بەلگيادا سوڭعى اپتادا اپتاپ ىستىقتان 410 ادام قايتىس بولدى

استانا. 2 تامىز. بۇگىندە ەۋروپانىڭ كوپتەگەن ەلدەرى اپتاپ ىستىقتان زارداپ شەگىپ وتىر. اسىرەسە, بەلگيا حالقى ءۇشىن تابيعاتتىڭ بۇل قۇبىلىسى ايتارلىقتاي اسەر ەتۋدە. سوڭعى اپتادا وسى ەلدە ىستىق سالدارىنان 410 ادام قايتىس بولدى. بۇل تۋرالى comandir.com حابارلادى. بەلگيانىڭ دەنساۋلىق ساقتاۋ جونىندەگى عىلىمي ينستيتۋتىنىڭ عالىمدارى اۋا تەمپەراتۋراسىنىڭ كۇرت ارتۋى مەن ونداعى وزون مولشەرىنىڭ شامادان تىس كوپ بولۋى وسىنداي قايعىلى جاعدايعا اكەلگەنىن ايتۋدا. ەۋروپادا كەنەتتەن باستالعان ءدال مۇنداي اپتاپ ىستىق سوڭعى رەت 2006 جىلى تىركەلگەن. ول كەزدە ىستىق اۋا تەمپەراتۋراسى ءۇش اپتا بويى ساقتالعان. زەرتتەۋ ورتالىعىنىڭ ماماندارى حابارلاعانداي, قازىرگى تاڭدا بەلگيادان بولەك, فرانتسيا مەن نيدەرلاندىدا دا ىستىق اۋا رايى ساقتالۋدا. عالىمداردىڭ ايتۋىنشا, اپتاپ ىستىق بارلىق جاستاعى ادامدارعا بىردەي كەرى اسەر ەتۋدە. دەگەنمەن, 85 جاستان اسقان قاريالاردىڭ كوپ زارداپ شەككەندەرى بايقالادى. سەبەبى, قازا تاپقانداردىڭ 33 پايىزى وسى بۋىننىڭ وكىلدەرى. ەلامان قوڭىر. دەرەك, سۋرەت: comandir.com.