ءىس-شارا جازۋشىنىڭ بيۋستىنە گۇل شوقتارىن قويۋمەن باستالىپ, كەيىن اۋىلدىق مادەنيەت ۇيىندە «الەمگە ايگىلى ءانۋار» اتتى رەسپۋبليكالىق عىلىمي-تانىمدىق كونفەرەنتسيامەن جالعاستى. مادەنيەت ۇيىندە جازۋشىنىڭ شىعارماشىلىعىنا ارنالعان كورمە ۇيىمداستىرىلىپ, ارنايى بەينەفيلم كورسەتىلدى.
وبلىس اكىمى بەيبىت يساباەۆ مەملەكەت باسشىسى قاسىم-جومارت توقاەۆتىڭ مەرەيتويعا ارناعان قۇتتىقتاۋ حاتىن وقىدى. پرەزيدەنت ءوز حاتىندا ءانۋار ءالىمجانوۆتى قازاق رۋحانياتىندا ەرەكشە ورنى بار, ادامگەرشىلىك پەن حالىقتار دوستىعى تاقىرىپتارىن تەرەڭ كوتەرە بىلگەن جازۋشى رەتىندە باعالاپ, ونىڭ ادەبي جانە قوعامدىق قىزمەتىنە جوعارى باعا بەردى.
كونفەرەنتسيادا جازۋشىنىڭ ءومىرى مەن شىعارماشىلىعى, ۇلت مۇددەسى جولىنداعى ەڭبەگى كەڭىنەن ءسوز بولدى. جازۋشى, حالىقارالىق «الاش» سىيلىعىنىڭ يەگەرى نۇرداۋلەت اقىش پەن ءانۋارتانۋشى عالىم, پروفەسسور كاكەن حامزين جازۋشىنىڭ تاريحي تۇلعالاردى تانىتۋداعى, اسىرەسە ءال-ءفارابيدى حالىققا جاقىنداتۋداعى ءرولىن اتاپ ءوتتى.
اقىن ۇلىقبەك ەسداۋلەت ءالىمجانوۆتىڭ حالىقارالىق ادەبي بايلانىستاردى نىعايتۋعا قوسقان ۇلەسىن ايتىپ, ونى الەم ادەبيەتىمەن بايلانىستىرۋشى تۇلعا رەتىندە سيپاتتادى.
مەرەيتوي سوڭىندا جازۋشىنىڭ رۋحىنا ارناپ اس بەرىلدى.
