزەي-ءۇيى, «ەڭلىك-كەبەك» مازارىندا بولىپ, اۋدانداعى ەتنواۋىلدى تاماشالايدى. بۇل كۇنى ساعات 10.30-دا قاراۋىل اۋىلىندا ماماي باتىر ەسكەرتكىشىنىڭ اشىلۋى, 10.45-تە «قازاق كۇرەسىنەن» ەل چەمپيوناتى, 11.00-دە «اباي تويى – حالىق تويى» مەرەكەلىك ءىس-شاراسى, 12.00-دە «جورعا» جارىسى وتپەك. ال ساعات 15.00-دە اۋداندىق مادەنيەت ۇيىندە «ادامزاتتىڭ ءبارىن ءسۇي, باۋىرىم دەپ» اتتى اقىندار ايتىسى وتەدى. وعان سارا توقتامىسوۆا, سەرىكزات دۇيسەنعازى, ايبەك قاليەۆ, اينۇر تۇرسىنباەۆا سىندى ەلىمىزدىڭ ءار وڭىرىنەن كەلگەن 12 اقىن قاتىسپاق. سودان كەيىن قاراۋىلتوبەدە الامان بايگە ۇيىمداستىرىلسا, كەشكە جاقىن «اباي تويىنىڭ باس بالۋانى» اتتى كۇرەس وتپەك. وبلىس اكىمى ورىنباسارىنىڭ ايتۋىنشا, بيىل اقىننىڭ مەرەيتويىن جالپىحالىقتىق دەڭگەيدە اتاپ ءوتۋدىڭ اۋقىمى ۇلعايىپ قانا قويماي, ءپىشىنى دە وزگەردى. اسىرەسە, دالا دانىشپانىنىڭ بەيمالىم قىرلارىن اشۋعا جانە ناسيحاتتاۋعا زور كوڭىل ءبولىنىپ وتىر. – اباي – ءبىزدىڭ عانا ماقتانىشىمىز ەمەس. ۇلى ويشىلدى الەمنىڭ كوپتەگەن ەلدەرىنىڭ ادەبيەتشىلەرى, عالىمدارى, ءتىل بىلگىرلەرى ۇزاق جىلدار بويى زەرتتەپ كەلەدى. ەلىمىزدىڭ مادەني جانە تاريحي ورتالىعى سانالاتىن سەمەيگە ءتۇرلى سالا, ءتۇرلى ۇلت, ءتۇرلى ءدىن وكىلدەرى كەلسە دە, ولاردىڭ بارلىعىن ءبىر دۇنيە بىرىكتىرىپ تۇر. بۇل – ۇلى اقىننىڭ, ويشىلدىڭ دارالىعىنىڭ تامىرى قايدان باستاۋ الاتىنىن زەردەلەۋ. ولاردىڭ ارقايسىسى سەمەيدە, جيدەباي مەن بورىلىدە بولىپ, ۇلتتىق مادەنيەت پەن تاريحتىڭ بىرەگەي ەسكەرتكىشتەرىمەن تانىسىپ, تانىم كوكجيەگىن كەڭەيتىپ قايتادى, – دەدى جاقسىلىق ومار.
دۋمان اناش, «ەگەمەن قازاقستان».
شىعىس قازاقستان وبلىسى.
