سۇرىلگەن نىسانداردىڭ ىشىندە تۇرعىن ءۇي كەشەندەرى, اكىمشىلىك عيماراتتار, جاپسارجايلار, ءدامحانالار, كولىك جۋ ورىندارى جانە باسقا دا قۇرىلىستار بار. ەڭ ءىرى نىساندار قاتارىندا «مەچتا» تاۋنحاۋسى, «KHAN» تۇك جانە دوستىق داڭعىلىنداعى 7 قاباتتى اكىمشىلىك عيماراتتى اتاۋعا بولادى.
سەيسميكالىق تالاپتاردى ەسكەرمەي, تاۋ بوكتەرىنە زاڭسىز قۇرىلىس سالاتىندارعا دا تالاپ كۇشەيە ءتۇستى. وسىنداي 38 نىسانعا قاتىستى سوت شەشىمى شىعىپ, ولاردىڭ 12-ءسى تولىق نەمەسە جارتىلاي بۇزىلعان. تاعى 3 نىساندا قۇرىلىس جۇمىستارى باستاپقى كەزەڭدە توقتاتىلعان.
جاۋاپتىلار, بۇزۋ جۇمىستارى تەك سوت شەشىمى مەن ءتيىستى قۇجاتتار نەگىزىندە, سوت ورىنداۋشىلارىنىڭ قاتىسۋىمەن جۇرگىزىلەتىنىن ايتادى.
«زاڭسىز قۇرىلىسقا باقىلاۋدى كۇشەيتۋ – قازىرگى كۇننىڭ تالابى. قالا ينفراقۇرىلىمىنا, كولىك جانە الەۋمەتتىك جۇيەگە جۇكتەمە ارتىپ بارادى. رۇقساتسىز, بەيبەرەكەت قۇرىلىس تەك قالانىڭ دامۋىنا ەمەس, تۇرعىنداردىڭ قاۋىپسىزدىگىنە دە تىكەلەي قاۋىپ توندىرەدى. اسىرەسە, تاۋلى ايماقتاعى قۇرىلىسقا ەرەكشە نازار اۋدارۋ قاجەت. بۇل اۋماقتار سەيسميكالىق تۇرعىدان ءالسىز ءارى قاۋىپتى ايماقتار. وسىنداي جەرلەردەگى زاڭ بۇزۋشىلىقتار وتە اۋىر سالدارعا اكەلۋى مۇمكىن. ەڭ باستىسى, بارلىق ءسۇرۋ جۇمىسى زاڭ اياسىندا سوت شەشىمىمەن عانا جۇزەگە اسىرىلىپ جاتىر. بۇل بارشاعا ورتاق ەرەجە مەن ادىلەتتىلىك كەپىلى. الماتىدا اتقارىلىپ جاتقان بۇل شارالار باسقا قالالار ءۇشىن دە ۇلگى بولا الادى», دەيدى ۋربانيست جانە قوعام قايراتكەرى گۇلميرا بايعابۇلوۆا.
