فوتو: اشىق دەرەككوز
اتالعان باستاما قازاقستان پرەزيدەنتى قاسىم-جومارت توقاەۆتىڭ بيىلعى اقپاندا يوردانياعا جاساعان رەسمي ساپارى بارىسىندا قول جەتكىزىلگەن ۋاعدالاستىقتاردىڭ جالعاسى. ساپار قورىتىندىسىندا يوردانيالىق تاراپ قازاقستانمەن اۋە قاتىناسىن ورناتۋعا مۇددەلىلىك بىلدىرگەن بولاتىن.
كەزدەسۋ اياسىندا تاراپتار اۋە قوزعالىسىن قۇقىقتىق تۇرعىدا رەتتەيتىن كەلىسىمگە قول قويۋ مۇمكىندىگىن قاراستىردى. حامزا ءال-وماري مىرزا «Royal Jordanian» ۇلتتىق اۋە كومپانياسى 2026 جىلدىڭ ماۋسىم ايىنان باستاپ قازاقستانعا اپتاسىنا ەكى رەت تۇراقتى رەيس ورىنداۋدى جوسپارلاپ وتىرعانىن جەتكىزدى. ءوز كەزەگىندە قازاقستاندىق تاراپ قولدانىستاعى حالىقارالىق كەلىسىمدەر شەڭبەرىندە قاجەتتى راسىمدەر مەن ينفراقۇرىلىمدىق قولداۋدى كورسەتۋگە دايىن ەكەنىن مالىمدەدى.
سونداي-اق كەزدەسۋ بارىسىندا تەڭىز قاتىناسى سالاسىندا دا ءوزارا ىنتىماقتاستىق ماسەلەلەرى ءسوز بولدى. اتاپ ايتقاندا, قوس تاراپ ەلدەر اراسىندا تەڭىز كولىگى ەكيپاجدارىنىڭ ديپلومدارىن ءوزارا تانۋ تۋرالى كەلىسىمگە قول قويۋ مەرزىمدەرىن ناقتىلاپ, ونى جۇزەگە اسىرۋ جولدارىن پىسىقتادى.
بۇل كەزدەسۋ قازاقستان مەن يوردانيا اراسىنداعى كولىك جانە لوگيستيكا سالاسىنداعى ارىپتەستىكتى تەرەڭدەتىپ, قوس ەل اراسىنداعى ەكونوميكالىق جانە مادەني بايلانىستاردى ودان ءارى نىعايتۋعا نەگىز بولماق.
