قىتايدا ايگىلى «نامىس دودا» شوۋىنىڭ كەزەكتى ماۋسىمى باستالدى (فوتو)

قىتايدىڭ حاينان ارالىندا الەمگە تانىمال «نامىس دودا» (بولشيە گونكي) سپورتتىق-تانىمدىق تەلەشوۋىنىڭ تۇسىرىلىمدەرى ءوتتى. اتالعان سىنعا وتاندىق سپورت جانە ونەر جۇلدىزدارىنان جاساقتالعان قازاقستان كومانداسى دا قاتىسۋدا. بۇل تۋرالى «قازاقستان» تەلەراديو كورپوراتسياسىنىڭ ءباسپاسوز قىزمەتى حابارلادى. بيىل ويىنعا قازاقستاننان بولەك, قىتاي, ۆەنگريا, فرانتسيا جانە الجير ەلىنىڭ كوماندالارى دا باق سىناۋدا. بۇعان دەيىن قازاقستان وسى شوۋعا ءۇش رەت قاتىستى. ناقتى ايتساق, 2007 جىلى – 4-ورىن, 2008 جىلى – 2-ورىن, ال 2012 جىلى 1-ورىندى يەلەنگەن ەدى. ءاربىر قاتىسۋشى ەلدەن ونىڭ تانىمال تۇلعالارى: سپورت تۇرلەرى بويىنشا الەم چەمپيوندارى, ەسترادا جۇلدىزدارى قاتىسادى. قازاقستان قۇرامانىڭ باس جاتتىقتىرۋشىسى – ەرەجەسىز جەكپە-جەك بويىنشا ءۇش دۇركىن الەم چەمپيونى, ەۋروپا جانە ازيا چەمپيونى, ەرەجەسىز جەكپە-جەك بويىنشا الەم كۋبوگىنىڭ يگەرى ارداق نازاروۆ. ودان بولەك, قازاقستاننىڭ بىرقاتار ونەر جۇلدىزدارى كوماندامىزدى قولداۋ ءۇشىن قىتاي ەلىنە اتتاندى. بيىل «بولشيە گونكي» جوباسىنىڭ ەرەجەلەرى وزگەردى. ەندى قاتىسۋشىلار ويىننىڭ ءار جارىسىندا جەڭىس ءۇشىن تەر توگەتىن بولادى. بۇدان بۇرىن «چەمپيون قابىرعاسى» ويىنى ۇپايلاردى ەسەپتەۋ كەزىندە ماڭىزدى جانە شەشۋشى بولاتىن. بۇگىنگى كۇنى ۇپاي سانىن ساناۋ جانە التىن, كۇمىس جانە قولا مەدالدار ءار ويىن اياقتالعان سايىن تابىستالىپ, ەڭ سوڭىندا ويىننىڭ بارلىق كەزەڭدەرى بويىنشا جالپى ۇپاي ەسەپتەلەدى. شوۋدىڭ تەلەۆيزيالىق نۇسقاسى «قازاقستان» تەلەارناسىنان الداعى كۇزدە «نامىس دودا» اتاۋىمەن كورسەتىلەدى. بۇل شوۋ العاش رەت 1962 جىلى فرانتسيادا Intervilles (قالاارالىق) دەگەن اتاۋمەن پايدا بولدى. كەيىن الەمنىڭ 30-دان استام ەلىندە تانىمال بولىپ, كوپتەگەن مەملەكەتتەر قاتىساتىن سپورتتىق-تانىمدىق تەلەشوۋعا اينالدى. ويىنداردىڭ نەگىزىن سول جىلدارى فرانتسيانىڭ پرەزيدەنتى شارل دە گولل قالادى. ونىڭ ماقساتى – حالىقتار دوستىعىن نىعايتىپ, ەۋروپا جاستارىنىڭ كوڭىلىن كوتەرۋ. جوبانىڭ اۋديتورياسى 2 ملرد. ادامدى قۇرايدى. مۇنداي اۋديتوريا تەك وليمپيادا ويىندارىندا جينالادى. بۇل تەلەۆيزيا دامۋىنداعى الەمدىك بارلىق تەندەنتسيالارعا سايكەس كەلەتىن وتاندىق تەلەۆيزياداعى ءىرى كولەمدەگى جانە جوعارى ساپاداعى بىردەن-ءبىر شوۋ. ەلامان قوڭىر. دەرەك, سۋرەت: «قازاقستان» تەلەراديو كورپوراتسياسىنىڭ ءباسپاسوز قىزمەتى.