ءۇش اۋلادا دا بالالار ويىن الاڭدارى جاڭارىپ, دەنە شىنىقتىرۋعا تاپتىرمايتىن workout ورىندارى سايلاندى. تۇرعىنداردىڭ دەمالۋىنا جايلى ايماقتاردىڭ اجارى كىرىپ, اۋلالار تۇگەل جارىقتاندىرىلدى. «بايقوڭىر» اۋدانىندا بارلىعى 249 اۋلا بار بولسا, بىلتىر وسىنىڭ ىشىندە 132 اۋلانىڭ اۋماعى اباتتاندىرىلىپتى. ونىڭ 60-ى كەشەندى اباتتاندىرۋ بولسا, 72-ءسى جوندەۋ-قالپىنا كەلتىرۋ جۇمىستارى ەكەن. اۋدان اكىمدىگى ءار اۋلانى اباتتاندىرۋعا كىرىسپەس بۇرىن تۇرعىن ءۇيدىڭ اۋماعىن, ەرەسەكتەردىڭ, بالالاردىڭ ۇلەسىن ءبارىن-ءبارىن ناقتىلاپ العان. سوسىن بارىپ تۇرعىنداردىڭ ءوتىنىشى, ۇسىنىسى نەگىزىندە كەرەك-جاراعىن تۇگەندەگەن. ياعني اۋلا تۇرعىندارى ايتقان ويىن الاڭشالارىن, دەنە شىنىقتىرۋعا قولايلى جابدىقتاردى ورناتىپ بەرگەن.
ءبىز مەرەكە قارساڭىندا سالتاناتتى تۇردە اشىلىپ, پايدالانۋعا بەرىلگەن رەسپۋبليكا داڭعىلى №30 ءۇيدىڭ اۋلاسىنا باردىق. ءۇي تۇرعىندارى, ويىن بالالارى اۋلاعا شىعىپ, شات-شادىمان كوڭىل-كۇيدە. نەمەرە-شوبەرەلەرىن ەرتىپ جۇرگەن گۇلبارشىن ورازباەۆا كوپتەن كۇتكەن اۋلانىڭ قايتا جاڭعىرعانىنا ءدان ريزا.
– وسى ءۇيدىڭ ءبىرىنشى پودەزى-نەن ءۇي ساتىپ العانىمىزعا 4 جىلدان اسىپ بارادى. سول جىلدارى ءۇيدىڭ اۋلاسى, كىرەبەرىسى, شاتىرى ءبارى-ءبارى ەسكى ەدى. ەندى, مىنە, پاتەر يەلەرى كووپەراتيۆىنىڭ توراعاسى ديانا باستاپ, ءۇيدىڭ جىرتىعىن جاماپ-جاسقاپ جاتىرمىز. جەرتولەدەن باستاپ ءۇيدىڭ شاتىرىنا دەيىن جوندەپ الدىق. اۋلامىز ادام كورگىسىز ەدى. ونى دا بىرەر اپتانىڭ ىشىندە جوندەپ بەردى. ەندى نەمەرە-شوبەرەلەرىمىز كەلسە, وزگە اۋلاعا سەندەلمەي, وسىندا قاراپ وتىراتىن بولدىق. ءوزىمنىڭ 11 شوبەرەم بار. اۋلامىز ءبىز سەكىلدى قاريالاردىڭ دا از-كەم تىنىعىپ العانىنا جايلى ەكەن, – دەيدى گۇلبارشىن اجەي.
اۋلا ماڭىندا تۇرعىنداردىڭ باسىن قوسىپ, رەسپۋبليكا داڭعىلى №30 ءۇيدىڭ توڭىرەگىن جاڭارتۋعا باستاماشى بولىپ جۇرگەن پاتەر يەلەرى كووپەراتيۆىنىڭ توراعاسى ديانا ىدىرىسوۆانىڭ ءوزىن جولىقتىردىق.
