ەلباسى مادەنيەت جانە سپورت ءمينيسترىن قابىلدادى

استانا. 3 تامىز. ەلباسى مادەنيەت جانە سپورت ءمينيسترى ارىستانبەك مۇحامەدي ۇلىن قابىلدادى. بۇل تۋرالى akorda.kz حابارلادى. كەزدەسۋ بارىسىندا قازاق حاندىعىنىڭ 550 جىلدىعىن مەرەكەلەۋگە دايىندىق ماسەلەلەرى, سونداي-اق, «100 ناقتى قادام» ۇلتتىق ءىس-قيمىل جوسپارىن جۇزەگە اسىرۋ اياسىنداعى مينيسترلىكتىڭ قىزمەتى تالقىلاندى. مەملەكەت باسشىسى مەرەكەلىك شارالاردى دايارلاۋ بارىسىندا نەگىزگى سالماق مادەنيەت جانە سپورت مينيسترلىگىنە تۇسەتىنىن ايتتى. «وسى جىلدار ىشىندە مەملەكەت تاريحى ينستيتۋتى قۇرىلدى, كوپتەگەن عالىمدارىمىز تاريحي ماتەريالدار ىزدەپ تابۋ جانە ولاردى جان-جاقتى زەردەلەۋ ءۇشىن شەتەلدەرگە شىقتى. ەل بولۋ ءۇشىن, سونداي-اق, جاستاردى پاتريوتتىق تۇرعىدا تاربيەلەۋ ءۇشىن بىزگە قازاقستاننىڭ شىنايى تاريحى كەرەك», – دەپ اتاپ ءوتتى نۇرسۇلتان نازارباەۆ. قازاقستان پرەزيدەنتى مەرەيتويدى قالىپتاسقان كۇردەلى ەكونوميكالىق جاعدايدا ارتىق شىعىنسىز, بىراق حالىق جادىندا قالاتىنداي ساپالى وتكىزۋ كەرەكتىگىن ايتتى. مەملەكەت باسشىسى مەرەيتويلىق شارانىڭ باستى ماقساتى بارشا قازاقستاندىقتاردىڭ ءپاتريوتيزمىن نىعايتۋ جانە ولاردىڭ رۋحاني تۇرعىدان ءوسىپ-جەتىلۋىن قامتاماسىز ەتۋ بولىپ سانالاتىنىن اتاپ ءوتتى. مادەنيەت جانە سپورت ءمينيسترى مەرەكەلىك شارالار استانادا جانە تارازدا وتەتىنىن ايتتى. «قازاق حاندىعىنىڭ 550 جىلدىعىن مەرەكەلەۋ قازاق حالقىنىڭ بىرتەكتىلىگى مەن بىرلىگىن نىعايتۋ ءۇشىن وتە ماڭىزدى. ءبىز ءبىرىنشى كەزەكتە حالىقارالىق عىلىمي-تاجىريبەلىك كونفەرەنتسيالار وتكىزۋگە كوڭىل بولەمىز. سونىمەن قاتار, قازىرگى كەزدە تارازدا ەتنوگرافيالىق مۋزەي جانە ورتالىق سالىنۋدا. ماڭىزدى ارحەولوگيالىق جۇمىستار جۇرگىزىلۋدە», – دەدى ارىستانبەك مۇحامەدي ۇلى. مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەردى. ەلامان قوڭىر. دەرەك, سۋرەت: akorda.kz.