سۋرەت: kp.ru
قورقىت اتا اتىنداعى قىزىلوردا ۋنيۆەرسيتەتى ينجەنەرلىك, اۋىل شارۋاشىلىعى, قۇرىلىس, IT جانە وندىرىستىك تەحنولوگيالار سالالارى بويىنشا ستۋدەنتتەردى تاجىريبەلىك وقىتۋعا باسىمدىق بەرىپ وتىر. وقۋ ورنىندا جۇمىسشى ماماندىقتارىنىڭ ماڭىزدىلىعى كەڭىنەن ناسيحاتتالىپ, جاستاردىڭ قىزىعۋشىلىعىن ارتتىرۋ ماقساتىندا ءتۇرلى كورمەلەر, سەمينارلار مەن فورۋمدار ۇيىمداستىرىلادى.
وبلىستا جۇمىسشى ماماندىقتارىن يگەرگەن جاستارعا «جۇمىسپەن قامتۋ جول كارتاسى», «دامۋ» مەملەكەتتىك باعدارلامالارى اياسىندا ءتۇرلى گرانتتار ۇسىنىلىپ, جۇمىسقا ورنالاسۋ مۇمكىندىكتەرى كەڭەيتىلدى. الدا قۇرىلىس سالاسىن جانداندىراتىن بىرنەشە ءىس-شارا جوسپاردا تۇر. وقۋ ورنى ستۋدەنتتەردىڭ قۇرىلىس جاساعىن قايتا جاڭعىرتىپ, جاستاردى وسى ىسكە جۇمىلدىردى. ايماقتاعى جۇمىس كۇشىن كوپ تالاپ ەتەتىن سالادان ستۋدەنتتەر قارجى تاۋىپ, تاجىريبە جيناقتايدى.
وبلىستا ورتا بۋىن ماماندار دايارلايتىن وقۋ ورنىنىڭ ءبىرى – ي.ابدىكارىموۆ اتىنداعى قىزىلوردا اگرارلىق-تەحنيكالىق جوعارى كوللەدجى. كاسىپتىك-تەحنيكالىق ءبىلىم ساپاسىن جەتىلدىرۋ باعىتىندا وقۋ ورنى وندىرىسشىلەرمەن تىعىز بايلانىس ورناتىپ, ولاردىڭ تالاپتارىنا سايكەس ماماندار دايارلاۋعا باسىمدىق بەرىپ وتىر. سونىمەن قاتار, دۋالدى وقىتۋ جۇيەسىن دامىتۋ ارقىلى تۇلەكتەردىڭ تاجىريبەلىك داعدىلارىن ارتتىرۋعا ەرەكشە كوڭىل بولىنگەن. كوللەدج ديرەكتورىنىڭ وقۋ-وندىرىستىك جۇمىستار جونىندەگى ورىنباسارى ماعريپا ايتەنوۆا بۇگىندە وقۋ ورنى 34 ماماندىق, 35 بىلىكتىلىك بويىنشا ورتا بۋىن تەحنيكالىق ماماندارىن دايارلاپ, ەل ەكونوميكاسىنىڭ سۇرانىسىنا ساي مامان دايارلايتىنىن ايتادى.
«كوللەدج وڭىرگە ينۆەستيتسيا سالعان گەرمانيانىڭ «Seven Rivers» كومپانياسىمەن ارىپتەستىك ورناتىپ, شىنى زاۋىتىن سالۋ جوباسىنا قاجەتتى تەحنيكالىق مامانداردى دايارلاۋ ماقساتىندا ارنايى ءبىلىم باعدارلاماسىن ازىرلەدى. بۇل ايماقتىڭ وندىرىستىك الەۋەتىن ارتتىرىپ قانا قويماي, تۇلەكتەردىڭ جۇمىسقا ورنالاسۋ مۇمكىندىكتەرىن دە كەڭەيتەدى. كوللەدج حالىقارالىق تاجىريبە الماسۋ باعىتىندا دا بەلسەندى. بىلتىر جەلتوقسان ايىندا وقۋ ورنى اقش-تىڭ فلوريدا شتاتىندا ورنالاسقان NSSER بىلىكتىلىكتى باعالاۋ ورتالىعىنىڭ حالىقارالىق اككرەديتاتسياسىنان ءساتتى ءوتتى. اككرەديتاتسيا اياسىندا كوللەدجدىڭ 11 ءبىلىم الۋشىسى «ەلەكترمونتاجداۋشى» قۇزىرەتتىلىگى بويىنشا حالىقارالىق سەرتيفيكاتقا يە بولدى», دەدى ماعريپا ماحمۇتقىزى.
قالاداعى «وrda» جوعارى كوللەدجىندە دە ستۋدەنتتەردىڭ كاسىبي داعدىلارىن دامىتۋعا قاتىستى بىرنەشە جوبا جاسالعان. كوللەدج ديرەكتورىنىڭ ورىنباسارى ارايلىم قوناقباەۆا 2023 جىلى شەبەرلىكتى شىڭداۋ ماقساتىندا گەرمانيا مەن شۆەيتساريادان بىلىكتى تالىمگەرلەر شاقىرىلعانىن ايتادى. گەرمانيالىق مامان ستۋدەنتتەرگە ءوز ەلىندە اۆتوكولىكتى جوندەۋ, تەحنيكالىق قىزمەت كورسەتۋ سالاسىندا كوپ جىلدىق تاجىريبەسى بار بىلىكتى مامان رەتىندە ءدارىس بەردى, شۆەيتساريالىق مامان IT سالاسىنداعى باعدارلامالاۋ نەگىزدەرىنەن باستاپ, كاسىبي دەڭگەيگە دەيىنگى وقىتۋ جۇيەسىن ەنگىزدى.
«كوللەدجدە گاز قۇبىرلارىن ورناتۋ بويىنشا ءبىلىم الىپ جاتقان جاستار وڭىرگە اسا قاجەت. ولاردىڭ دەنى كوللەدجدى بىتىرمەي جاتىپ, تاجىريبەدەن ءوتۋ كەزىندە جۇمىس تاۋىپ الادى. كاسىپورىندارمەن كەلىسىم جاساسۋ مامان ساپاسىنا دا سەرپىن بەرىپ وتىر. بۇرىننان دا بار وسى ءداستۇر جۇمىسشى ماماندىقتارى جىلىندا جاڭعىرا ءتۇستى», – دەيدى ا.قوناقباەۆا.
مامانداردىڭ ايتۋىنشا, تۇلەكتەردىڭ جۇمىسقا ورنالاسۋ كورسەتكىشى جاقسى. اسىرەسە دانەكەرلەۋشى ماماندىعىن بىتىرگەندەر دالادا قالمايدى, جالاقىلارى دا جوعارى. ەلەكتريك ماماندىعىن بىتىرگەندەردىڭ كوپشىلىگى ايلىقتىڭ ازدىعىنان سالاعا بارا بەرمەيدى. كوللەدج وقىتۋشىلارى وسى ماسەلەنى ايماقتاعى ءوندىرىس ورنى جەتەكشىلەرىمەن «اتامەكەن» كاسىپكەرلەر پالاتاسى الاڭىنداعى كەزدەسۋلەردە ءجيى كوتەرىپ كەلەدى.
قىزىلوردا
