فوتو: nationalgeographic.kz
بايراقتى باسەكە – باتىرلىق پەن باپتىڭ, ءتوزىم مەن تاعىلىمنىڭ توعىسقان تۇسى. ەرلىك پەن ەلدىك ۇعىمىن قاتار ۇستاپ وتكەن باۋىرجان مومىش ۇلى باستاعان قازاق جاۋىنگەرلەرىنىڭ قاھارماندىق جولىنا دەگەن قۇرمەت بايگەنىڭ مازمۇنىن بيىكتەتە تۇسەدى. ولاردىڭ تۇلعاسى – ۇلى دالانىڭ ەركىن پەرزەنتتەرىنىڭ ايقىن بەينەسى.
تاريحي دەرەكتەردەن بەلگىلى, قازاق جىلقىلارى تەك كۇندەلىكتى كولىك قۇرالى عانا ەمەس, سوعىس پەن بەيبىت كۇندەگى سەرىگى بولعان. باتىر باۋىرجاننىڭ اقبوز اتى تۋرالى تولعاۋى – جىلقى مەن يەسىنىڭ اراسىنداعى جان دۇنيەلىك ۇندەستىكتىڭ ايعاعى.
«مەن اتباپتار قازاقتىڭ بالاسىمىن. جىلقى جۇيرىگىن ايتپاي تانيمىن. ەگەر مەن بىلسەم, بۇل – قازاقتىڭ قارابايىر جىلقىسى. ەركىن دالادا قۇيىنمەن جارىسا, كوسىلە وسكەن, كەڭ تىنىستى جانۋار. كۇن-ءتۇن شاپساڭ تالمايدى, ءوزى اقبوز ەكەن», دەگەن باتىر ءسوزى ەل جادىندا.
سول اقبوزدىڭ تۇقىمى بۇگىنگى بەيبىت كۇندە دە تاقىمعا مىنگەن, تاۋەلسىزدىكتىڭ سيمۆولىنا اينالعان تۇلپارلارعا اينالدى. الدا كەلە جاتقان « ۇلى دالا جورىعى» وسىنداي جۇيرىكتەر مەن شاباندوزداردىڭ ءتوزىمىن سىنايدى.
جالپى ۇزاقتىعى 500 شاقىرىمعا جەتەتىن مارافون-بايگە ەڭ مىقتى تۇلپار مەن ءتوزىمدى شاباندوزدى انىقتاماق. دودانىڭ باعىتى تاريحي ءھام تابيعي تۇرعىدان ماڭىزى زور ولكەلەردى قامتيدى. جارىس الماتى – وسكەمەن تاس جولىنداعى باقاناس كوپىرىنەن باستاۋ الىپ, قوناەۆ قالاسىنىڭ «قارلىعاش» شاعىن اۋدانىندا مارەگە جەتەدى.
بيىلعى جارىسقا ەلىمىزدىڭ 13 كومانداسىمەن بىرگە الىس-جاقىن شەت ەلدەردەن كەلگەن 7 كوماندا – رەسەي, ماجارستان, وڭتۇستىك افريكا, يران, قىرعىزستان سىندى مەملەكەتتەردىڭ وكىلدەرى قاتىسادى. بۇل بايگەنىڭ حالىقارالىق مارتەبەسىنىڭ بيىكتىگىن بىلدىرەدى.
شەتەلدىك مەيماندار ءۇشىن ارنايى ەتنواۋىلدار تىگىلىپ, فوتوزونالار مەن ينتەراكتيۆتى مادەني الاڭدار جۇمىس ىستەمەك. وسىلايشا, « ۇلى دالا جورىعى» تەك سپورتتىق ءىس-شارا عانا ەمەس, ەل مەن ەلدى, مادەنيەت پەن تاريحتى توعىستىراتىن ءىرى حالىقارالىق الاڭعا اينالادى.
دودانى «JORYQ» ات سپورتى فەدەراتسياسى, الماتى وبلىسىنىڭ اكىمدىگى, ۇلتتىق سپورت قاۋىمداستىعى ۇيىمداستىرسا, باستاماعا «AMANAT» پارتياسى مەن «Alageum Electric» كومپانياسى قولداۋ ءبىلدىرىپ وتىر.
