كۇنى كەشە «بايقوڭىر» اۋدانى اكىمدىگىنىڭ باستاماسىمەن «Amanat» پارتياسى «جاستار رۋحى» جاستار قاناتىنىڭ 100 ۆولونتەرى قالا تۇرعىندارىمەن بىرگە ا.پۋشكين كوشەسىندەگى كانال ماڭىن تازالادى. قالاداعى ۆولونتەرلىك ۇيىمداردىڭ بەلسەندى جاستارى اپتا سايىن تۇرعىندارمەن بىرگە ەكولوگيالىق اكتسيالارعا قاتىسادى. بۇگىن ءبىر ۇيىم سەنبىلىككە شىقسا, كەلەر اپتا ەكىنشى, ءۇشىنشى ۇيىمنىڭ ەرىكتىلەرى قۇرال-سايمانىن سايلايدى. «جاستار رۋحى» جاستار قاناتىنىڭ ۆولونتەرلەرى وتكەن بەيسەنبىدە ەلورداداعى «الماتى» اۋدانىندا كوشە بويىن تازالاعان.
ا.پۋشكين كوشەسىندەگى كانال ماڭىندا ەرىكتىلەرمەن بىرگە «بايقوڭىر» اۋدانى ىشكى ساياسات ءبولىمىنىڭ باسشىسى ارمان بايانبەكوۆ بولدى.
– قالا جاستارىنىڭ ەكولوگيالىق اكتسيالارعا, قايىرىمدىلىق ءىس-شارالارىنا بەلسەندى قاتىساتىنى قۋانتادى. بۇگىنگى اكتسياعا 100-دەن استام ۆولونتەر قاتىسۋعا نيەت ءبىلدىردى. جالپى, «بايقوڭىر» اۋدانىندا تازالىق جۇمىستارى, اباتتاندىرۋ قىزۋ ءجۇرىپ جاتىر. جىل باسىنان بەرى 1 611 اعاش ەگىلدى. ونىڭ ىشىندە جۇمابەك تاشەنوۆ كوشەسىنىڭ بويىندا پايدا بولعان جاسىل ورماندى ەرەكشە ايتۋعا بولادى. اتالعان ۋچاسكەدەگى بوس كەڭىستىككە 500-گە جۋىق اعاش ەگىلگەن. وسىلايشا, قالامىزدا تاعى ءبىر ەكولوگيالىق تازا, تىنىش دەمالىس ايماعى قۇرىلدى. كوگالداندىرۋ بارىسىندا قىلقان جاپىراقتى اعاشتار, الما, المۇرت اعاشتارى, قاراعاي وتىرعىزىلدى. وسى ايماقتاردىڭ بارلىعىن تازا ۇستاۋعا جۇمىلعان جاۋاپتى مەكەمەگە, سەنبىلىككە شىعىپ جۇرگەن قالا تۇرعىندارىنا العىس ايتامىز, – دەيدى ا.بايانبەكوۆ.
اۋداننىڭ كۇل-قوقىسىن شىعارۋعا شىققان بەلسەندى جاستاردىڭ قاتارىندا «شيپاگەر» مەديتسينالىق كوللەدجىنىڭ ستۋدەنتى الىپجان ايداروۆ تا بار. وقۋدا وزات جاس سپورتپەن شۇعىلدانادى, ۆولونتەرلىككە دە ۋاقىت تابادى.
– كوللەدجدە فەلدشەر ماماندىعىندا وقيمىن. ۆولەنتەرلىكپەن ەكى جىلدان بەرى اينالىسامىن. بيىل جىل باسىنان بەرى سەنبىلىكتەردەن قالماۋعا تىرىسىپ, وسىمەن ءتورتىنشى رەت اكتسياعا كەلىپ تۇرمىن. مەنىڭ تۇسىنىگىمدە «تازالىق» دەگەن ءسوزدىڭ اۋقىمى كەڭ. اسىرەسە ءبىز سەكىلدى مەديتسينا سالاسىندا وقيتىن ستۋدەنتتەر تازالىقتى وزىنەن باستاۋى كەرەك. «تازا قازاقستان» ەكولوگيالىق اكتسياسىندا بىرىنشىدەن, قالا تازالىعىنا ۇلەس قوسساق, ەكىنشىدەن, ستۋدەنتتىك ءومىردىڭ شۋاقتى كەزەڭدەرىن كوڭىلدى وتكىزىپ ءجۇرمىز. وسىلايشا, ۋاقىتتى بارىنشا ءتيىمدى پايدالانساق دەيمىز. ۆولونتەرلىك ۇيىمعا ءبارىمىزدى «جاقسىلىق جاساۋ» دەگەن ورتاق ماقسات بىرىكتىردى, – دەيدى الىپجان.
