استانادا ەسىرتكى تاراتۋمەن اينالىسقان توپتىڭ كوزى جويىلدى

استانا. 2 تامىز. استانادا ەسىرتكى بيزنەسىنە قارسى كۇرەس دەپارتامەنتىنىڭ قىزمەتكەرلەرى ەسىرتكى تاراتۋمەن اينالىسقان قىلمىستىق توپتىڭ كوزىن جويدى. بۇل تۋرالى ىشكى ىستەر مينيسترلىگىنىڭ ەسىرتكى بيزنەسىنە قارسى كۇرەس دەپارتامەنتىنە سىلتەمە جاساعان today.kz حابارلادى. قىلمىستىق توپتىڭ مۇشەلەرى ەسىرتكىگە اقشانى پاتەر توناۋ ارقىلى تاۋىپ وتىرعان. ۇرلانعان زاتتاردى ساتىپ, اقشاسىنا پەتروپاۆلدان گەروين العان. وزدەرىنىڭ باقىلاۋدا جۇرگەنىن سەزبەگەن ولار ەسىرتكىنى استاناداعى سىبايلاستارىنا جونەلتكەن. ەسىرتكى ساۋداسىمەن اينالىساتىنداردىڭ ءبىرى 29 شىلدەدە استانادا ۇستالدى. 30 جاستاعى سولتۇستىك قازاقستان وبلىسىنىڭ تۇرعىنىن پوليتسەيلەر اباي جانە ءۋاليحانوۆ كوشەلەرىنىڭ قيىلىسىندا قولعا ءتۇسىردى. ءتىنتۋ بارىسىندا ودان 44 گرامم گەروين تابىلدى. مۇنشا گەرويننەن 500 رەتتىك ەسىرتكى دوزاسى دايىندالاتىندىقتان, ول اسا ءىرى مولشەر بولىپ سانالادى. دەپارتامەنتتىڭ حابارلاۋىنشا, جەدەل تەرگەۋ امالدارى بارىسىندا پوليتسەيلەر وسى ىسكە قاتىسى بار تاعى ەكى سىبايلاستى تۇتقىندادى. ولاردىڭ ەكەۋى دە پەتروپاۆل قالاسىنىڭ تۇرعىندارى. ولاردىڭ ءبىرى 1989 جىلى تۋعان, ال ەكىنشىسى 1984 جىلعى. بۇل كۇدىكتىلەردەن پاتەر ەسىكتەرىنىڭ ق ۇلىپتارىن بۇزۋعا ارنالعان ارنايى قۇرال تاركىلەندى. سونىمەن قاتار, سولتۇستىك قازاقستاندا استاناعا «سالەمدەمە» جىبەرگەن توپتىڭ قالعان مۇشەلەرى قولعا ءتۇستى. ولاردان ايعاق رەتىندە 2 گرامم گەروين مەن تاعى باسقا زاتتار تاركىلەندى. ۇستالعانداردىڭ بەسەۋى ءوز قىلمىستارىن مويىنداپ وتىر. بۇگىندە پوليتسەيلەر قولعا تۇسكەندەردىڭ قازاقستاننىڭ ءار وڭىرىندە تىركەلگەن كوپتەگەن پاتەر توناۋ ىستەرىنە قاتىسى بار ەكەنىن انىقتادى. ەلامان قوڭىر. دەرەك: today.kz. سۋرەت: mail.ru.