قۇنى 26,2 ملرد تەڭگە بولاتىن جوبانى ەكى كەزەڭدە جۇزەگە اسىرۋ جوسپارلانىپ, بىلتىر باستاماسى رەتىندە 187 كوپقاباتتى تۇرعىن ۇيگە ىستىق سۋ جەتكىزۋ قولعا الىندى. بۇعان ۇكىمەت رەزەرۆىنەن 11 ملرد تەڭگەدەن استام قارجى قارالدى. اۋەلگىدە سول جاق جاعالاۋداعى 5 كوپقاباتتى ءۇي مەن «استانا-1» شاعىن اۋدانىنداعى 13 كوپقاباتتى ۇيگە, س.بەيبارىس كوشەسىنىڭ بويىنداعى 9 جانە تاسبوگەت كەنتىندەگى 5 ۇيگە ىستىق سۋ بەرىلدى. سونداي-اق ودەجدا, اۆتوۆوكزال, ۋنيۆەرسام, شۇعىلا, سىرداريا شاعىن اۋدانى تۇرعىندارىنىڭ باسپانالارىنا دا ىستىق سۋ جەتتى. وتىز جىلدان بەرى سۋ جىلىتقىش پايدالانىپ وتىرعان ۇيلەرگە قۇبىر تارتىلىپ, پاتەرلەرگە ەسەپتەگىش قۇرالدارى ورناتىلدى. ناۋرىز ايىنىڭ باسىندا ىستىق سۋعا قول جەتكىزگەن كوپقاباتتى ءۇي سانى 104-كە جەتتى.
ماماندار ەسەبىنشە, سۋ ىسىتقىش قوندىرعى ارقىلى 50 ليتر سۋدى ىسىتۋعا ورتا ەسەپپەن كۇنىنە 2 كۆت كەتەدى ەكەن. سوندا ءبىر ايدا ەلەكترلى ىسىتقىشقا شامامەن 1 565,6 تەڭگە تولەيدى. جىلۋ ەنەرگياسى ارقىلى كەلەتىن ىستىق سۋدىڭ 1 تەكشە مەترى – 172,03 تەڭگە. جالپى ورتالىقتاندىرىلعان ىستىق سۋدىڭ تيىمدىلىگى 66,2% بولىپ وتىر. ونىڭ سىرتىندا, كوپقاباتتى ۇيلەردە ەلەكتر نەمەسە گازبەن جىلىتۋ قۇرىلعىلارىن پايدالانۋدىڭ اقىرى توتەنشە جاعدايلارعا دا اكەلۋى مۇمكىن.
ىستىق سۋ جەلىسىنە ساپاسى جوعارى ماتەريالدار, تانىمال ەۋروپالىق وندىرۋشىلەردىڭ جابدىقتارى قولدانىلادى. «بۇل ىستىق سۋ جۇيەسىنىڭ سەنىمدى, ۇزدىكسىز جۇمىسىن قامتاماسىز ەتەدى», دەيدى «بايقوڭىر» الەۋمەتتىك-كاسىپكەرلىك كورپوراتسياسى باسقارما توراعاسىنىڭ كەڭەسشىسى مۇحيتجان كارىمباەۆ.
جالپى, قالادا ىستىق سۋ جۇيەسى 1986–1987 جىلدارى جۇمىسىن توقتاتىپتى. سودان بەرگى ۋاقىت ىشىندە اركىم پاتەرىنە جىلىتقىش ورناتىپ, امالداپ كەلدى. بۇل ماسەلەنى شەشۋ ماقساتىندا ءبىراز جىل بۇرىن قاناتقاقتى جوبا دا قولعا الىنعان بولاتىن. بىراق ونداعان جىل پايدالانىلماعاندىقتان ابدەن توزعان ينجەنەرلىك جەلىلەردى جاڭارتۋدىڭ جولى تابىلماي, ول دا اياقسىز قالىپ ەدى. سوندىقتان دا مەملەكەت باسشىسىنىڭ قولداۋىمەن بىلتىردان باستالىپ, جۇرت ناتيجەسىن كورە باستاعان بۇل باستامانى ەل ۇزاق جىل كۇتكەن يگىلىك دەسەك, ارتىق بولماس.
قازىر بەرىلگەن تاپسىرمالاردىڭ ورىندالۋى قاتاڭ باقىلاۋعا الىنىپ, جاۋاپتى باسشىلارعا مەردىگەر مەكەمەلەرمەن كۇندەلىكتى بايلانىستا بولۋ مىندەتتەلدى. بيىل جوسپار بويىنشا 236 تۇرعىن ءۇي سۋ جۇيەسىنە قوسىلۋى كەرەك. ءبىرىنشى كەزەكتە اتقارىلاتىن جۇمىستارعا جاقىندا وبلىس بيۋدجەتىنە ۇكىمەت رەزەرۆىنەن 5 ملرد تەڭگە ءبولىندى. وسىلايشا, قىزىلوردا قالاسىنداعى 423 كوپقاباتتى تۇرعىن ءۇيى ورتالىقتاندىرىلعان ىستىق سۋمەن جابدىقتاۋ جۇيەسىنە قوسىلاتىن كۇن جاقىنداپ كەلەدى.
قىزىلوردا
