دۋنگا تاعى ءبىر قامالدى الۋدى ويلاستىرۋدا

الەم چەمپيوناتى ءوتىپ جاتقان ستاديونداردىڭ تۇندىگى جەلپىلدەپ تۇر. ولاردىڭ توبەسى اشىق, ءتىل­شى بۇل تەڭەۋدى قايدان تاۋىپ وتىر, دەي بەرىڭىز. دۇنيەنىڭ كوز قۇرتى بولعان ماتچتاردى كورۋ باقىتىنا يە بولعان جانكۇيەرلەردىڭ ستاديونعا سىيماي وتىرعانىن كورىپ وسىلاي دەگىڭ كەلەدى. سۇيىكتى قۇراماسى شيرەك فينالعا وتكەن مەم­لەكەتتەردىڭ فۋتبولدى جانىنداي سۇيەتىن ادامدارى كۇن-ءتۇن دەگەندى ۇمىتقان. ءان ايتىپ, بي بيلەپ ءجۇر. اتا-باباسى ءتىرىلىپ كەلسە دە مۇنداي قۋانباس حالدە. جانكۇيەرلەر عانا ەمەس مەملەكەت باسشىلا­رى­نىڭ دا ءبۇيىرى قىزىپ, ەلىنىڭ ىشكى جانە سىرتقى سايا­ساتىنان ءسال قولى بوساسا فۋتبول جايلى اڭگىمەلەۋگە قۇمار. “ۇلكەن جيىرمالىقتىڭ” سامميتىندە يس­پا­نيا­نىڭ پرەمەر-ءمينيسترى حوسە لۋيس ساپاتەرو باس­قا ەلدەردىڭ كوشباسشىلارىمەن اڭگىمەلەسىپ وتى­­رىپ: ء“بىزدىڭ يسپانيا اقتىق سىنعا دەيىن بارادى”, دەپ­تى. قىزدى-قىزدىمەن: “وتىرىك ايتتى دەمەڭىزدەر, را­­سىمەن سولاي بولادى”, دەگەندى جانە قوسىپ قويىپتى. ءبىر قىزىعى, الەم كۋبوگىن الادى دەمەگەن. كىشىپەيىلدىك ساقتاعانى عوي. ويتكەنى, دودادا برازيليا, ارگەنتينا, گەرمانيا, پورتۋگاليا سەكىلدى جامپوزدار جالت-جۇلت ەتىپ ءجۇر ەمەس پە. ال, مىقتىلاردىڭ ءبىرى گوللاندىقتار سلو­ۆاك­تاردى ەلىنە قايتارىپ جىبەردى. گول سوققاندار روب­بەن 18 (1:0), سنايدەر 84 (2:0), ۆيتەك 90+3 (2:1). سلوۆاكتار ءاۋ باستا مىقتىلاردىڭ ساناتىندا ەمەس ەدى. پاراگۆايدان تاس-تالقان ۇتىلعان قۇرامانىڭ يتاليادان ۇپاي الۋى كوپشىلىكتى شىنىمەن-اق تاڭداندىرعان. گوللاندىقتاردىڭ باپكەرى بەرت ۆان ماۆرەيگ وڭ قاناتتى كۇشەيتىپتى. قورعانىستاعى حاليد بۋلارۋزدىڭ ورنىنا ۆان دەر ءۆيلدى قويىپ, ۆان دەر ۆاارتتىڭ شابۋىلداۋداعى ورنىن جاراقاتتان ايىققان روببەنگە بەردى. ءبىرىنشى تايمدا يەندريمەك پەن گامشيكتىڭ شابۋىلىنا گوللاندىقتاردان سنايدەر مەن كۋيت جاۋاپ بەردى. ويىن وتە كەلە گوللاندىقتاردىڭ باسىمدىلىعى بايقالا باستاعان. روببەن تاماشا وينادى. ونىڭ قاقپاعا باعىتتاعان دوبى ءبىر رەت باعانا تۇبىنەن وتسە, ەندى بىردە يوريس ماتەيسەنگە قاقپا الدىنان ادەمى پاس شىعارىپ بەردى. ءۇش مەتر جەردەن ول ساباز قاتەلەسىپ, تۋرا قاقپاشىعا تەپتى. سول روببەن مەن سنايدەردىڭ سوققان گولى گوللاندىقتاردى شيرەك فينالعا وتكىزدى. ويىننان سوڭ سلوۆاكتاردىڭ باس باپكەرى ۆلا­دي­مير ۆايسس سوڭعى ماچتا ءوزىنىڭ كومانداسىنىڭ گول­لاند سەركەسى ارەن روببەنگە قارسى ويناۋعا ارنايى جاتتىققاندىعىن مويىندادى. ء“بىزدىڭ كوماندا بارىن سالىپ وينادى, ايانعان جەرى جوق, سول ءۇشىن راحمەت, – دەدى ول. “ارەن – فۋتبولدىڭ ناعىز عۇلا­ما­سى. ستارت قۇرامىنان روببەننىڭ اتى-ءجونىن كور­گەندە ەندى گوللاندىقتارعا 50 پايىز كۇش قوسىلادى دەپ ويلاعان ەدىم. مەن دۇرىس پايىمداعان ەكەنمىن”. ۆايسس وسىلاي دەيدى. مىقتىلار ءبىر-ءبىرىنىڭ قادىرىن ءبىلىپ جۇرگەنى جاقسى عوي. ال, برازيليا مەن چيلي قۇرامالارىنىڭ اراسىنداعى