فوتو: ijf.org/judoka
تاتامي شەبەرلەرى كۇنى ەرتەڭ استانادا جالاۋىن جەلبىرەتەتىن دزيۋدودان حالىقارالىق Grand Slam جارىسىندا باق سىنايدى.
ەرەجەگە سايكەس, جارىستى قابىلداۋشى ەل ءار سالماقتا ءتورت سپورتشىعا دەيىن قاتىستىرا الادى. بۇل جاس سپورتشىلاردىڭ تاجىريبە جيناقتاۋىنا جانە IJF الەمدىك رەيتينگىندە ماڭىزدى ۇپايلار ەنشىلەۋىنە جول اشادى.
الەمدىك دزيۋدو ارەناسىنداعى ەڭ جوعارى دارەجەلى جارىستاردىڭ ءبىرى Grand Slam جەڭىمپازدارىنا - 1000, كۇمىس جۇلدەگەرگە — 700, ال قولا مەدال يەگەرىنە 500 رەيتينگتىك ۇپاي بەرىلەدى. بۇل ۇپايلار وليمپيادا جولداماسىنا تالاس جولىنداعى شەشۋشى مانگە يە.
بۇل جارىس حالىقارالىق دزيۋدو فەدەراتسياسىنىڭ كۇنتىزبەسىندەگى الەم چەمپيوناتىنا دەيىنگى سوڭعى ءىرى تۋرنير. ال ەل قۇراماسىنىڭ باپكەرلەرى سپورتشىلاردىڭ دايىندىعىن وسى سىندا ناقتى باعالاي الادى.
حالىقارالىق جارىس جاقسىلىق ۇشكەمپىروۆ اتىنداعى جەكپە-جەك سارايىندا وتەدى. كىرۋ — تەگىن. دزيۋدو دوداسىن Qazsport تەلەارناسى تىكەلەي ەفيردە كورسەتەدى.
ايتا كەتەيىك, تۋرنيرگە پاريج وليمپياداسىنىڭ چەمپيونى, ريو-دە-جانەيرودا وتكەن ءحححى جازعى وليمپياداسىنىڭ كۇمىس جۇلدەگەرى, توكيودا وتكەن ءحححىى جازعى وليمپياداسىنىڭ قولا جۇلدەگەرى ەلدوس سمەتوۆ قوناق رەتىندە قاتىسادى.
