ازامات س.اسفەندياروۆ اتىنداعى مەديتسينا ۋنيۆەرسيتەتىنىڭ تۇلەگى. استاناعا كەلگەن سوڭ بىردەن №8 قالالىق ەمحاناعا ۋرولوگ بولىپ جۇمىسقا ورنالاسقان. سودان بەرى ۇجىمدا تابان اۋدارماي ەڭبەك ەتىپ كەلەدى. سىرقاتتار دا دارىگەرىن جاقسى تانيدى. قابىلداۋعا 8.00-دەن باستاپ 14.00-گە دەيىن كەلەدى. سەبەبى, دارىگەر تۇستەن كەيىن جەكە ەمحانادا جۇمىس ىستەيدى. استانا قالاسىنىڭ ەڭبەكقور دارىگەرلەرىنە مۇنداي جۇمىس رەجىمى تاڭسىق ەمەس. سۇرانىس بولسا, بوس ۋاقىتقا جۇمىس تابىلسا, دارىگەرلەر قاراپ جاتپايدى. جۇمىس رەجىمىنىڭ تىعىزدىعىنا قاراماستان, ازامات بۇرىننان تانىس بولىپ قالعان اۋرۋ-سىرقاۋلارمەن تەلەفون ارقىلى دا بايلانىسىپ, كەڭەسىن ايتىپ وتىرۋدان جالىقپايدى.
ا.جۇماشەۆ قازىر ۋرولوگيالىق ماسەلەلەرمەن كەلەتىن پاتسيەنتتەردىڭ كوبەيگەنىن ايتادى. اۋرۋلاردىڭ كوبى گورمون جەتىسپەۋىنەن باستالادى. قيىنى, كەيدە تالداۋلاردا جاعداي قالىپتى دەپ كورسەتكەنىمەن, شىن مانىندە, احۋال جاقسى بولا بەرمەۋى دە مۇمكىن. ايتالىق, ءسىز سپورتپەن شۇعىلدانىپ, بەلسەندى ءومىر سۇرەسىز دەلىك. ودان كەيىن جۇمىسقا بارىپ, جۇمىستان سوڭ تاعى بىرەر جەرگە اياڭداپ, ءتۇن جارىمعا دەيىن جۇرسەڭىز سىزگە گورمون جەتپەيدى, شارشايسىز. مىسالى, قۋىق استى بەزىنىڭ اۋرۋىنا ينفەكتسيا جۇقتىرىپ, سۋىق تيگىزگەنگە قاراعاندا گورموننىڭ جەتىسپەۋىنەن شالدىعاتىندار كوپ. دارىگەرلەر اۋرۋ-سىرقاۋدىڭ بارلىق ءتۇرى ءوزىمىزدىڭ ءومىر ءسۇرۋ قاعيدامىزعا, تاماقتانۋ تارتىبىمىزگە, سالاماتتى ءومىر سالتىن ۇستانۋىمىزعا بايلانىستى ەكەنىن ايتادى. ونىڭ ىشىندە تەستوستەرون تومەندەۋى بار. ۋرولوگيالىق اۋرۋلار جاستاردا كوبىنە وسى تەستوستەرون جەتىسپەگەننەن پايدا بولادى.
– سالاماتتى ءومىر سالتى, ءتارتىپ, جىگەر, كوڭىل كۇي, سەرگەكتىك تاعىسىن-تاعى تەستوستەرونعا اسەر ەتەتىن نارسە كوپ. بۇل – جاھاندىق ماسەلە. ەمدەۋگە كەلگەندە دۇرىس قادام كەرەك. قىمبات قۇرالداردىڭ مۇمكىندىگىن پايدالانعان دۇرىس. ءالى دە بولسا سالانىڭ اقساپ تۇرعان تۇستارىن جەتىلدىرۋ كەرەك. قان قۇرامىنداعى گورمونداردى ءدال انىقتاۋ قاجەت. ۋرولوگيادا دەنساۋلىق جاعدايىن ءدال انىقتايتىن ءادىس-تاسىلدەردى قولدانسا, جاعداي ءبىرشاما جاقسارادى. ءبىز ءوز دەڭگەيىمىزدە, مۇمكىندىگىمىزگە قاراي مەديتسينالىق كومەك كورسەتەمىز. ءوزىم كۇندەلىكتى 12-15 ادام قابىلداپ ۇلگەرەمىن, – دەيدى ا.جۇماشەۆ.
تالاي جىلدان بەرى ءبىر ەمحانادا ناۋقاستاردى قابىلداپ, ءتيىستى ەمشاراسىن ۇسىنىپ جۇرگەن ازامات جۇماشەۆتى ارنايى ىزدەپ كەلەتىندەر كوپ. بىلتىر ۋرولوگ دارىگەر «سالاماتتى قازاقستان» مەديتسينالىق پويىزىنىڭ قۇرامىندا بولىپ, اۋىل-ايماقتاعى اعايىنعا مەديتسينالىق كومەك كورسەتتى. شالعايدا تۇراتىن, مەديتسينالىق تەكسەرۋدەن وتپەگەن تۇرعىنداردىڭ العىسىن الدى. سەگىز اي ساپاردا وڭىرلەردىڭ احۋالىن كورىپ-ءبىلىپ, زەردەلەپ كەلىپ, جىل باسىندا قالالىق ەمحاناداعى جۇمىسىنا قايتا كىرىستى. ەڭبەككە ادال, سىرقاتتارعا جاناشىر ا.جۇماشەۆ مەديتسينالىق پويىزدا ءجۇرىپ جيعان تاجىريبەسى الداعى جۇمىسىنا ازىق بولاتىنىنا سەنىمدى.
