فوتو: gov.kz
ن.بايتىلەسوۆ ماركەتپلەيستەردى ساتۋشىلار تۋرالى تولىق اقپاراتتى جاريالاۋعا مىندەتتەۋ جانە تۇتىنۋشىلار مەن قۇقىق يەلەرىنە سوتقا نە ساتۋشىعا, نە ماركەتپلەيسكە جۇگىنۋ قۇقىعىن بەرۋدى ۇسىندى. دەپۋتاتتىڭ ايتۋىنشا, ماركەتپلەيستەردە ساتۋشى تۋرالى تولىق اقپاراتتىڭ بولماۋى تۇتىنۋشىلاردىڭ قۇقىعىن شەكتەپ وتىر.
«ماركەتپلەيستەردە ساتۋشى تۋرالى زاڭدى اقپارات (اتاۋى, مەكەنجايى, بسن) كورسەتىلمەيتىن جاعدايلار ءجيى كەزدەسەدى. مىسالى, ءداستۇرلى بولشەك ساۋدادا ساتۋشى زاڭدى اتاۋىن جانە زاڭدى مەكەنجايىن كورسەتۋگە مىندەتتى بولسا, ماركەتپلەيستەردەگى ساتۋشىلار تاۋار كارتوچكالارىندا كوبىنەسە تەك تەلەفون ءنومىرى مەن فيرمالىق اتاۋعا سايكەس كەلمەيتىن اتاۋ عانا كورسەتىلەدى. بۇل مالىمەتتەردىڭ بولماۋى سوتقا جۇگىنۋ مۇمكىندىگىن شەكتەيدى», دەدى ول.
قازىرگى تاڭدا تاۋار تاڭبالارى كوبىنەسە زاڭسىز تۇردە ينتەرنەت-دۇكەندەردە, دومەندىك اتاۋلاردا, الەۋمەتتىك جەلىلەردە, سونداي-اق قىزمەت كورسەتۋ بارىسىندا كەڭىنەن قولدانىلىپ جاتىر. وسى جاعدايعا نازار اۋدارعان ماجىلىسمەن قۇقىق يەلەرىنە زاڭسىز پايدالانىلعان تاڭبالاردى جويۋعا, سونداي-اق زاڭسىز اتاۋلاردى تىركەۋدەن الىپ تاستاۋعا زاڭدى قۇقىق بەرۋدى ۇسىندى.
«مۇنداي زاڭ تەتىكتەرىن ەنگىزۋ تۇتىنۋشىلاردى جاڭىلىستىرۋدىڭ جولىن كەسۋگە, ينتەرنەت-الاياقتىقتىڭ الدىن الۋعا مۇمكىندىك بەرەدى. سونىمەن قاتار, تاۋار تاڭبالارىن قورعاۋ جانە كونترافاكتىلىك ونىمدەرمەن كۇرەسۋدىڭ ءتيىمدى مەحانيزمدەرىنىڭ بولۋى – ينۆەستيتسيالىق تارتىمدىلىقتىڭ ماڭىزدى كورسەتكىشى», دەيدى ن.بايتىلەسوۆ.
دەپۋتات ساۋالىندا كاسىپكەرلىك ورتانىڭ ساپاسىن ارتتىرىپ, ينتەرنەت جەلىسىندەگى ساۋدانى رەتتەۋ جانە كونترافاكتىلىك ءونىمدى وتكىزۋگە قارسى كۇرەستى كۇشەيتۋ, تۇتىنۋشىلاردىڭ قۇقىعىن قورعاۋ ماقساتىندا مىناداي شەشىمدەر قابىلداۋدى سۇرادى:
- ەلەكتروندىق ساۋدا الاڭدارىندا ساتۋشىلار تۋرالى تولىق زاڭدى اقپاراتتى ورنالاستىرۋ تۋرالى مىندەتتەۋ; ال بۇزىلعان جاعدايدا-ءوز ساتۋشىلارىنىڭ ارەكەتتەرى ءۇشىن ماركەتپلەيستەردىڭ اكىمشىلىك جانە م ۇلىكتىك جاۋاپكەرشىلىك الۋىن كوزدەۋ;
- تىركەلگەن تاۋار بەلگىلەرىنىڭ زاڭدى يەلەرىنە ينتەرنەت-رەسۋرستاردىڭ, ماركەتپلەيستەردىڭ, ەلەكتروندىق ساۋدا الاڭدارىنىڭ يەلەرىنەن زاڭسىز پايدالانىلاتىن تاۋار بەلگىلەرىن الىپ تاستاۋدى تالاپ ەتۋگە قۇقىقتار بەرۋ;
- تۇتىنۋشىلار مەن قۇقىق يەلەرىنىڭ قۇقىقتارى بۇزىلعان جاعدايدا جوسىقسىز ساتۋشىلارعا دا, ماركەتپلەيستەرگە دە سوت ارقىلى تالاپ قويۋ قۇقىعىن بەكىتۋ.
