ءىس-شارادا ورتالىق سايلاۋ كوميسسياسىنىڭ توراعاسى نۇرلان ءابدىروۆ مەملەكەت باسشىسى ق.توقاەۆتىڭ ءىس-شاراعا قاتىسۋشىلارعا ارناعان قۇتتىقتاۋ حاتىن وقىدى. پرەزيدەنت حاتىندا تمۇ X سامميتىندە ۇسىنعان كونسۋلتاتيۆتىك پلاتفورمانى قۇرۋ تۋرالى باستامانى قولداعان باۋىرلاس ەلدەرگە العىس ءبىلدىرىپ, بۇل باستاما ۇيىمنىڭ مۇشە مەملەكەتتەرىنىڭ سايلاۋ جۇيەلەرىن جەتىلدىرۋگە ىقپال ەتەتىنىنە سەنىم بىلدىرەتىنى ايتىلدى.
«بۇكىل تۇركى الەمىنىڭ رۋحاني استاناسى سانالاتىن تۇركىستان قالاسىندا كونسۋلتاتيۆتىك پلاتفورمانىڭ ەرەجەسىنە قول قويىلادى. مۇنىڭ سيمۆولدىق ءمانى زور. سونداي-اق ماسەلەنىڭ ماڭىزدىلىعىن ەسكەرە وتىرىپ, مەن «تۇركى الەمى: سايلاۋ جۇيەلەرىنىڭ ءداستۇرى, تاجىريبەسى جانە دامۋ بولاشاعى» اتتى عىلىمي-تاجىريبەلىك كونفەرەنتسيا وتكىزۋ تۋرالى باستامانى قولدايمىن. بۇل شارالار تاريحى ورتاق, تامىرى ءبىر باۋىرلاس ەلدەردىڭ قارىم-قاتىناسىن ودان ءارى تەرەڭدەتە تۇسەرى ءسوزسىز», دەي كەلە مەملەكەت باسشىسى كونسۋلتاتيۆتىك پلاتفورماعا ناتيجەلى جۇمىس تىلەيتىنىن اتاپ وتكەن.
ءىس-شارا بارىسىندا وسك توراعاسى اشىق دەرەكتەرگە سايكەس تمۇ مۇشە مەملەكەتتەردە 96,5 ملن-نان استام سايلاۋشى بار ەكەنىن, كەيىنگى ەكى جىلدا وسى ەلدەردە ءتۇرلى دەڭگەيدەگى 15 سايلاۋ وتكەنىنە توقتالدى. تمۇ مۇشە-مەملەكەتتەر ورتالىق سايلاۋ ورگاندارىنىڭ باسشىلارى – ازەربايجاننان مازاحير پاناحوۆ, قىرعىزستاننان تىنچتىك شاينازاروۆ, تۇركيادان احمەت يەنەر, وزبەكستاننان زاينيددين نيزامحودجاەۆ ءسوز سويلەپ, ماجارستاننىڭ ۇلتتىق سايلاۋ بيۋروسىنىڭ باسشىسى اتتيلا نادتىڭ قۇتتىقتاۋ حاتى وقىلدى. سونىمەن قاتار تمۇ باس حاتشىسى كۋبانىچبەك ومۋراليەۆ, سايلاۋ ورگاندارىنىڭ دۇنيەجۇزىلىك قاۋىمداستىعىنىڭ باس حاتشىسى ين-شيك چجانگ, تۇركى مەملەكەتتەرىنىڭ پارلامەنتتىك اسسامبلەياسىنىڭ باس حاتشىسى مەحمەت سۋرەيا ەر, تۇركى اكادەمياسىنىڭ ۆيتسە-پرەزيدەنتى اسحات كەسىكباەۆ ءسوز سويلەدى.
تمۇ مۇشە مەملەكەتتەردىڭ ورتالىق سايلاۋ ورگاندارىنىڭ باسشىلارى قول قويعان وسو كپ ەرەجەسىندە مىناداي شەشىمدەر بار: سايلاۋ راسىمدەرى بويىنشا ديالوگ, اقپارات, ۇزدىك تاجىريبەلەرمەن الماسۋ ءۇشىن پلاتفورما قۇرادى; سايلاۋ ورگاندارى اراسىنداعى ىنتىماقتاستىقتى دامىتادى; سايلاۋ ۇدەرىستەرىنە يننوۆاتسيالىق تاسىلدەر مەن تەحنولوگيالاردى ەنگىزەدى; ەلەكتورالدى ءىس-شارالاردى ۇيىمداستىرۋدا تمۇ ەلدەرىنىڭ وسو قىزمەتىن ۇيلەستىرەدى; سايلاۋ ورگاندارى اراسىندا ساراپشىلارمەن جانە وقۋ-ادىستەمەلىك ماتەريالدارمەن الماسۋعا جاردەمدەسەدى; سايلاۋ بايقاۋىنا قاتىسىپ, تاجىريبە جيناقتاۋعا جانە سايلاۋ جۇيەسىن دامىتۋعا ىقپال ەتەدى.
ايتۋلى ءىس-شارا عىلىم جانە جوعارى ءبىلىم مينيسترلىگىمەن بىرلەسە وتكىزىلگەن «تۇركى الەمى: سايلاۋ جۇيەلەرىنىڭ ءداستۇرى, تاجىريبەسى جانە دامۋ بولاشاعى» اتتى حالىقارالىق عىلىمي-تاجىريبەلىك كونفەرەنتسياعا ۇلاستى.
تۇركىستان
