وقۋ-جاتتىعۋ ورتالىعىندا شەتەلدە وقىعان, ءوز ءبىلىمىن جاس ماماندارعا ۇيرەتەتىن سەرتيفيكاتى بار ماماندار قىزمەت ەتەدى جانە ساباق بەرەدى. بۇل ءبىلىم ورداسى وقىتۋدى باستاعاننان بەرى قارۋلى كۇشتەر مەن باسقا دا اسكەري قۇرالىمدارعا جۇزدەگەن ماماندار دايارلادى.
ساباقتار «SkyLark1LEX» تاكتيكالىق بارلاۋ جۇيەسىن قولدانا وتىرىپ وتكىزىلەدى. بۇل جوعارى دالدىكتەگى قۇرال ناقتى ۋاقىتتاعى بەينەلەردى بەرۋ مەن وزىق ناۆيگاتسيالىق مۇمكىندىكتەرگە يە.
«بۇگىندە مۇنداي قۇرىلعىلار قورعانىس جانە بارلاۋ جۇيەسىندەگى نەگىزگى پوزيتسيالاردى سەنىمدى تۇردە الادى. سوندىقتان ءبىز جاڭا تەحنولوگيالاردى جەتىك مەڭگەرۋگە ءتيىس جوعارى بىلىكتى وپەراتورلاردى دايارلاۋعا ەرەكشە نازار اۋدارامىز», دەپ ءتۇسىندىردى شتاب باستىعى, ۇۇا جاۋىنگەرلىك قولدانۋ وقۋ-جاتتىعۋ ورتالىعى باستىعىنىڭ ورىنباسارى پودپولكوۆنيك المات حايرۋشەۆ.
«شىعىس» وڭىرلىك قولباسشىلىعى 44736 اسكەري ءبولىمىنىڭ كەلىسىمشارت بويىنشا اسكەري قىزمەتشىسى, قاتارداعى جاۋىنگەر فەرحات ورىمباەۆ بۇرىن جارۋ ىسىمەن اينالىسقان. قازىر ونىڭ اسكەري كاسىبىندە تۇبەگەيلى وزگەرىس بولىپ جاتىر.
«جارۋ ءىسى ماعان ۇنايتىن. بىراق مەن ارقاشان ۇشقىشسىز باسقارىلاتىن اۆياتسيالىق جۇيەلەردى ۇيرەنۋدى ارماندايتىنمىن. مەنى ۇشقىشسىز ۇشاتىن اپپاراتتاردىڭ مامانى ەتىپ تاعايىنداعان كەزدە, سول ارمانعا قول جەتكىزە باستاعانداي بولدىم. قازىر اۋە قورعانىسى كۇشتەرىنىڭ وقۋ-جاتتىعۋ ورتالىعىندا وقيمىن, ۇۇا وپەراتورى بولامىن», دەدى فەرحات.
وقۋ-جاتتىعۋ بارىسىندا كۋرسانتتار بورتتىق جابدىقتى ىسكە قوسۋدان جانە باپتاۋعا دايىندىقتان باستاپ, الىنعان اقپاراتتى پيلوتتاۋعا جانە تالداۋعا دەيىنگى تولىق تسيكلدى مەڭگەرەدى. ساباقتىڭ پراكتيكالىق بولىگى ترەناجەرلەردە دە, دالادا دا وتەدى. كۋرسانتتار 40 كۇنگە سوزىلاتىن كۋرستى اياقتاعاننان كەيىن سەرتيفيكاتتار
الادى.
تاراز
