جوبا 2019 جىلى پرەزيدەنت قاسىم-جومارت توقاەۆتىڭ تاپسىرماسىمەن قولعا الىنعان. عيماراتقا قاراپ كوپجىلدىق ەڭبەكتىڭ, زاماناۋي ينجەنەرلىك, مەديتسينالىق شەشىمدەردىڭ ءساتتى ۇلگىسىن بايقاۋ قيىن ەمەس. نىساننىڭ جالپى اۋماعى – 60 مىڭ شارشى مەتر. 210 توسەكتىك ورىنعا شاقتالعان. بۇدان بولەك ورتالىقتىڭ ەمحاناسىندا كۇنىنە 500 ناۋقاستى ەمىن-ەركىن قابىلداۋعا مۇمكىندىك بار. ورتالىققا مەديتسينالىق جابدىقتاردى «Varian Medical Systems Inc.», «Philips», «Siemens» سىندى الەمنىڭ جەتەكشى وندىرۋشىلەرى جەتكىزگەن. وسىلايشا, ورتالىق ازيادا العاش رەت ساۋلەلىك, راديونۋكليدتىك, پروتوندىق تەراپيانى بىرىكتىرەتىن ءبىرتۇتاس پلاتفورما قۇرىلىپ وتىر.
ورتالىقتىڭ اشىلۋ سالتاناتىنا وراي «قازاقستان رەسپۋبليكاسىنداعى ونكولوگيالىق كومەكتىڭ جاڭا بەلەستەرى. ۇعوو – بولاشاقتىڭ وزىق تەحنولوگيالارى» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى. وعان 29 ەلدەن جەتەكشى ونكولوگتەر, زەرتتەۋشىلەر مەن سالانىڭ بىلىكتى ماماندارى قاتىسىپ, ونكولوگيالىق اۋرۋلاردى دياگنوستيكالاۋ, ەمدەۋ, الدىن الۋ باعىتتارىنداعى زاماناۋي تاسىلدەردى تالقىلادى. كونفەرەنتسيادا پرەزيدەنتتىڭ كومەكشىسى تامارا دۇيسەنوۆا ونكولوگيالىق اۋرۋلاردى ەمدەۋگە ەل دارىگەرلەرى عانا ەمەس, حالىقارالىق قوعامداستىق قۇلشىنىپ وتىرعانىن العا تارتتى.
«ونكولوگيالىق اۋرۋلار دەنساۋلىق ساقتاۋ سالاسىنىڭ باسىمدىق بەرەتىن باعىتتارىنىڭ ءبىرى بولىپ قالا بەرەدى. سەبەبى بۇل – ءبىر ءوڭىردى, ءبىر مەملەكەتتى عانا ەمەس, دۇنيەجۇزى حالىقتارىن الاڭداتىپ وتىرعان ماسەلە. دۇنيەجۇزىندە جىلىنا 19 ميلليوننان استام قاتەرلى ىسىك جاعدايى تىركەلەدى. ونىڭ ىشىندە 10 ميلليوننان استام ادام قايتىس بولادى. ەلىمىزدە بۇگىندە 40 مىڭعا جۋىق پاتسيەنتتەن قاتەرلى ىسىك انىقتالعان. قاراپ وتىرساق, ءبىر مونوقالانىڭ حالقى. ونىڭ ىشىندە 12 مىڭنان استام ادام قايتىس بولادى ەكەن. مۇنى دا سالىستىرمالى تۇردە ءبىر اۋىلدىڭ حالقى دەپ ايتساق بولادى. وسىنى ەسكەرسەك, الەم حالىقتارى ونكولوگيالىق اۋرۋلاردىڭ پروفيلاكتيكاسىن, دياگنوستيكاسىن جەتىلدىرىپ, اۋرۋدى ەمدەپ-جازۋ جونىندە تاجىريبە الماسىپ وتىرۋى كەرەك. بۇگىنگى كونفەرەنتسيا – سالاداعى ۇزدىك تاجىريبەلەردى, جاڭاشىلدىقتى تالقىلاۋدىڭ تاپتىرماس مۇمكىندىك», دەدى ت.دۇيسەنوۆا.
بيولوگيا عىلىمدارىنىڭ دوكتورى, پروفەسسور كۇنسۇلۋ زاكاريا ونكولوگيالىق اۋرۋلاردى ەمدەۋدى ءتۇپ-تامىرىنان, پروفيلاكتيكا, دياگنوستيكادان باستاۋ كەرەگىن ايتتى.
