فوتو: اشىق دەرەككوز
مينيسترلىكتىڭ باستاماسىمەن ازىرلەنىپ جاتقان جۇيە قۇرىلىستىڭ بارلىق كەزەڭدەرىن — جوسپارلاۋ, جوبالاۋ جانە وبەكتىنى سالۋدى تولىق قامتيدى. بىرىڭعاي تەرەزە قاعيداتى بويىنشا قۇرىلاتىن پورتال سالالىق جۇيەلەرگە ۇزدىكسىز ءوتۋ مۇمكىندىگىن قامتاماسىز ەتەدى.
«قازىرگى ۋاقىتتا جۇيە 89 قالانىڭ قالالىق جوبالارىن جانە ينجەنەرلىك ينفراقۇرىلىمنىڭ 92,4%-ىن قامتيدى. قالا قۇرىلىسى قىزمەتىنىڭ اشىقتىعىن, قالا جوبالارىن ازىرلەۋ مەن ىسكە اسىرۋدىڭ سايكەستىگىن قامتاماسىز ەتۋ ماقساتىندا مينيسترلىك نىساننىڭ بىرەگەي ءنومىرىن ەنگىزۋدى پىسىقتادى. بۇل بىرىزدەندىرۋ قۇجاتتاردىڭ باستامادان باستاپ پايدالانۋعا ەنگىزىلگەنگە دەيىنگى نىسانالى ماقساتقا سايكەستىگىن تۇپكىلىكتى تەكسەرۋدى قامتاماسىز ەتەدى», دەدى قۋاندىق قاجكەنوۆ.
سونىمەن قاتار, مينيسترلىك جاساندى ينتەللەكتى پايدالانا وتىرىپ, ەلدى مەكەندەردىڭ باس جوسپارلارى مەن ەگجەي-تەگجەيلى جوسپارلاۋ جوبالارىنىڭ ىسكە اسىرىلۋىن قاداعالايتىن تەحنولوگيانى سىناقتان وتكىزۋدى جوسپارلاپ وتىر. بۇل جۇيە جەرگىلىكتى جەرلەردى كومپيۋتەرلىك كورۋ ارقىلى زەرتتەپ, ناقتى دەرەكتەردى بەكىتىلگەن جوبالارمەن سالىستىرادى. انىقتالعان سايكەسسىزدىكتەر تۋرالى اقپارات ءتيىستى باقىلاۋ ورگاندارىنا جىبەرىلەدى.
تسيفرلاندىرۋ جۇمىستارى قۇرىلىس كەزەڭىن دە قامتيدى. وسى ماقساتتا بارلىق قۇرىلىس قاتىسۋشىلارى ءۇشىن بىرىڭعاي تسيفرلىق الاڭ — E-Qurylys پلاتفورماسى ىسكە قوسىلادى. بۇل جۇيە ارقىلى اتقارۋشىلىق قۇجاتتامالاردى جۇرگىزۋ, تەحنيكالىق قاداعالاۋ ەسەبىن تاپسىرۋ, پروفيلاكتيكالىق باقىلاۋ, بىلىكتىلىك تالاپتارىنا سايكەستىكتى تەكسەرۋ جانە رۇقساتتاردىڭ بىرىڭعاي ءتىزىلىمىن جۇرگىزۋ مۇمكىندىگى بەرىلەدى.
جاڭا جۇيە بيۋدجەت قاراجاتى مەن كۆازيمەملەكەتتىك سەكتور ەسەبىنەن ىسكە اسىرىلاتىن بارلىق قۇرىلىس نىساندارىندا مىندەتتى تۇردە قولدانىلاتىن بولادى.
