وليمپياداعا تىركەلۋ وسى جىلدىڭ 13 قاڭتارىندا باستالىپ, ىرىكتەۋ كەزەڭى 8 اقپان كۇنى ونلاين فورماتتا ءوتتى. رەسپۋبليكانىڭ بارلىق وڭىرىنەن 9-11-سىنىپ بويىنشا 5 مىڭعا جۋىق وقۋشى قاتىستى. ال وليمپياداعا 64 كوماندادان قۇرالعان 192 وقۋشى جولداما الىپ, استانا قالاسىنا كەلدى.
ۇيىمداستىرۋشىلاردىڭ ايتۋىنشا قاتىسۋشىلار «پىكىرسايىس» تۋرىندا وي ءبولىسۋ, دالەل كەلتىرۋ جانە قارسى پىكىرگە جاۋاپ بەرۋ ارقىلى پىكىرسايىس مادەنيەتىن دامىتىپ, «تىلشىلەر» كەزەڭىندە ەسسە, مازمۇنداما جانە تالداۋ جازۋ ارقىلى جازۋ مادەنيەتى مەن ويدى ەركىن جەتكىزۋ قابىلەتىن كورسەتتى. ال ء«بىلىمپازدار» باعىتىندا عىلىم مەن ءبىلىم تاقىرىبىنداعى 40 سۇراقتان تۇراتىن ونلاين-ۆيكتورينادا قاتىسۋشىلاردىڭ جىلدامدىعى مەن العىرلىعى سىنالدى.
وليمپيادانىڭ باس جۇلدەسىن تۇركىستان وبلىسىنان كەلگەن «دوستىق» كومانداسى جەڭىپ الدى. سونىمەن قاتار 11-سىنىپتىڭ 8 ۇزدىك وقۋشىسىنا ەلىمىزدىڭ جەتەكشى جوعارى وقۋ ورىندارى - اباي اتىنداعى قازاق ۇلتتىق پەداگوگيكالىق ۋنيۆەرسيتەتى (5 گرانت) جانە Narxoz ۋنيۆەرسيتەتى (3 گرانت), Coventry University (1 گرانت) ءبىلىم گرانتتارىن تابىستالدى.
بۇدان بولەك, 5 كوماندا - «ۇزدىكتەر», 10 كوماندا - «وزاتتار», 16 كوماندا - «مىقتىلار», 32 كوماندا - «بەلسەندىلەر» اتالىمى بويىنشا ماراپاتتالدى.
قازىلار القاسىنىڭ قۇرامىنا فيلولوگ-عالىمدار, ء«بىلىم-يننوۆاتسيا» ليتسەيلەرىنىڭ ماماندارى, ادىسكەرلەر, سونداي-اق تانىمال ءتىلشى-جازۋشىلار ەندى.
«بۇل وليمپيادا - ءبىلىمدى قازاق تىلىندە الىپ جاتقان بالالاردىڭ اراسىندا, قازاق ءتىلى مەن ادەبيەت پانىنە ەرەكشە ىقىلاسى اۋعان, بولاشاق تىلشىلەر, تاريحشىلار, جالپى ەلىمىزدىڭ رۋحانياتىنا, مادەنيەتىنە ەڭبەك ەتەتىن, بويىندا قابىلەتى بار بالالاردى ىرىكتەپ, سولارعا جول اشۋعا جاسالعان ۇلكەن جوبا. قازاق ءتىلىن مەڭگەرۋ دەڭگەيىن كوتەرۋ باعىتىنداعى جۇمىسىمىز ءتيىستى ساتىعا جەتپەي, باسقا سالاداعى ءتىل توڭىرەگىندەگى امالدارىمىز كوپ ناتيجە بەرۋى ەكىتالاي. سوندىقتان وسى باعىتتاعى جۇزەگە اسىپ جاتقان ءىس-شارالاردىڭ ءبىرى - ەلىمىزدىڭ بارلىق ايماقتارىن قامتىعان «انا ءتىلى» وليمپياداسى», دەدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
«انا ءتىلى» وليمپياداسىنىڭ باستى ماقساتى - قازاق ءتىلىن جاستار اراسىندا كەڭىنەن ناسيحاتتاۋ, ونى عىلىم مەن ءبىلىم تىلىنە باعىتتاۋ, سونداي-اق وقۋشىلاردىڭ وقۋ ساۋاتتىلىعى مەن جازۋ مادەنيەتىن ارتتىرۋ.
«وسى باعىتتا حالىقارالىق «قازاق ءتىلى» قوعامى مۇعالىمدەرگە تۇراقتى تۇردە ادىستەمەلىك قولداۋ كورسەتىپ, ءتىل جاناشىرلارىنىڭ فورۋمدارىن ۇيىمداستىرىپ كەلەدى. «انا ءتىلى» وليمپياداسى قازاق ءتىلىن جەتىك مەڭگەرۋگە ىنتالاندىرۋ ارقىلى ونى جاستار اراسىندا برەندكە اينالدىرۋدى كوزدەيدى. جوبا الداعى جىلدارى دا ءداستۇرلى تۇردە جالعاسىن تابادى», دەدى راۋان كەنجەحان ۇلى.