– بۇگىن اۋلا تۇرعىندارى ءۇشىن ايتۋلى كۇن. ويتكەنى كوپتەن كۇتكەن بالالارعا ارنالعان ويىن الاڭشاسى اشىلىپ جاتىر. ەندى اۋلامىز قاۋىپسىز ءارى بالالارعا دا ەرەسەكتەرگە دە جايلى ورىنعا اينالدى. بىلتىر «بايقوڭىر» اۋدانىنىڭ اكىمدىگىنە توزىعى جەتكەن اۋلامىزدى اباتتاندىرۋ تۋرالى ءوتىنىش قالدىرعان ەدىك. كوپ ۇزاماي اكىمدىك ءبىزدىڭ اۋلانى دا جوسپارعا ەنگىزدى. وسى ءۇيدىڭ تۇرعىنى رەتىندە وتىنىشىمىزگە نازار اۋدارعان اۋدان اكىمدىگىنە العىس ايتقىم كەلەدى. بىرلەسىپ ىسكە اسىرعان جۇمىستىڭ ارقاسىندا ءۇيدىڭ اۋلاسى جاڭارىپ قالدى,– دەيدى ءۇي تۇرعىنى ديانا.
اۋدان اكىمدىگىنىڭ حابارلاۋىنشا, اباتتاندىرۋ جۇمىستارى اۋداننىڭ باسقا دا اۋماقتارىندا قىزۋ ءجۇرىپ جاتىر. بيىل اۋداندا باس-اياعى 88 اۋلانىڭ اۋماعىن اباتتاندىرۋ جوسپارلانىپتى. ونىڭ 18-ءى كەشەندى اباتتاندىرىلسا, 70-ىندە جوندەۋ-قالپىنا كەلتىرۋ جۇمىستارى باستالادى ەكەن. بۇل جونىندە «بايقوڭىر» اۋدانى اكىمدىگىنىڭ اباتتاندىرۋ ءبولىمىنىڭ باسشىسى راحات دۋلات ۇلىنان تولعىراق سۇراپ-بىلۋگە تىرىستىق.
– بيىل «بايقوڭىر» اۋدانىندا 88 اۋلانى اباتتاندىرامىز دەپ جوسپارلادىق. ونىڭ ىشىندە 18 اۋلا تولىعىمەن جاڭارادى. ياعني كۇردەلى جوندەۋدەن وتەدى. قالعان 70 اۋلانى تولىق جاڭارتپاساق تا, ءىشىنارا جوعىن تۇگەندەيمىز. مەرەكە قارساڭىندا رەسپۋبليكا داڭعىلىنان بولەك, اباي كوشەسى №28, №30 ۇيلەردىڭ دە اۋلاسى قايتا اشىلىپ جاتىر. رەسپۋبليكا داڭعىلى №30 ءۇيدىڭ اۋلاسى جوندەۋدەن وتپەگەنىنە 10 جىلدان اسىپتى. ەسكىنىڭ بارلىعىن جاڭارتتىق. ەرەسەكتەردىڭ دە سپورتپەن شۇعىلدانۋىنا مۇمكىندىك جاسادىق. اسفالتتى قايتا توسەدىك. وسىنىڭ بارلىعىن جۇمىسشىلار 20 كۇندە تىندىردى. بىلتىر وسى ءۇيدىڭ ماڭىنداعى №28-ءۇيدىڭ دە اۋلاسىن جاڭارتقان ەدىك. سوندا كورشى ءۇيدىڭ تۇرعىندارى دا اۋلاسىن اباتتاندىرۋعا ءوتىنىش قالدىرعان. ەندى بيىل سول تۇرعىنداردىڭ دا ءوتىنىشى ورىندالىپ وتىر, – دەيدى ر.دۋلات ۇلى.
وسى كۇنى اۋلانىڭ اشىلۋ سالتاناتىنا قاتىسقان «بايقوڭىر» اۋدانىنىڭ اكىمى تالعات راحمانبەردى تۇرعىنداردىڭ العىسىن ەستىپ, تالاپ-تىلەگىن تىڭدادى. بالالار اۋدان اكىمدىگى ۇيىمداستىرعان ويىن-ساۋىق باعدارلاماعا قاتىسسا, تۇرعىندار اۋلاعا وزدەرى شاعىن داستارقان جايىپ, بالالاردى تاعى ءبىر قۋانتتى.
