سۋرەت: gov.kz
بۇگىندە ەلىمىزدە ۆولونتەرلىك قىزمەت قارقىندى دامىپ, ءتۇرلى سالانى قامتىپ وتىر. مادەنيەت جانە اقپارات مينيسترلىگى بەرگەن دەرەككە سۇيەنسەك, رەسپۋبليكادا 755 ۆولونتەرلىك ۇيىم تىركەلگەن. ال ەرىكتىلىكپەن اينالىساتىن وتانداستارىمىزدىڭ جالپى سانى 280 مىڭعا جۋىقتايدى.
بىزدەگى ۆولونتەرلىك قىزمەتتىڭ باستى باعىتتارىنا – قارتتار مەن جالعىزباستى جاندارعا كومەك كورسەتۋ, ومىرلىك قيىن جاعدايداعى ازاماتتاردى قولداۋ, ەكولوگيالىق ۆولونتەرلىك پەن توتەنشە جاعدايلاردىڭ زارداپتارىن جويۋعا قاتىسۋ جاتادى.
سونداي-اق ەلىمىز حالىقارالىق دەڭگەيدە دە ۆولونتەرلىك قاۋىمداستىقتار اراسىنداعى تابىستى ينستيتۋتسيونالدىق ارىپتەستىكتىڭ ۇلگىسىن كورسەتىپ كەلەدى. ۆولونتەرلىك قىزمەتتىڭ قۇقىقتىق بازاسى دا تولىق قالىپتاسقان. ماسەلەن, «ۆولونتەرلىك قىزمەت تۋرالى» زاڭ قولدانىستا, ال 2026 جىلعا دەيىنگى ۆولونتەرلىكتى دامىتۋ جونىندەگى جول كارتاسى كەزەڭ-كەزەڭىمەن جۇزەگە اسىرىلىپ جاتىر.
ەسكە سالساق, مەملەكەت باسشىسى قاسىم-جومارت توقاەۆتىڭ باستاماسىمەن بۇۇ باس اسسامبلەياسى 2026 جىلدى تۇراقتى دامۋ ماقساتتارىنداعى «حالىقارالىق ۆولونتەرلەر جىلى» دەپ جاريالاعان ەدى. وسىعان سايكەس جيىن بارىسىندا ۆولونتەرلىك قوزعالىستى دامىتۋ, ازاماتتىق بەلسەندىلىكتى ارتتىرۋعا باعىتتالعان نەگىزگى باعىتتار, باستامالار مەن جوسپارلانعان ءىس-شارالار ءسوز بولدى.
كەزدەسۋگە بەلسەندى جاستار, مەملەكەتتىك ورگانداردىڭ قىزمەتكەرلەرى دە قاتىسىپ, ولارعا رەسپۋبليكا كولەمىندە ۆولونتەرلىك قىزمەتتى ۇيلەستىرۋ ماقساتىندا اشىلعان «Qazvolunteer.kz» ونلاين پلاتفورماسى تانىستىرىلدى.
ايتا كەتسەك, پلاتفورما ۆولونتەرلەر مەن ۇيىمداردى بىرىكتىرىپ, جۇزەگە اسىرىلىپ جاتقان جوبالار مەن قاتىسۋ مۇمكىندىكتەرى جونىندە اقپارات ۇسىنادى. بۇدان بولەك, ەلىمىز بويىنشا ۆولونتەرلىك باستامالاردى قولداۋ مەن مونيتورينگ جۇرگىزۋدى قامتاماسىز ەتەتىن ۇلتتىق فرونت-وفيس قىزمەت اتقارادى.
