فوتو: baribar.kz
اۋليەنىڭ ورىس تامىرى
اۋليەنىڭ ياكوۆ (ياشكا) بۋتاكوۆ دەگەن ۇلتى ورىس دوسى بولعان ەكەن. ول ءوزى باياناۋىلدا تۇرعان. ماشەكەڭ سول ورىس تامىرىنىڭ مونشاسىنا ءتۇسىپ شىققان سوڭ ساماۋرىننىڭ شايىن ىشكەندى ۇناتقان ەكەن. سونداي كۇندەردىڭ بىرىندە ياشكا مەن ونىڭ ءۇش قىزى «اللادان ۇل سۇراپ بەرىڭىز» دەپ اۋليەدەن باتا تىلەپتى. ءماشھۇر ءجۇسىپ باتا قايىرىپ, اتقوسشىسى يمانعاليعا سومكەسىنەن قاعاز-قالام الدىرتادى. تۇمار جازىپ بەرىپ, ياشكانىڭ جارى رايساعا موينىنا تاعىپ الۋدى تاپسىرىپتى. اۋليەنىڭ شاراپاتىمەن كەلەر جىلى ۇل بالا دۇنيەگە كەلگەن كورىنەدى.
مايدانعا تۇمارمەن اتتانعان
سول بالانىڭ ەرجەتۋى – ەكىنشى دۇنيەجۇزىلىك سوعىستىڭ باستالعان كەزەڭىنە تۇسپا-تۇس كەلىپ, مايدانعا شاقىرتىلادى. ۇيىنەن سوعىسقا اتتانار مەزەتىندە اناسى تۇمارىن شەشىپ, بالاسىنىڭ موينىنا تاعىپ, «شاماڭ كەلگەنشە موينىننان شەشپە» دەپ تاپسىرعان ەكەن.
جاس جىگىت سوعىستا باياناۋىلدىق جىگىتتەرمەن ۇشىراسىپ قالىپ, ءجون بىلىسكەن كەزدە, قازاق جىگىتتەرى «كىمنىڭ بالاسىسىڭ؟» دەپ سۇراعاندا, ء«ماشھۇر اتانىڭ» دەگەن عوي. «وتىرىك ايتىپ تۇر» دەپ يلانباعان سوڭ, تۇمارىن اشقان. تۇماردا:
«... ەي اللا, سەن مەنى شىن ءماشھۇر دەسەڭ,
مىنا ورىستان ءبىر ۇلىڭدى اياما!», –
دەپ جازىلعان ەكەن. باياناۋىلدىق ورىس جاۋىنگەرىنىڭ ءسوزى شىن ەكەنىنە قازاق جىگىتتەرى سولايشا كوزى جەتىپتى.
سوڭعى حات
سول ورىس جىگىتى ءبىر ۇرىستا قاتتى جارالانىپ, گوسپيتالگە تۇسكەن كەزدە تۇمارىن جوعالتىپ الىپتى. ء(سىرا, مەدبيكەلەر قان تيگەن كيىمدەرىمەن قوسا, تۇماردى دا شەشىپ الىپ, لاقتىرىپ تاستاعان بولۋى كەرەك). تۇمارىن سۇراستىرىپ ىزدەسە, ەشكىم بىلمەيتىن بولىپ شىققان. ۇيىنە جىبەرگەن حاتىندا: ەمدەلىپ بولىپ, قايتادان ۇرىسقا كىرەيىن دەپ جاتقانىن, قازىر «تۇمارى جوق» ەكەنىن, ەندى امان بولۋى ەكىتالاي ەكەنىن جازىپتى. سوڭعى حاتى ەكەن, سودان كەيىن ول جىگىتتەن حابار-وشار مۇلدە بولماپتى.
(فوتو: qarmaqshy-tany)
ەل اراسىندا سول جىگىتتى ءماشھۇر ءجۇسىپ بەرگەن موينىنداعى تۇمارى تالاي رەت اجالدان ساقتاپ قالعان دەگەن اڭىز بار.