«ونكولوگيالىق ورتالىق – قاراپايىم مەديتسينالىق مەكەمە عانا ەمەس, ەلىمىزدىڭ دەنساۋلىق ساقتاۋ سالاسىمەن قاتار, عىلىمنىڭ دامۋىنا جول اشاتىن ورتالىق. جاڭا عيماراتتىڭ پايدالانۋعا بەرىلۋى – كوپجىلدىق ەڭبەكتىڭ, سالاداعى دارىگەرلەر جەتىستىگىنىڭ ناتيجەسى. ءبىز قازىر ونكولوگيالىق اۋرۋلار كۇردەلەنىپ بارا جاتقان كەزەڭدە ءومىر ءسۇرىپ جاتىرمىز. وسىنى ەسكەرسەك, اۋرۋدى ەمدەۋگە كەلگەندە پروفيلاكتيكا, دياگنوستيكاعا عىلىمي دالەلدەنگەن قاداممەن بارۋ كەرەك. ونكولوگيالىق اۋرۋدى ەمدەپ قانا قويماي, ونكولوگيالىق عىلىمدى تەرەڭ زەرتتەپ, ءتۇسىنۋىمىز كەرەك. جاڭا ورتالىقتىڭ ميسسياسى دا جوعارى عىلىمدى, يننوۆاتسيا مەن وزىق تاجىريبەلەردى قاتەرلى ىسىكپەن كۇرەستە قولدانۋعا باعىتتالادى. مۇندا ەلىمىزدىڭ ەڭ ۇزدىك دەگەن ماماندارى جۇمىس ىستەيدى. اۋرۋدى دياگنوستيكالاۋ مەن ەمدەۋدىڭ جاڭا تاسىلدەرى ەنگىزىلەدى. باستىسى, وسى ورتالىقتا پاتسيەنتتەردىڭ, ولاردىڭ وتباسى مۇشەلەرىنىڭ ءۇمىتى ويانادى», دەيدى كۇنسۇلۋ زاكاريا.
كونفەرەنتسيادان كەيىن ۇلتتىق عىلىمي ونكولوگيا ورتالىعى باسقارما توراعاسىنىڭ مەديتسينالىق قىزمەت جونىندەگى ورىنباسارى ادىلبەك مۇقاجانوۆپەن از-كەم پىكىرلەسۋدىڭ ءساتى ءتۇستى.
«جاڭا عيمارات ونكولوگيالىق اۋرۋلاردى دياگنوستيكالاۋدا, ەمدەۋدە قولدانىلاتىن ەڭ وزىق ۇلگىدەگى تەحنولوگيالارمەن جاراقتاندىرىلعان. مۇندا پاتسيەنتتەر ەلىمىزدىڭ بارلىق ايماعىنداعى ونكولوگيالىق ورتالىقتار مەن جەرگىلىكتى اۋرۋحانالاردان جولدامامەن كەلىپ, تەگىن ەم الادى. 2019 جىلى جاڭا عيماراتتىڭ قۇرىلىسى باستالعان ساتتەن ءبىز دە قول قۋسىرىپ قاراپ وتىرماي, مامان دايارلاۋ ىسىنە باسىمدىق بەردىك. ينجەنەر, مەديتسينالىق فيزيكتەر, حيميكتەر, دياگنوستيكا جاسايتىن ماماندار سىندى قىزمەتكەرلەرىمىز جاپونيا, وڭتۇستىك كورەيا, ءۇندىستان, يزرايل, تۇركيا, اقش, گەرمانيا, يسپانيا ەلدەرىندە تاجىريبە جينادى. ەندى جىلىنا وسى ورتالىقتان 10 مىڭعا جۋىق پاتسيەنت ستاتسيونارلىق كومەك الادى دەپ جوسپارلاپ وتىرمىز. شامامەن 6 مىڭنان استام وپەراتسيا جاسالادى, 3 مىڭنان استام ادام ساۋلەلىك ەم الادى. ەم-شارالاردا جاساندى ينتەللەكتىنىڭ كومەگىن پايدالانا باستايمىز. ناقتىلاپ ايتسام, ساۋلەلىك تەراپيا جاسايتىن «Ethos» دەگەن اپپاراتتا وسى ءتاسىل قولدانىلادى. مۇندا جاساندى ينتەللەكت ساۋلەلىك ەمنىڭ تەرىس اسەرىن ازايتۋعا كومەكتەسەدى», دەدى ادىلبەك قايىربەك ۇلى.
ورتالىقتاعى نەگىزگى تەحنولوگيالار قاتارىندا «Varian ProBeam» نەگىزىندەگى پروتوندىق تەراپيا, پەت/كت, پەت/مرت سىندى قاتەرلى ىسىكتى ەمدەيتىن, دياگنوستيكا جاساۋدا تاپتىرمايتىن سوڭعى ۇلگىدەگى وزىق قۇرالدار بار. جاڭا عيماراتتا حالىقارالىق قاۋىپسىزدىك ستاندارتتارىنا ساي اۋا تازارتۋ, راديواكتيۆتى قالدىقتاردى جويۋ جۇيەلەرىمەن جابدىقتالعان 8 مامانداندىرىلعان پالاتاسى بار راديونۋكليدتى تەراپيا ءبولىمى بولادى. سونىمەن قاتار راديوفارماتسەۆتيكالىق پرەپاراتتاردى وندىرۋگە ارنالعان تسيكلوتروندىق-وندىرىستىك كەشەن ىسكە قوسىلعان. جوسپارعا سايكەس 11 ءتۇرلى پرەپارات شىعارىلادى, ونىڭ جەتەۋى ەلىمىزدە العاش رەت سينتەزدەلەدى. وسى يگىلىكتەردەن كەيىن زاماناۋي ينفراقۇرىلىمى بار ۇلتتىق عىلىمي ونكولوگيا ورتالىعى ورتالىق ازياداعى جەتەكشى كلينيكالىق, عىلىمي, اكادەميالىق ورتالىققا اينالۋدى ماقسات ەتىپ وتىر.
