اتىراۋدا «اتگ-قۇرىلىس» سەرىكتەستىگىنىڭ ديرەكتورى سوتتالدى

اتىراۋ. 3 تامىز. اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا «اتگ-قۇرىلىس» سەرىكتەستىگىنىڭ بۇرىنعى ديرەكتورى جانبولات دۇيسەنباەۆقا قاتىستى سوت ۇكىمى شىقتى. بۇل تۋرالى وبلىستىق سوتتىڭ ءباسپاسوز قىزمەتى حابارلادى. «سوت تالقىلاۋىندا انىقتالعانداي, 2008-2011 جىلدارى «اتگ-قۇرىلىس» جشس-ءنىڭ ديرەكتورى بولىپ جۇمىس جاساعان كەزدەرى جانبولات دۇيسەنباەۆ اتىراۋ وبلىسىنىڭ قىزىلقوعا, قۇرمانعازى اۋداندارىنىڭ ەلدى مەكەندەرىن گازبەن قامتۋعا بولىنگەن بيۋدجەتتىك قارجىنى تالان-تاراجعا سالۋعا سۋىق قولىن سۇققان. سول جىلدارى جوبانى جۇزەگە اسىرۋ ءۇشىن رەسپۋبليكالىق جانە جەرگىلىكتى بيۋدجەتتەن 37,4 ملرد. تەڭگە قارجى بولىنگەن ەدى. «اتگ-قۇرىلىس» فيرماسى زاڭ تالاپتارىن ورەسكەل بۇزۋ ارقىلى وتكىزىلگەن تەندەرگە قاتىسىپ, ونى جەڭىپ شىعادى. ارى قارايعى جۇمىس جوبالىق-سمەتالىق قۇجاتتاردى كورىنەۋ جوعارى باعامەن جاساقتاۋ, جالعان كەلىسىم-شارتتار, اتقارىلعان قۇرىلىس جۇمىستارى مەن جۇمسالعان ماتەريالداردىڭ باعاسىن اناعۇرلىم جوعارىلاتىپ كورسەتۋ باعىتىندا ءورىس الىپ, بيۋدجەتتەن تۇسكەن قارجى قولما-قول اقشاعا اۋدارىلىپ وتىرىلعان. سوتتا سوتتالۋشى ءوز كىناسىن مويىنداماي, اقتاۋ ۇكىمىن شىعارۋدى سۇرادى», – دەلىنگەن اتىراۋ وبلىستىق سوتىنىڭ ءباسپاسوز قىزمەتى تاراتقان حابارلاما ماتىنىندە. سوت ۇكىمىمەن جانبولات دۇيسەنباەۆ قىلمىستىق كودەكستىڭ 235-بابىنىڭ 3-بولىگىمەن (قىلمىستىق ۇيىم قۇرۋعا قاتىسۋ) جانە 176-بابىنىڭ 4-بولىگىمەن (سەنىپ تاپسىرىلعان بوتەن م ۇلىكتى يەلەنىپ الۋ نەمەسە ىسىراپ ەتۋ) كىنالى دەپ تانىلدى. ونىڭ دۇنيە-مۇلكىن تاركىلەپ, 10 جىلعا باس بوستاندىعىنان ايىرۋ جازاسى تاعايىندالدى. سونىمەن بىرگە, وعان 4 جىل مەرزىمگە كاسىپكەرلىك قىزمەتپەن اينالىسۋعا تىيىم سالىندى. جازاسىن قاتاڭ رەجىمدەگى تۇزەۋ كولونياسىندا وتەيتىن بولادى. سونىمەن قاتار, جانبولات دۇيسەنباەۆتان مەملەكەتكە كەلتىرگەن شىعىنى ءۇشىن ورتاق تۇردە 2,7 ملرد. تەڭگە جانە 27,5 ملن. تەڭگە مەملەكەتتىك باج سالىعى ءوندىرىلىپ الىندى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: 24.kz.