وبلىس اكىمى نۇرالحان كوشەروۆ «قازاتومونەركاسىپ» ۇاك» اق-نىڭ باسقارما توراعاسى مەيىرجان يۋسۋپوۆپەن كەزدەسىپ, كومپانيانىڭ ءوڭىردى دامىتۋعا قولداۋىن كۇشەيتۋ, بىرلەسكەن جوبالاردى جۇزەگە اسىرۋ, ارىپتەستىكتى نىعايتۋ جولدارىن تالقىلادى. كومپانيانىڭ وبلىستىڭ الەۋمەتتىك-ەكونوميكالىق دامۋى مەن ينفراقۇرىلىمىن دامىتۋعا اۋدارىمدارىن كەزەڭ-كەزەڭىمەن ۇلعايتۋ ماسەلەسى دە نازاردان تىس قالمادى. «كومپانيانىڭ وبلىسقا قولداۋىن كۇشەيتۋ, سوزاق اۋدانىنىڭ ەلدى مەكەندەرىنە الەۋمەتتىك جانە دەمەۋشىلىك كورسەتۋ بويىنشا بىرلەسە جۇمىستار اتقارۋدى ۇسىنامىن. ءبىر كوللەدجدى سەنىمگەرلىك باسقارۋعا الىپ, ءتيىستى كادرلاردى دايارلاۋعا دا ۇلەس قوسادى دەپ سەنەمىن», دەدى نۇرالحان كوشەروۆ. سونداي-اق وبلىس اكىمى ۋران ءوندىرۋشى بىرلەسكەن كاسىپورىندارىنىڭ باس كەڭسەلەرىن شىمكەنت قالاسىنان تۇركىستان قالاسىنا كوشىرۋ ماسەلەسىن دە قاراستىرۋ جونىندە ۇسىنىسىن جەتكىزدى.
بۇل ورايدا مەيىرجان يۋسۋپوۆ ۇسىنىستاردى زەردەلەپ, قاراستىراتىنىن, كومپانيا ءوزىنىڭ الەۋمەتتىك جاۋاپكەرشىلىگىن سەزىنەتىنىن, الەۋمەتتىك نىساندار سالۋعا دەمەۋشىلىك كورسەتىلەتىنىن اتاپ ءوتتى.
ايتا كەتەيىك, 2025 جىلدىڭ قاڭتار-ناۋرىز ايلارىندا تۇركىستان وبلىسىنىڭ تاۋ-كەن ءوندىرۋ ونەركاسىبىندە 153 ملرد تەڭگەنىڭ ءونىمى ءوندىرىلىپ, نكي 114,1% بولدى. ءوڭىردىڭ تاۋ-كەن ءوندىرۋ ونەركاسىبىنىڭ 98%-ى جانە وڭدەۋ ونەركاسىبىنىڭ مەتاللۋرگيا سالاسىنىڭ 99,8% ۇلەسى «قازاتومونەركاسىپ» ۇاك» اق-نا تيەسىلى.
