ءبىز ديانانى قۇقىق ماگيسترى عانا ەمەس, حالىقارالىق دەڭگەيدە تانىلىپ كەلە جاتقان بىلىكتى عالىم رەتىندە جاقسى بىلەمىز. ءبىر جاعىنان, ونىڭ ەسىمى عىلىمي ورتادا «Scopus» حالىقارالىق دەرەكقورىندا جاريالانعان مازمۇندى ماقالالارىمەن بەلگىلى. وسى ەڭبەكتەرىنە ءبىراز سىلتەمە جاسالىپ, عىلىمي زەرتتەۋلەرى ۇلكەن قىزىعۋشىلىق تۋدىرعان. سونداي-اق ول رەسپۋبليكالىق جانە حالىقارالىق عىلىمي كونفەرەنتسيالارعا دا ءجيى قاتىسادى. اسىرەسە لوندوندا وتكەن عىلىمي فورۋمدا بايىپتى بايانداما جاساعان. سوندىقتان ارىپتەستەرى ونىڭ عىلىمعا ادالدىعى مەن وتانسۇيگىشتىك قاسيەتىن ەرەكشە باعالايدى.
زەردەلى زاڭگەر 2018–2024 جىلدارى زاڭ فاكۋلتەتى جانىنداعى جاس عالىمدار كەڭەسىنىڭ بەلسەندى مۇشەسى بولدى. وسى كەڭەس اياسىندا ول جاس زەرتتەۋشىلەرگە باعىت-باعدار بەرىپ, ءتۇرلى عىلىمي باستامانى ىسكە اسىرۋعا اتسالىستى. عالىم قىزمەتىنىڭ ماڭىزدى ءبىر باعىتى – مەملەكەتتىك انتيكوررۋپتسيالىق ساراپتاما جوباسىنداعى جۇمىسى. جوبا اياسىندا ەكى جىل بويى ۇيلەستىرۋشى قىزمەتىن اتقارىپ, مەملەكەتتىك ورگانداردان كەلىپ تۇسكەن نورماتيۆتىك قۇقىقتىق اكتىلەردى ساراپشىلارعا جولداۋ جۇمىسىن ءتيىمدى جۇرگىزدى. بۇل تاجىريبە وعان مەملەكەتتىك دەڭگەيدە قۇقىقتىق رەفورمالارعا ۇلەس قوسۋعا مۇمكىندىك بەردى.
«قۇقىقتانۋ بۇل تەك عىلىم سالاسى عانا ەمەس, سونىمەن بىرگە بۇل قوعامدى وزگەرتۋ قۇرالى. مەنىڭ عىلىمي ىزدەنىستەرىم مەن باستامالارىم ەلىمىزدەگى قۇقىقتىق مادەنيەتتى دامىتۋعا, كامەلەتكە تولماعانداردىڭ قۇقىعىن قورعاۋ سالاسىن جەتىلدىرۋگە باعىتتالعان. بۇل ەل بولاشاعىنا قوسىلعان ۇلەس دەپ ويلايمىن», دەدى ول.
سونداي-اق ديانا كوشەنوۆانىڭ اقش پەن گەرمانيادا تاعىلىمدامادان ءوتىپ, حالىقارالىق قىلمىستىق قۇقىق, كريمينولوگيا, كامەلەتكە تولماعانداردىڭ قۇقىقتارىن قورعاۋ سالالارىندا شەتەلدىك ارىپتەستەرىمەن بىرلەسىپ جۇمىس ىستەگەن تاجىريبەسى وتە مول. قازىر عالىم بۇل تاجىريبەسىن عىلىم مەن پەداگوگيكا سالاسىنداعى قىزمەتىندە ءتيىمدى پايدالانىپ كەلەدى. بۇگىنگى تاڭدا ول «كامەلەتكە تولماعاندارعا قاتىستى قىلمىستىق ىستەر بويىنشا سوتقا دەيىنگى تەرگەۋدىڭ پروتسەسسۋالدىق جانە كريمينولوگيالىق ەرەكشەلىكتەرى» اتتى دوكتورلىق ديسسەرتاتسياسىن جازىپ جاتىر. عىلىمي جۇمىسىندا مەكتەپتەردە يۋۆەنالدى كريمينولوگيالىق پروفايلينگتى ەنگىزۋ, اۋداندىق دەڭگەيدەگى ۆەدومستۆوارالىق يۋۆەنالدى كوميسسيالاردى قۇرۋ سياقتى تىڭ ۇسىنىستار كوتەرىلگەن. بۇل باستامالار ەلىمىزدەگى كامەلەتكە تولماعاندار اراسىنداعى قىلمىستىڭ الدىن الۋعا باعىتتالعان كەشەندى رەفورمانىڭ ءبىر بولىگى بولاتىنى انىق.
ازات ەسەن
