ارداق نازاروۆ اجىراساتىن وتباسىلارعا سالىق سالۋدى ۇسىندى

اجىراسۋ كورسەتكىشى الاڭداتارلىق دەڭگەيدە

ۇلتتىق ستاتيستيكا بيۋروسىنىڭ مالىمەتىنە سايكەس, 2023 جىلى ەلىمىزدە 120,8 مىڭ نەكە تىركەلىپ, ونىڭ 40,2 مىڭى اجىراسۋمەن اياقتالعان. سونىمەن قاتار, بەيرەسمي تۇردە تىركەلمەگەن, بىراق ومىردە جولى ەكىگە ايىرىلعان وتباسىلار سانى دا از ەمەس. بۇگىندە 400 مىڭ ايەل مەن 60 مىڭ ەر ازامات جالعىزباستى اتا-انا رەتىندە تىركەلگەن.

مەملەكەتتىك دەڭگەيدە ناقتى شەشىمدەر قاجەت

دەپۋتاتتىڭ پىكىرىنشە, وتباسىنىڭ كۇيرەۋى – تەك جەكە تراگەديا ەمەس, ەل بولاشاعىنا تىكەلەي اسەر ەتەتىن قاۋىپ. وسىعان بايلانىستى ول ۇكىمەت باسشىسى ولجاس بەكتەنوۆكە تومەندەگى ءتورت ناقتى ۇسىنىستى جولدادى:

1. اجىراسۋعا بايلانىستى مەملەكەتتىك باج تولەۋ ءتارتىبىن ەنگىزۋ.
   ەرلى-زايىپتىلاردىڭ سوتقا بىرجاقتى ارىز بەرۋىنە دەيىن جوعارى مولشەردەگى مەملەكەتتىك باج ەنگىزۋ ۇسىنىلادى. سونىمەن قاتار, رەسمي تۇردە اجىراسقان ازاماتتارعا تابىس سالىعىنىڭ مولشەرلەمەسىن كەزەڭ-كەزەڭىمەن ارتتىرۋ ماسەلەسى قارالۋى ءتيىس.

2. بىتىمگەرشىلىك كەڭەستەرى ارقىلى تاتۋلاستىرۋ.
   اجىراسۋعا ءوتىنىش بەرگەن جۇپتاردى سوتقا دەيىن جەرگىلىكتى قوعامداستىق كەڭەستەرى, ارداگەرلەر القاسى, يمامدار مەن ايەلدەر كەڭەسى سياقتى كونسۋلتاتيۆتىك قۇرىلىمداردىڭ قاراۋىنا بەرۋ ۇسىنىلادى. بۇل – ۇلتتىق ءداستۇر مەن زاماناۋي تاسىلدەردىڭ ۇيلەسىمدى شەشىمى بولماق.

3. «جاس وتباسى» ۇلتتىق باعدارلاماسىن ازىرلەۋ.
   جاڭادان نەكەگە وتىرعان جاس جۇبايلارعا تۇرعىن ءۇي, بالا كۇتىمى, بالاباقشا, جۇمىسقا ورنالاسۋ جانە سالىقتىق دەمالىس سەكىلدى كەشەندى قولداۋ شارالارىن ۇسىنۋ ماڭىزدى. باعدارلاما اياسىندا يپوتەكالىق جەڭىلدىكتەر مەن ارنايى جاردەماقىلار دا قاراستىرىلۋى قاجەت.

4. «قاراپايىم توي – بەرەكەلى وتباسى» اقپاراتتىق-يدەولوگيالىق ناۋقانى.
   جاستار اراسىندا قارجىلىق ساۋاتتىلىقتى ارتتىرۋ جانە نەسيەگە توي جاساماۋعا ۇندەۋ ماقساتىندا كەڭ اۋقىمدى قوعامدىق قوزعالىس باستاۋ ۇسىنىلدى. بۇل باستاماعا قوعام قايراتكەرلەرى, ءدىن وكىلدەرى, مەديا مەن بلوگەرلەردى تارتۋ ۇسىنىلادى.

ۇلتتىق قاۋىپسىزدىك تۇرعىسىنان قاراۋ قاجەت

دەپۋتات ءوز ساۋالىندا: "اجىراسۋ – تەك ەكى ادامنىڭ تاعدىرى ەمەس, بۇل تۇتاس ۇرپاقتىڭ, قوعام مەن مەملەكەتتىڭ تۇراقتىلىعىنا اسەر ەتەتىن ماسەلە. سوندىقتان وتباسىلىق قۇندىلىقتاردى ساقتاۋ – ۇلتتىق قاۋىپسىزدىك دەڭگەيىندە قارالۋى ءتيىس"  دەپ اتاپ ءوتتى.