جوسپار بويىنشا ءوندىرىس ورنى 2025 جىلدىڭ ماۋسىم ايىندا ىسكە قوسىلادى, 80 ادام تۇراقتى جۇمىسپەن قامتىلادى. زاۋىتتىڭ وندىرىستىك قۋاتى جىلىنا 500 دانا ارنايى تەحنيكا شىعارۋعا جەتەدى. قارجىلاندىرۋ كوزى رەتىندە جەكە ينۆەستورلىق قاراجات جانە جەڭىلدەتىلگەن نەسيە تەتىكتەرى قاراستىرىلعان. ءونىمنىڭ 80%-ى ىشكى نارىققا شىقسا, 20%-ى ەكسپورتتالماق.
اۋدانداعى سۋ سورعىش ستانسالار جانە اۋىل شارۋاشىلىعى تەحنيكالارى, مۇناي كومپانيالارىنا ارنالعان تەحنيكا, پوليمەر بۇيىم شىعاراتىن زاۋىتتا 181 ادام جۇمىسپەن قامتىلعان. 1931 جىلى پايدالانۋعا بەرىلگەن ماشينا جاساۋ زاۋىتى بۇگىندە جىلىنا 100 ناسوس شىعارادى. جەر كولەمى – 5,6 گەكتار. اۋدان اكىمى ارمان ءسابيتوۆتىڭ ايتۋىنشا, زاۋىت سنپ-500/10 ءتيپتى سورعى ستانسالارىن شىعاراتىن جەتەكشى ءوندىرىس ورىندارىنىڭ ءبىرى.
الماتى – تەرمەز حالىقارالىق تاس جولىنىڭ جانىندا ورنالاسقان زاۋىتتىڭ ءوز تەمىرجولى جانە اۆتوموبيل كىرەبەرىس جولدارى بار. سونىمەن قاتار ەلەكترمەن جابدىقتاۋعا ارنالعان قوسالقى ستانسالار, اۋىزسۋمەن قامتاماسىز ەتۋ ءۇشىن سۋ قابىلداعىش الاڭ, كارىز جەلىسى, مەحانيكالىق جوندەۋ بازاسى, ساپانى باقىلاۋ ءبولىمى مەن زەرتحانا, كونسترۋكتورلىق-تەحنولوگيالىق بولىمدەر جۇمىس ىستەيدى.
وبلىس اۋماعىندا جۇمىس ىستەيتىن 14 يندۋستريالىق ايماقتان باسقا بيىل اۋماعى 744 گەكتار بولاتىن جاڭا «جەتىساي», «وتىرار», «ارىس», «قارامۇرت» جانە «شاردارا-2» ايماقتارى قۇرىلدى. بۇل ايماقتاردا قۇنى 129 ملرد تەڭگە بولاتىن جالپى 84 جوبانى ىسكە اسىرۋ جوسپارلانعان. بيىل 49,7 ملرد تەڭگەگە 17 جوبانى ىسكە قوسۋ مەجەلەنگەن.
تولەبي اۋدانىندا 1 يندۋستريالىق ايماق اشۋ جانە تۇركىستان قالاسى مەن ورداباسى اۋدانىنداعى 2 ايماقتى كەڭەيتۋ جۇمىستارى جۇرگىزىلىپ جاتىر. ساۋران اۋدانىندا «شاعىن ونەركاسىپتىك پارك» جوباسى ىسكە اسىرىلۋدا. جوبا اياسىندا 152 وندىرىستىك عيمارات سالىپ, 308 ملرد تەڭگە ينۆەستيتسيا تارتۋ كوزدەلگەن. باستاما 6 040 جاڭا جۇمىس ورنىن اشۋعا مۇمكىندىك بەرەدى. بۇگىندە 11 جوبا ىسكە قوسىلىپ, 790 جۇمىس ورنى اشىلدى. سونداي-اق بيىل تاپسىرىلاتىن 29 عيماراتتىڭ قۇرىلىس جۇمىستارىنىڭ 90%-ى اياقتالدى. ناتيجەسىندە, 26 جوبا ىسكە قوسىلادى.
قىتايدىڭ ءىرى كومپانياسىمەن كەلىسسوز جۇرگىزىلىپ, ونەركاسىپتىك پارك اۋماعىندا اۋىل شارۋاشىلىعى دروندارىن شىعاراتىن زاۋىت سالۋ بويىنشا كەلىسىم جاسالدى. جوبا قۇنى – 5 ملن دوللار. قۋاتى – ايىنا 600 دانا. پارك اۋماعىندا «جاسىل سۋىق قازاقستان» (UBC) حالىقارالىق كومپانياسى توڭازىتقىش شىعاراتىن زاۋىتتى ىسكە قوستى. جوبانىڭ جالپى قۇنى 60 ملن ەۋرو بولسا, تولىق ىسكە قوسىلعاندا قۋاتى جىلىنا 140 مىڭ دانا بولادى دەپ جوسپارلانعان.
«شاعىن ونەركاسىپتىك پارك» جوباسىنىڭ مۋلتيپليكاتيۆتىك تيىمدىلىگىن ەسكەرە وتىرىپ, بايدىبەك, كەلەس, ورداباسى, تولەبي, تۇلكىباس سايرام جانە سارىاعاش اۋداندارىندا وسى تاجىريبەنى ەنگىزۋ قولعا الىندى. ساۋىردە ورداباسى اۋدانىندا 8 گەكتار اۋماقتا «بادام» وندىرىستىك پاركىنىڭ قۇرىلىسى باستالدى. ول جەردە كاسىپكەرلەر 5 ءوندىرىس ورنىن اشۋعا قىزىعۋشىلىق تانىتىپ وتىر.
ساۋران اۋدانىنداعى ياسى, قاراشىق, ۇشقايىق, جۇينەك اۋىلدارىندا جەرگىلىكتى كاسىپكەرلەر ءوز قاراجاتى ەسەبىنەن 4 شاعىن وندىرىستىك الاڭدا 22 عيماراتتىڭ قۇرىلىسىن باستادى. ورداباسى اۋدانى ءبورجار اۋىلدىق وكرۋگىندە ورنالاسقان «Altyn Land» جشس-نىڭ زاماناۋي يننوۆاتسيالىق كىرپىش وڭدەۋ زاۋىتىنىڭ قۇرىلىسى اياقتالۋعا جاقىن. يننوۆاتسيالىق زاۋىت جىلجىمالى تۋننەلدى پەش تەحنولوگياسىمەن جۇرگىزىلەدى. ءوندىرىس ورنى مامىر ايىندا ىسكە قوسىلىپ, جىلىنا
90 ملن دانا ءونىم شىعارماق.
«بادام» يندۋستريالىق ايماعىندا «ستەكلو Rez» جشس-نىڭ شىنى وڭدەۋ جانە شىنىنى جوعارى تەمپەراتۋرادا شىنىقتىرۋ جوباسى جۇزەگە اسىرىلدى. ايىنا 20 000 شارشى مەتر شىنى وندىرۋگە قاۋقارلى جوبانىڭ ينۆەستيتسيالىق قۇنى – 710 ملن تەڭگە. ءوندىرىس تسەحى يتاليانىڭ زاماناۋي تەحنولوگياسىمەن جابدىقتالعان. شيكىزات رەسەي, تۇرىكمەنستاننان جانە قىزىلوردا قالاسىنداعى «OrdaGlass» جشس تاباق شىنى زاۋىتىنان اكەلىنەدى.
تۇركىستان وبلىسى
