مۇنداعى باستى ماقساتى – سالاۋاتتى ءومىر سالتىن جاستار اراسىندا كەڭىنەن ناسيحاتتاۋ, تابىستى سپورتشىلاردىڭ كەيسىن پايدالانىپ, ءار ازاماتتىڭ چەمپيون بولۋعا لايىق ەكەنىن كورسەتۋ. جوبا شەڭبەرىندە تەك جاتتىعۋلار عانا ەمەس, ءار ءتۇرلى باعىتتاعى شارالار كەشەنى ۇيىمداستىرىلادى. الماتىدا باستاۋ العان جوبا رەسپۋبليكا كولەمىندە جالعاسادى.
ءىس-شاراعا ءماجىلىس دەپۋتاتى, «Alash Pride» كلۋبىنىڭ نەگىزىن قالاۋشى جانە پرەزيدەنتى دانيار قاسقاراۋوۆ, الماتى وبلىستىق ءماسليحات دەپۋتاتى, ساعادات باتىر اتىنداعى سپورت كلۋبىنىڭ نەگىزىن قالاۋشى, دجيۋ-دجيتسۋ جانە گرەپپلينگ سپورت شەبەرى نۇرسۇلتان ورىنباساروۆ, الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك, سونداي-اق ەلىمىزدىڭ اتاقتى سپورتشىلارى قاتىستى. ولاردىڭ قاتارىندا وتكەن جىلعى پاريج وليمپياداسىنىڭ كۇمىس جۇلدەگەرى ناريمان قۇربانوۆ, ارالاس جەكپە-جەك شەبەرى ارمان وسپانوۆ, دجيۋ-دجيتسۋدان الەم چەمپيونى, گرەپپلينگتەن UWW فەدەراتسياسىنىڭ الماتى قالاسى بويىنشا پرەزيدەنتى البەرت الدياروۆ, UFC ليگاسىندا ونەر كورسەتىپ جۇرگەن جەكپە-جەك جاۋىنگەرى اسۋ الماباەۆ بار. سونىمەن قاتار, ءىس-شاراعا قاتىسقان قوعام بەلسەندىلەرى مەن قالا جاستارى چەمپيوندارمەن ەركىن فورماتتا سۇحبات قۇردى.
جاستار قاناتىنىڭ كوشباسشىسى اقەركە يسكاندەروۆانىڭ ايتۋىنشا «چەمپيوندىق رۋح» — تەك سپورتتىق جاتتىعۋلار مەن جارىستاردى ۇيىمداستىرۋ عانا ەمەس, جاستاردىڭ ءوز دەنساۋلىعىن كۇتۋگە جانە قوعامدا سالاۋاتتى ءومىر سالتىن ىلگەرىلەتۋگە باعىتتالعان ۇستانىم دەيدى.
«بۇل جوبا سپورت پەن رۋحتى بىرلەستىرىپ, قوعامدا ىشكى ءتارتىپ, ءوز-وزىنە سەنىم قالىپتاستىرۋدى كوزدەيدى. ەڭ باستىسى – «چەمپيوندىق رۋح» جوباسى جاستار اراسىنداعى اگرەسسيامەن كۇرەسىپ, ولاردىڭ بوس ۋاقىتىن ءتيىمدى وتكىزۋگە, سپورتشىلاردىڭ كۇشى مەن ەنەرگياسىن دۇرىس باعىتتا قولدانۋعا جول اشادى. بۇل باستاما جاستاردى رۋحاني, فيزيكالىق جانە الەۋمەتتىك تۇرعىدان دامىتىپ, ولاردى جاۋاپتى ءارى بەلسەندى ازامات بولۋعا ىنتالاندىرادى. جوبا اياسىندا الداعى ۋاقىتتا سالاۋاتتى ءومىر سالتىن ناسيحاتتايتىن ءتۇرلى شارالار وتەتىن بولادى. ونىڭ ىشىندە, شەبەرلىك ساباقتارى, سپورتشىلارمەن كەزدەسۋ, تۋرنيرلەر جانە ت.ب.», دەدى ا. يسكاندەروۆا.
جوبانىڭ امباسسادورى, دجيۋ-دجيتسۋ مەن گرەپپلينگ بويىنشا سپورت شەبەرى نۇرسۇلتان ورىنباساروۆ بۇقارالىق سپورتتى دامىتىپ, كوپشىلىك اراسىندا ناسيحاتتاۋدىڭ ماڭىزى جايىندا ايتتى, سونداي-اق قاتىسۋشىلارعا ارنايى اشىق اسپان استىندا جاتتىعۋ وتكىزدى.
«بۇقارالىق سپورتتىڭ ادامنىڭ دەنساۋلىعىن جاقسارتۋ, قوعامداعى تارتىپتىلىك پەن بىرلىك سەزىمىن ارتتىرۋ, سونداي-اق ۇرپاق تاربيەسىندەگى ءرولى ەرەكشە. جاستاردى سپورتقا تارتۋ ارقىلى عانا ءبىز ولارعا دۇرىس ءومىر سالتىن ۇستانۋعا كومەكتەسە الامىز. سپورتتىق جاتتىعۋلار مەن جارىستار ارقىلى قوعامدا سالاۋاتتى ءومىر سالتىن قالىپتاستىرۋ ماڭىزدى», دەدى نۇرسۇلتان ورىنباساروۆ.
تاڭعى جاتتىعۋدىڭ ەڭ جاس قاتىسۋشىسى 4 جاسار ءالي ءوزىنىڭ اكەسىمەن بىرگە بەلسەندىلىك تانىتىپ, كوپشىلىكتىڭ نازارىن وزىنە اۋداردى. ءاليدىڭ سپورتقا دەگەن قىزىعۋشىلىعى مەن ەنەرگياسى وزگە دە قاتىسۋشىلارعا ستيمۋل بولدى. وسىنداي بەلسەندى قاتىسۋشىلارعا ارنايى چەمپيونداردىڭ قولتاڭباسى بار سىيلىقتار تابىستالدى.
ايتا كەتەيىك اتاۋلى شارا الماتى قالاسى جاستار ساياساتى باسقارماسى قولداۋىمەن ءوتىپ جاتىر. جوبا اياسىندا ءتۇرلى سپورتتىق جارىستار مەن ترەنينگتەر, فيتنەس-جاتتىعۋلار مەن شەبەرلىك سىنىپتارى, سونداي-اق ارنايى موتيۆاتسيالىق كەزدەسۋلەر مەن سەمينارلار ۇيىمداستىرىلادى.
