«ايبار» جوباسىنا جاتاتىن شاعىن كۇزەت كەمەسىن ورالدىقتار 16 مامىر كۇنى شاعان وزەنىنىڭ جايىققا قۇيار ساعاسىنداعى ارنايى ايلاقتا سالتاناتپەن شىعارىپ سالدى. جاڭا كەمە تەڭىزدە ەل شەكاراسىن كۇزەتىپ قانا قويماي, كونتراباندانىڭ جولى كەسەدى, زاڭسىز بالىق اۋلاۋشىلاردى قۇرىقتايدى. كورابلدىڭ ۇزىندىعى – 27,3 مەتر, ەنى – 6,62 مەتر. زاماناۋي بايلانىس جانە ناۆيگاتسيا قوندىرعىلارىمەن جابدىقتالعان كەمە ساعاتىنا 38-40 ۋزەل, بۇل شامامەن 70-75 كم/ساعاتقا تەڭ, بۇل جىلدامدىعى جوعارى ساناتتاعى سۋ كولىگى دەگەن ءسوز. ءبىر ساپارىندا 600 ميلگە دەيىن, ياعني 1 مىڭ شاقىرىمعا دەيىن جۇرە الاتىن كەمە 15 ادامعا ارنالعان.
- بۇل ءىس-شارانىڭ ءمانى ەرەكشە, سەبەبى مەملەكەت باسشىسى قاسىم-جومارت توقاەۆ 2025 جىلدى قازاقستاندا جۇمىسشى ماماندىقتار جىلى دەپ جاريالاعانى ونىڭ ماڭىزىن ارتتىرا تۇسەدى. جاڭا كەمەنىڭ ىسكە قوسىلۋى – ءبىلىمى مەن شەبەرلىگى ەلدىڭ قورعانىس الەۋەتىنىڭ نەگىزى سانالاتىن ينجەنەرلەردىڭ, ديزاينەرلەردىڭ, كەمە جاساۋشىلاردىڭ جانە جۇمىسشىلاردىڭ جۇمىسىنىڭ ايقىن ناتيجەسى. بۇل جوبا قاۋىپسىزدىكتى قامتاماسىز ەتۋگە قوسقان ۇلەس قانا ەمەس, سونىمەن قاتار مەملەكەتتىڭ دامۋىنداعى جۇمىسشى ماماندىق يەلەرىنىڭ ءرولىن مويىنداۋدىڭ ايقىن ۇلگىسىنە اينالماق. بۇل كەمە مەملەكەتتىك شەكارامىزدى كۇزەتۋگە جانە قورعاۋعا ارنالعان. وسىنىڭ ارقاسىندا زاڭسىز كەمە قاتىناسىنا, كونتراباندالىق وپەراتسيالارعا, رۇقساتسىز بالىق اۋلاۋ, شەكارانى زاڭسىز كەسىپ ءوتۋ جانە باسقا قاۋىپ-قاتەرگە توسقاۋىل قويىلادى, - دەدى باتىس قازاقستان وبلىسىنىڭ اكىمى ناريمان تورەعاليەۆ.
«سەمەي» كەمەسى – وتاندىق مامانداردىڭ كوپ جىلعى ەڭبەگىنىڭ تاعى ءبىر جەمىسى دەيدى ماماندار. 1941 جىلى نەگىزى قالانعان ورالداعى «زەنيت» زاۋىتى ەلىمىزدىڭ قورعانىس ونەركاسىبى كەشەنىندەگى نەگىزگى كاسىپورىننىڭ ءبىرى. تاۋەلسىزدىك جىلدارى مەملەكەتتىك قورعانىس تاپسىرىستارىن تۇراقتى ورىنداپ, جوعارى تەحنولوگيالىق قايىقتار مەن «سۇڭقار», «بۇركىت», «بارىس» جانە ت.ب ارنايى ماقساتتاعى كەمەلەردى شىعارعان زاۋىت ۇجىمى وسى «سەمەي» كەمەسىن 2 جىلدان اسا ۋاقىت ىشىندە قۇراستىرىپ شىققان.
- بۇگىنگى سالتاناتتى ءساتتى پايدالانا وتىرىپ, كەمەنى جوبالاۋعا, قۇراستىرۋعا جانە جابدىقتاۋعا اتسالىسقان بارلىق قىزمەتكەرگە شىن جۇرەكتەن العىسىمدى بىلدىرگىم كەلەدى. سىزدەردىڭ كاسىبي شەبەرلىگىڭىزدىڭ, ادال ەڭبەگىڭىز بەن جوعارى جاۋاپكەرشىلىگىڭىزدىڭ ارقاسىندا بۇگىن ءبىز ەلىمىزدىڭ يگىلىگىنە قىزمەت ەتەتىن تاعى ءبىر كەمەنى سۋعا جىبەرىپ وتىرمىز, - دەدى ناريمان تورەعالي ۇلى.
جاڭا كەمەنىڭ كاپيتانى اعا لەيتەنانت جەتكەرگەن ايداروۆ 2022 جىلى رەسەيدىڭ بالتىق اسكەري-تەڭىز ينستيتۋتىن ءبىتىرىپ, ماڭعىستاۋدا شەكارا قىزمەتىندە شىڭدالعان سارباز ەكەن.
- بۇل – شاپشاڭ قيمىلدى, سۋ جاڭا تەحنيكالىق قۇرالدارمەن جابدىقتالعان كەمە. مۇندا «ادۋنوك» دەپ اتالاتىن قاشىقتان باسقارىلاتىن اۆتوماتتى زەڭبىرەك ورناتىلعان. كەمە بورتىندا شاعىن كاتەرىمىز دە بار, بۇل تەڭىزدىڭ تايىز جەرىندە قولدانۋعا كەرەك, - دەيدى كاپيتان.
«زەنيت» زاۋىتىنىڭ باس ديرەكتورى قىدىرجان مۇقانوۆ بۇعان دەيىن «ايبار» جوباسىنا جاتاتىن ەكى كەمە جاسالعانىن, ولار تەڭىزدەگى قىزمەتىن ابىرويمەن اتقارىپ جۇرگەنىن ايتادى. «سەمەي» كەمەسىنىڭ ەرەكشەلىگى – كەمە ەكيپاجى 10 كۇنگە دەيىن ەش جەرگە سوقپاي جۇرە الادى. 6 بالدىق داۋىلعا شىداس بەرەدى. زاۋىت ديرەكتورى قازىرگى تاڭدا سۋداعى سىيىمدىلىعى 750 توننالىق كوپبەيىندى كەمە جاسالىپ جاتقانىن حابارلادى. ول كەلەسى جىلى پايدالانۋعا بەرىلمەك.
باتىس قازاقستان وبلىسى
