فوتو: دەنساۋلىق ساقتاۋ مينيسترلىگىنەن
اپتالىق حالىقتىڭ رەپرودۋكتيۆتى دەنساۋلىق, ينفەكتسيالىق اۋرۋلاردىڭ پروفيلاكتيكاسى, وتباسىن جوسپارلاۋ, اتا-انا جاۋاپكەرشىلىگى جونىندە ءبىلىمىن ارتتىرۋعا باعىتتالعان. جۇمىس بارىسىندا جاستارعا, رەپرودۋكتيۆتى جاستاعى ايەلدەر مەن ەرلەرگە, اتا-انالارعا باسىمدىق بەرىلەدى.
بۇل كۇندەرى ەلىمىزدەگى ەمحانالار مەن جاستار دەنساۋلىعى ورتالىقتارىندا اشىق ەسىك كۇندەرى وتەدى. تۇرعىندار, اسىرەسە جاستار جاعى مامانداردان تەگىن كەڭەس الادى. جاسوسپىرىمدەر, جاستار, اتا-انالاردىڭ قاتىسۋىمەن وتباسىن جوسپارلاۋ, جىنىستىق جولمەن بەرىلەتىن ينفەكتسيالاردىڭ, ادام پاپيللوماسى ۆيرۋسىنىڭ پروفيلاكتيكاسى تاقىرىبىندا ءدارىس, سەمينار مەن شەبەرلىك ساباق وتەدى. مەكتەپ, كوللەدج, جوعارى وقۋ ورىندارىندا ارنايى ساباقتار مەن سىنىپتان تىس ءىس-شارالار ۇيىمداستىرىلادى. جاسوسپىرىمدەردىڭ رەپرودۋكتيۆتىك دەنساۋلىعىن ساقتاۋ ماسەلەلەرىنە اتا-انالاردى تارتۋ جونىندە جۇمىس جۇرگىزىلەدى.
اپتالىق بارىسىندا ءاربىر كۇن ناقتى ءبىر تاقىرىپقا ارنالادى. مىسالى, 12 مامىردا – وتباسىن جوسپارلاۋ, 13 مامىردا – ايەلدەر دەنساۋلىعى, 14 مامىردا – ەرلەر دەنساۋلىعى, 15 مامىردا – جاستاردىڭ رەپرودۋكتيۆتى دەنساۋلىعى, جىنىستىق جولمەن بەرىلەتىن ينفەكتسياعا قارسى ءىس-قيمىل, 16 مامىردا – ادام پاپيللوماسى ۆيرۋسىنا قارسى ءىس-شارالارعا باسىمدىق بەرىلەدى.
اسىرەسە جوبا شەڭبەرىندە جاسوسپىرىمدەر مەن جاستارعا كوپ كوڭىل بولىنەدى. وسى رەتتە دەنساۋلىق ساقتاۋ مينيسترلىگى حالىقتىڭ رەپرودۋكتيۆتى دەنساۋلىعىن جاقسارتۋعا باعىتتالعان بىرنەشە باعدارلاما مەن جوبانى ۇيلەستىرىپ جاتقانىن ايتا كەتكەن ءجون. قازىر وڭىرلەردە 103 جاستار دەنساۋلىعى ورتالىعى جۇمىس ىستەيدى. 2026 جىلعا دەيىن بالالار گينەكولوگياسىن دامىتۋ جونىندەگى جول كارتاسى بەكىتىلگەن. بالالار گينەكولوگتەرىن قايتا دايارلاۋ جونىندە بىلىكتىلىك ارتتىرۋ كۋرستارى وتكىزىلىپ جاتىر. اۋىلداردا گينەكولوگيالىق اۋرۋلارى بار جاسوسپىرىمدەرگە قاجەتتى مەديتسينالىق كومەك كورسەتۋ باعىتى ازىرلەنگەن.
بيىلدان باستاپ ىسكە اسىپ جاتقان «انالار ساۋلىعى» باعدارلاماسى پرەگراۆيدارلىق دايارلىقتى قامتيدى. بۇل – فەرتيلدىك جاستاعى ايەلدەردىڭ دەنساۋلىعىن باعالاپ, جۇكتىلىككە, دەنى ساۋ بالانى دۇنيەگە اكەلۋگە دايارلاۋعا ارنالعان ءىس-شارالار جيىنتىعى. يۋنفپا دەرەكتەرى بويىنشا, ەلىمىزدە جاسوسپىرىمدەردىڭ كوبى جىنىستىق ءومىردى ەرتە باستاۋ قاۋپى مەن ونىڭ پروفيلاكتيكالىق ادىستەرى تۋرالى جەتكىلىكتى اقپارات الا المايدى. 15-19 جاس ارالىعىنداعى ازاماتتاردىڭ 60%-دان استامى جىنىستىق جولمەن بەرىلەتىن ينفەكتسيا مەن جوسپارلانباعان جۇكتىلىكتەن قالاي قورعانۋ كەرەگىن بىلمەيدى. زەرتتەۋ بويىنشا, ايتۆ-نىڭ بەرىلۋ جولدارىن تەك 9% ءجاسوسپىرىم عانا بىلەتىنى انىقتالعان.