وسىدان ءبىر اي شاماسى بۇرىن «Amanat» پارتياسىنىڭ «جاستار رۋحى» جاستار قاناتى الەۋمەتتىك جەلىدەگى پاراقشادا تازالىققا ۇندەيتىن بايقاۋ جاريالاعان. ونىڭ شارتى بويىنشا قالا تۇرعىندارى شىنى, پلاستماسسا بوتەلكەلەردى جيناپ, تاۋەلسىزدىك, 3 مەكەنجايىنا وتكىزۋگە ءتيىس بولدى. بوتەلكەلەردى ۇيىمداستىرۋشىلار قايتا وڭدەۋ پوليگونىنا تاپسىرادى. ۇتىسقا قاتىسۋعا وتىزدان استام بوتەلكە الىپ كەلگەن قالا تۇرعىندارى بولدى. اكتسيا بارىسىندا ۇتىستىڭ جەڭىمپازدارى انىقتالدى. باستى سىيلىق استانا حالىقارالىق ۋنيۆەرسيتەتىنىڭ مەنەدجمەنت ماماندىعىندا وقيتىن ديليارا ىسقاقوۆاعا بۇيىردى. تاعى بىرنەشە ستۋدەنتكە تاماقتانۋ ورنىنا جولداما بەرىلدى.
– مەن ۋنيۆەرسيتەتتەگى «قولعابىس» ۆولونتەرلىك ۇيىمىنىڭ مۇشەسىمىن. ۆولونتەرلىكپەن مەكتەپ جاسىنان اينالىسامىن. كوبىنە قارتتارعا كومەكتەستىك. الەۋمەتتىك جەلىدە بوتەلكە جيناپ, كونكۋرسقا قاتىسۋعا بولاتىن بايقاۋ جاريالانعانىن ەستىپ, باعىمدى سىناپ كورسەم دەدىم. ونسىز دا ۆولەنتەرلىك ۇيىمدا تازالىققا ارالاسىپ ءجۇرمىز. كورسەتىلگەن مەكەنجايعا 40 بوتەلكە اپارىپ تاپسىردىم. Apple Watch ۇتىپ الامىن دەپ ويلاعانىم جوق. دەگەنمەن ماعان بۇيىرعانىنا قۋانىشتىمىن. قالا تۇرعىندارىن, قاتارلاستارىمدى تازالىق ساقتاۋعا شاقىرامىن, – دەيدى د.ىسقاقوۆا.
بيىل «بايقوڭىر» اۋدانىنداعى 17 ۋچاسكەدە كوگالداندىرۋ جۇمىسىن جانداندىرۋ جوسپارلانعان. ونىڭ ىشىندە 5 000-نان استام اعاش وتىرعىزىلادى. سول سەكىلدى 1 079 بۇتا, 16 355 كوپجىلدىق, 5 795 بىرجىلدىق گۇل ەگىلەدى. وسىلايشا, اۋداندى كوگالداندىرۋ جۇمىستارىنا جىلداعىداي كوپ كوڭىل بولىنگەلى تۇر. «تازالىق تازا جەردە ەمەس, تازالىق ساقتاعان جەردە بولاتىنىن» جاقسى بىلەتىن ەلوردالىقتار جالپىحالىقتىق سەنبىلىكتەردەن قالماي, جاڭا كەيىپكە ەنگەن اۋلالارىن كۇتىپ ۇستايدى دەپ سەنەمىز.
