«سامۇرىق-قازىنا» اق ەنشىلەس كومپانيالارىنىڭ ءبىرى – «قازمۇنايگاز» ۇك» اق ازىرلەگەن ABAI (Advanced Base and Artificial Intelligence) اقپاراتتىق جۇيەسى – وسى سالاداعى زاماناۋي شەشىمدەردىڭ ءبىرى. ABAI مۇنايدى بارلاۋ مەن ءوندىرۋ ۇدەرىستەرىن ءدال, جىلدام ءارى قاۋىپسىز ەتۋ ءۇشىن جاساندى ينتەللەكت پەن Big Data تەحنولوگيالارىن پايدالانادى.
ABAI جۇيەسىنىڭ قۇرىلىمى
ABAI جۇيەسى باعدارلامالىق, تەحنيكالىق, اپپاراتتىق قامتاماسىز ەتۋدى بىرىكتىرىپ, كەن ورنىنىڭ «تسيفرلىق ميى» رەتىندە قىزمەت ەتەدى. وسىلايشا, ەندى ينجەنەرلەرگە ناقتى ۋاقىت رەجىمىندە داتچيكتەر, SCADA جۇيەلەرى جانە باسقا جابدىقتاردان الىنعان دەرەكتەردى تالداۋ مۇمكىندىگى قاراستىرىلعان. ول جۇيەنىڭ ءدال بولجامدارى مەن ۇسىنىستارىن نەگىزگە الا وتىرىپ شەشىم قابىلداۋعا مۇمكىندىك بەرەدى.
جۇيە 7 مودۋلدەن تۇرادى, ولاردىڭ ارقايسىسى وندىرىستىك ۇدەرىس بويىنشا جەكە ۋچاسكەلەرگە جاۋاپ بەرەدى. مودۋلدەر اراسىندا قۇبىر جانە جوندەۋ جۇمىستارىن جوسپارلاۋ, جابدىقتاردى تاڭداۋ سياقتى ماڭىزدى فۋنكتسيالار دا بار. وسىنداي نەگىزگى مودۋلدەردىڭ ءبىرى – «كەن ورنىنا سۋ ايداۋ ۇدەرىسىن باسقارۋ» تەحنولوگياسى بولىپ وتىر. بۇل ءادىس كەن ورنىنداعى مۇناي ءوندىرىسىن ۇلعايتىپ, پلاستقا سۋ ايداۋ تەحنولوگياسىمەن ەرەكشەلەنەدى. سونىمەن بىرگە, ول ءدال ەسەپتەۋلەر مەن تۇراقتى باقىلاۋدى تالاپ ەتەدى.
تاعى ءبىر ايتا كەتەر جايت, سۋ ايداۋ جۇمىستارىن دايىنداۋعا بۇعان دەيىن 40 ساعات ۋاقىت جۇمسالسا, اۆتوماتتاندىرىلعان تالداۋ مەن جاساندى ينتەللەكت ۇسىنىسىنىڭ ناتيجەسىندە, ەندى بۇل ۋاقىت بار بولعانى 2 ساعاتتى قۇرايدى. بۇل ءوندىرىستىڭ تيىمدىلىگىن ارتتىرۋداعى ماڭىزدى قادام بولىپ وتىر.
قارجىلىق تيىمدىلىك
«قازمۇنايگاز» ۇك» اق ازىرلەگەن جۇيەنىڭ وندىرىسكە ەنگىزىلۋى قارجىلىق جاعىنان دا ايتارلىقتاي ءتيىمدى. بۇگىندە جۇيە ارقىلى 450 ملن تەڭگە قارجىنى ۇنەمدەۋ مۇمكىندىگى پايدا بولدى. 2030 جىلعا دەيىن كومپانيا 9,3 ملرد تەڭگەنى ۇنەمدەي الادى دەپ بولجانىپ وتىر. بۇل كورسەتكىشتەر ونىڭ تيىمدىلىگى مەن مۇناي ءوندىرۋ سالاسىنا قوسقان ۇلەسىن ايقىن كورسەتەدى.
ABAI جۇيەسى – مۇناي ءوندىرۋ ۇدەرىسىن اۆتوماتتاندىرۋ مەن وڭتايلاندىرۋ ارقىلى ەلىمىزدىڭ ەنەرگەتيكالىق سەكتورىندا جاڭا مۇمكىندىك اشىپ جاتىر. جاساندى ينتەللەكت كومەگىمەن مۇناي ءوندىرۋشى كومپانيالار تيىمدىلىكتى ارتتىرىپ, ەكونوميكالىق شىعىنداردى ازايتا الادى. سونداي-اق ولار وزدەرىنىڭ وپەراتسيالىق جۇيەسىن جەتىلدىرىپ, باسەكەگە قابىلەتتىلىكتى جوعارىلاتادى. بۇل تەحنولوگيانىڭ بولاشاعى زور ءارى ول ەلىمىزدىڭ ەنەرگەتيكالىق تاۋەلسىزدىگى مەن تۇراقتىلىعىن قامتاماسىز ەتەدى.
ماينۇر جاناقوۆا