تارتىس 3:0 ەسەبىمەن بەس دۇركىن الەم چەمپيونىنىڭ پايداسىنا شەشىلدى. ءاۋ باستا وسىلاي بولارىنا ەشكىم كۇماندانباعانداي ەدى. بىراق, العاشقى وتىز مينوتتەگى برازيليا­لىق­تاردىڭ سۇرەڭسىز ويىنى كوڭىلدە كۇدىك قالدىرعان. كە­رى­سىنشە, چيليلىكتەر دوپتى وزدەرىندە كوبىرەك ۇستاپ, قارسى شابۋىلدار ۇيىمداستىرۋعا تىرىسىپ باقتى. ەكى قۇرامانىڭ اراسىنداعى سوڭعى التى ويىندا چيليلىكتەردىڭ قاقپاسىنا ءۇش دوپتان كەم سوعىلماعانى دا بوگەت بولعان جوق. فرانتسيادا وتكەن الەم چەمپيوناتىنداعى 1/8 فينالدا برازيليا ءچيليدى 4:1 ەسەبىمەن جەڭگەن. چيليلىكتەر وسىنىڭ ءبارىن جادى­لارىنان شىعارىپ تاستاعىسى كەلگەندەي ورشەلەنە العا ۇمتىلدى. ۋمبەرتو سۋازە بوسەجۋر مەن سانچەس­تىڭ قولداۋىمەن برازيليا قاقپاسىن قاراۋىلعا العان. مىقتىنىڭ اتى مىقتى عوي. مايكون ايىپ الا­ڭى­نان دوپ كوتەرگەندە لۋسيو تورەشىنىڭ كوزىن الداپ فۋەن­تيستى العا يتەرىڭكىرەپ جىبەردى. اشىق قالىپ, دوپتى قاپىسىز العان جۋان باسپەن قاقپاعا ۇرعان. 1:0. الەكسيس سانچەس سەرىكتەرىن ەرتىپ قارىمتا قايتارماققا ۇمتىلدى. ورتا جولدان دوپتى قاقشىپ كەتكەن كاكا ەشقايدا الاڭداماستان قاقپاعا قاراي لاپ قويدى. فۋەنتەس ءوزى قورعاپ جۇرگەن ايماعىنان شىعا المادى دا, فابيانو وفسايدتا قالعان جوق. لۋيس فابيانو مۇمكىندىكتى ءمۇلت جىبەرمەدى. 2:0. وسىدان كەيىن برازيليالىقتاردىڭ تىنىسى كەڭىدى. ادەمى كومبيناتسيالار جاساي باستادى. بىراق, چيليلىكتەر قارۋىن تاستاعان جوق. شابۋىلدى كۇشەيتتى. ەكى جاقتىڭ قاقپاعا باعىتتاعان سوققىسى 16:15. برازيليا ءبىر سوققى ارتىق ۇرعان. ايتسە دە, چيليلىكتەر قارسىلاستارىنىڭ تاس قامالىنان وتە الماي, تاۋى شاعىلدى. گونسالەستىڭ ورنىنا شىققان ۆيلديۆيا ويىندى شيراتۋعا تىرىسقانىمەن قورعانىس جاعىن كۇشەيتكەن برازيليالىقتار ايىپ الاڭى ماڭىندا ايقاس سالدى. ويىننىڭ 59 مينوتىندە روميريس قاقپا الدىندا كولدەنەڭدەگەن روبينوعا ادەمى پاس شىعارىپ بەردى. 3:0. چيليلىكتەر ىشقىندى. ۆيلديۆيا, سۋازو ۇرعان دوپتار ءبىرى قاقپا ماڭدايشاسىنان قايتسا, ءبىرى بيىك كەتىپ جاتتى. برازيليالىقتاردىڭ ستاندارتتى جاقسى پايدا­لانۋى مەن قارسى شابۋىلداعى ابجىلدىگى ولارعا ءىرى جەڭىس اكەلدى. جەڭىلگەندى مويىنداي بىلگەن دە ەرلىك. چيلي قۇراماسىنىڭ باس باپكەرى مارسەلو بەلسا: “قارسىلاستارىمىزدىڭ بىزدەن شەبەرلىكتەرى اناعۇرلىم جوعارى ەكەنىن مويىندايمىز. ولاردىڭ بۇدان دا ءىرى ەسەپپەن ۇتۋعا مۇمكىندىكتەرى بولدى. ءبىزدىڭ ويىنشىلار شابۋىلعا شىققاندا ءوز ورىندارىن تاپپاي جاتتى. ال, برازيليالىقتار قورعانىسىمىزدىڭ سەلكەۋ تۇستارىنان بۇزىپ جارىپ وتە بەردى. ولار ءسوز جوق, مىقتى”, – دەدى. دۋنگا ءۇشىن چيلي قۇراماسىمەن وتكىزگەن ويىن تا­ريح دوڭعالاعى كەيىنگە ىسىرىلعان وقيعا. ونىڭ ەندىگى ىنتىزارى – گوللانديادا. “گوللاندىقتار – مىقتى كو­ماندا. ولاردىڭ جەكەلەگەن ويىن­شى­لا­رىنىڭ شە­بەر­لىگى وڭتۇستىكامەريكالىقتاردى ەسكە تۇسىرەدى”, دەيدى ول. قازىر قاي-قايسىسى دا تاقىمىن قىسىپ وتىرعان شاق. باقتيار تايجان.