جيىندا ءسوز العان مالىك وتارباەۆ مەملەكەت باسشىسى اتاپ وتكەن باسىم باعىتتارعا توقتالىپ, ولاردى جۇزەگە اسىرۋداعى ءبىلىم مەن عىلىمنىڭ رولىنە ەرەكشە ءمان بەردى. سونىمەن قاتار, ول تسيفرلاندىرۋ, جاساندى ينتەللەكت, كولىك-لوگيستيكا, ەنەرگەتيكا, اگروونەركاسىپ جانە ادام كاپيتالىن دامىتۋ سىندى ءتورت نەگىزگى باعىتتىڭ ەلىمىزدىڭ يننوۆاتسيالىق دامۋىنا نەگىز بولاتىنىن اتاپ ءوتتى.
«قوعامدا زاڭ مەن ءتارتىپتى ساقتاۋ, مادەنيەتتى دامىتۋ, عىلىم مەن بىلىمگە ينۆەستيتسيا سالۋ, تاريحي ادىلدىكتى قالپىنا كەلتىرۋ جانە ۇلتتىق بىرلىكتى نىعايتۋ – قازىرگى كەزەڭدەگى ماڭىزدى مىندەتتەر. بۇل باعىتتاردىڭ بارلىعى ەل دامۋىنىڭ تۇعىرلى تىرەگى. اتالعان سالالاردى جاساندى ينتەللەكتپەن ۇشتاستىرا وتىرىپ, قازاقستان تەك ايماقتىق ەمەس, جاھاندىق تەحنولوگيالىق كوشباسشىلاردىڭ قاتارىنا قوسىلا الادى. وسىعان بايلانىستى پرەزيدەنت ۇكىمەتكە وزىق تسيفرلىق شەشىمدەر مەن جاساندى ينتەللەكتىگە قولايلى ەكوجۇيە قالىپتاستىرۋدى جەدەلدەتۋدى تاپسىردى», دەدى پرەزيدەنت كەڭەسشىسى.
كەزدەسۋ بارىسىندا بەلگىلى تاريحشى, سالقىنبەك دوسالى يساحان ۇلى «ۇلتتىق قۇرىلتاي جانە رۋحاني قۇندىلىقتار» تاقىرىبىندا ءوز ويىن ءبولىستى. ول ۇلتتىڭ رۋحاني تۇتاستىعى ەڭ الدىمەن تىلدەن باستالاتىنىن كونفۋتسيدىڭ تاعىلىمدى ءتامسىلى ارقىلى جەتكىزدى. ء«تىلى بۇزىلعان ۇلتتىڭ رۋحى السىرەيدى, ال رۋحى السىرەگەن قوعامدا ادىلەت پەن اقيقات جوعالادى. مۇنداي قاۋىپتەن ساق بولۋ – بارشامىزدىڭ بورىشىمىز. قازىرگى اقپاراتتىق مايدان كەزىندە ۇلتتىق تاربيە مەن قۇندىلىقتاردى ساقتاۋ, دارىپتەۋ – ءار ازاماتقا جۇكتەلگەن امانات», دەدى تاريحشى.
تالقىلاۋعا قاتىسقان ۋنيۆەرسيتەت عالىمدارى مەن جاس زەرتتەۋشىلەر قوعام مەن ءوندىرىستىڭ وركەندەۋىنە ىقپال ەتەتىن وزەكتى عىلىمي-تەحنيكالىق ماسەلەلەر بويىنشا پىكىر الماستى.
