حالقى تىعىز قونىستانعان وڭتۇستىك كوشى سولتۇستىك جۇرتى ءۇشىن دە ءساتتى باستاما بولىپتى. وسىنىڭ ارقاسىندا پاۆلودار وڭىرىندە عانا 4 مەكتەپ جابىلۋدان امان قالعان. جاڭا قونىسقا ۇيرەنىسكەندەر قازىر قاي سالادا دا تابىستى جۇمىس ىستەپ كەلەدى.
شىعىستا دا حالقى ازايعان ءبىراز ەلدى مەكەننىڭ تۇرعىندارى قاتارىن وسى وڭتۇستىك وڭىردەن بارعاندار تولتىرىپ وتىر. شىعىس قازاقستان وبلىسىنىڭ ەڭبەك موبيلدىلىگى ورتالىعىنىڭ ديرەكتورى ارايلىم كەرىمبەكقىزىنىڭ ايتۋىنشا, ەلىمىزدىڭ ىشكى كوشى-قونىن جۇيەلى جۇرگىزىپ, ازاماتتارعا ناقتى قولداۋ كورسەتۋدىڭ ناتيجەسىندە جىل باسىنان بەرى قىزىلوردا وبلىسىنان 3 وتباسى قونىس اۋدارىپ, تۇراقتى جۇمىسقا ورنالاسىپتى. وڭىردە ءبىلىم بەرۋ, دەنساۋلىق ساقتاۋ, اۋىل شارۋاشىلىعى, ءوندىرىس, قىزمەت كورسەتۋ سالالارىندا بوس جۇمىس ورىندارى جەتكىلىكتى.
قونىس اۋدارۋشىلاردى تۇرعىن ۇيمەن قامتاماسىز ەتۋ, الەۋمەتتىك تولەمدەر تاعايىنداۋ, بالالارىن مەكتەپكە نەمەسە بالاباقشاعا ورنالاستىرۋ سياقتى جان-جاقتى قولداۋ قاراستىرىلعان. مەملەكەتتىك قولداۋدان بولەك, اۋىلعا كوشىپ بارعاندار سونداعى قاريالاردىڭ «قوراسى بوس تۇرماسىن» دەگەن قامقورلىعىن دا سەزىنەدى. ەكى سيىر, ونشاقتى ۇساق مال بەرىپ, ونىڭ جەمشوبىن, وتىنىن ءتۇسىرىپ بەرەتىن جومارت ازاماتتار دا بار.
بىلتىر عانا ريددەر قالاسىنىڭ تۇرعىنى اتانعان جانار سىدىقوۆا سىرداريا اۋدانىنداعى اقجارما اۋىلىنىڭ تۋماسى. قازىر ريددەر قالالىق ازاماتتىق قورعانىس بولىمىندە ماماندىعىنا سايكەس قىزمەت اتقارادى. ول جاڭا مەكەنىندەگى تابيعاتتىڭ سۇلۋلىلىعىنا ءتانتى.
ال كۇرشىم اۋدانىنداعى بىرلىك اۋىلىنا ارال قالاسىنان كوشىپ بارعان گۇلميرا تازيەۆا 7 بالاسىمەن ء«بىر قاباتتى شىعىس» باعدارلاماسى اياسىندا باسپانالى بولىپتى. ۇلكەن ۇلى جۇمىسقا ورنالاسىپ, كىشىلەرى مەكتەپكە قابىلدانعان گۇلميرا قالانى اۋىلعا ايىرباستاعانىنا ەش وكىنبەيدى.
جانعا دا, مالعا دا جايلى شىعىستا جۇمىسشىسىن ۇيمەن قامتىپ, 1 ملن تەڭگەگە دەيىن جالاقى تولەۋگە دايار قوجالىقتار بار. وبلىستاعى جاڭادان اشىلعان 4 اۋدانعا مەملەكەتتىك قىزمەتكەرلەر, ىشكى ىستەر سالاسىنىڭ ماماندارى, مۇعالىمدەر مەن دارىگەرلەر جەتىسپەيدى. جالپى, شىعىستان كەلگەن دەلەگاتسيا 1 960 بوس جۇمىس ورنىن ۇسىنىپ وتىر.
سولتۇستىك قازاقستان وبلىسىنىڭ ەڭبەك موبيلدىلىگى ورتالىعىنىڭ باسشىسى امان تورەگەلدين قىزىلوردا وڭىرىنە مەملەكەتتىڭ جۇمىس كۇشىنىڭ ۇتقىرلىعىن ارتتىرۋ ءۇشىن ازاماتتاردىڭ ەرىكتى تۇردە قونىس اۋدارۋىنا ىقپال ەتەتىن باعدارلامانى ءتۇسىندىرۋ ماقساتىندا ارنايى كەلگەنىن ايتادى. وبلىس – اۋىل شارۋاشىلىعى مەن ونەركاسىپ سالاسى قاتار دامىعان ءوڭىر. قىزىلوردا وبلىسىمەن تىعىز قارىم-قاتىناستا جۇمىس ىستەۋدىڭ ناتيجەسىندە بەس جىلدا سىردان وبلىسقا 800-گە جۋىق ادام قونىس اۋدارىپتى.
«ولاردىڭ بارلىعى باسپانالى بولدى, الەۋمەتتىك جاعىنان جاقسى قامتاماسىز ەتىلگەن. بۇل – باعدارلامانىڭ تيىمدىلىگىن كورسەتەتىن ناقتى مىسالداردىڭ ءبىرى. ءبىز كوشۋگە نيەتتى ازاماتتاردىڭ جاڭا ورتاعا بەيىمدەلۋىنە كومەكتەسەمىز. بيىل 1 404 بوس جۇمىس ورنىن ۇسىنىپ وتىرمىز. ونىڭ ىشىندە مەديتسينا, فارماتسەۆتيكا سالاسىندا 98, ءبىلىم بەرۋ سالاسىندا 197, اۋىل شارۋاشىلىعىندا 106, ەنەرگەتيكا سالاسىندا 76, قۇرىلىستا 57, وندىرىستە 129, بىلىكتىلىكتى قاجەت ەتپەيتىن 95, كولىك, لوگيستيكا سالاسىندا 79 بوس جۇمىس ورنى بار», دەيدى امان تورەگەلدين.
پاۆلودار وبلىسىنىڭ ەڭبەك موبيلدىلىگى ورتالىعىنىڭ ديرەكتورى مەرۋەرت ەسەمباەۆانىڭ ايتۋىنشا, بيىل ءوڭىر 4 050 ادامدى قابىلداۋعا دايىن. 9 جىل ىشىندە بۇل وڭىرگە سىرتتان باعدارلاما اياسىندا 20 مىڭنان استام ادام كوشىپ بارىپتى.
ۇلىتاۋ, اباي وبلىستارىندا دا جۇمىس كۇشى تاپشى. وسى وڭىرلەردەن كەلگەن وكىلدەر دە «بولاشاققا باعدار» بوس جۇمىس ورىندارى جارمەڭكەسىنەن قاجەتتى مامان تابۋدان ءۇمىتتى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى نۇرجان ومىرزاقوۆتىڭ ايتۋىنشا, بيىل سولتۇستىككە كوشۋگە 9 653 ادامعا وڭىرلىك كۆوتا بەلگىلەنىپتى.
جالپى, جۇمىس كۇشى از ايماقتارعا 2020 جىلدان بەرى 708 وتباسى قونىس اۋدارعان. بەس جىل ىشىندە سولتۇستىك وڭىرلەرگە قونىس اۋدارۋشىلاردىڭ قاتارى 1,5 ەسەگە ارتقان.
قىزىلوردا
