ءىس-شاراعا مادەنيەت جانە اقپارات ۆيتسە-ءمينيسترى ايبەك سىدىقوۆ, شىعارماشىلىق مەكتەپتەردىڭ, كوللەدجدەر مەن جوعارى وقۋ ورىندارىنىڭ باسشىلارى, سونداي-اق بىرقاتار شەتەلدىك جانە وتاندىق ساراپشىلار قاتىستى.
كەزدەسۋ بارىسىندا ەلىمىزدەگى شىعارماشىلىق باعىتتاعى ءبىلىمدى ودان ءارى دامىتۋ, نەگىزگى ۇردىستەر مەن باعىتتار تالقىلاندى. سونىمەن قاتار قاتىسۋشىلار سەرتيفيكاتتالعان ءبىلىم باعدارلامالارىن ەنگىزۋ, جاساندى ينتەللەكت داۋىرىندەگى مادەني ءبىلىمنىڭ ءرولىن, شىعارماشىلىق باعىتتاعى جوعارى وقۋ ورىندارىنىڭ «Erasmus+» باعدارلاماسىنا قاتىسۋ مۇمكىندىكتەرى ءسوز بولدى. جيىن سوڭىندا قاتىسۋشىلار كەشەندى ءىس-شارالاردى ازىرلەۋ جانە وزىق تاجىريبەلەر مەن سۇرانىستاعى باعدارلامالاردى بەيىمدەۋ قاجەتتىگى تۋرالى ورتاق پىكىر ءبىلدىردى.
ءىس-شارادا ونەرتانۋ عىلىمدارىنىڭ دوكتورى, گنەسيندەر اتىنداعى مۋزىكا اكادەمياسىنىڭ پروفەسسورى دينا كيرنارسكايا شىعارماشىلىق ءبىلىمدى دامىتۋدىڭ زاماناۋي ترەندتەرى جونىندە ايتىپ ءوتتى. ال نيۋ-يورك كينو اكادەمياسىنىڭ پرەزيدەنتى مايكل يانگ سەرتيفيكاتتالعان ءبىلىم باعدارلامالارىن ىسكە اسىرۋدىڭ مۇمكىندىكتەرى مەن كەلەشەگى تۋرالى ويىن ورتاعا سالدى.
ى.التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى رۋسلان قاراتابانوۆ ءبىلىم سالاسىندا ءبىر ماقساتقا جۇمىلۋدىڭ ماڭىزىن اتاپ ءوتتى.
«ەڭ باستى قاعيداتتارىمىز, تەحنولوگيالارىمىز ءبىر بولسا, سوندا ۇلتقا دا قىزمەت ەتەتىن, ءوز مادەنيەتىن, ءوز تالانتىن شىڭداعان تابىستى تۇلعالاردى شىعارۋعا ابدەن قاۋقارلى ەلگە اينالامىز. ەكىنشىدەن, ەلىمىز قازىر ءححى عاسىردا, قارقىندى دامىپ كەلەدى. بۇل عاسىردىڭ ەڭ باستى ترەندتەرىنىڭ ءبىرى – كرەاتيۆتى يندۋستريانىڭ دامۋى. ەندى كرەاتيۆتى يندۋستريانىڭ اۋقىمىن كورسەتۋ ءۇشىن ايتالىق, ءبىر عانا ديماش قۇدايبەرگەن – ەڭ كەمىندە 500 ادامعا جۇمىس بەرىپ وتىر. مىنە, سونداي ونەرپازدار كوپ بولسا, ءبىزدىڭ ەلگە كەلەتىن ادامدار دا ارتار ەدى. مۇنىڭ ءوزى – ەكونوميكا دامۋىنىڭ كورسەتكىشى. سونىمەن قوسا ەلىمىزدەگى ۇزدىكسىز ءبىلىم جۇيەسىن ودان ءارى جەتىلدىرۋىمىز كەرەك. ماسەلەن, بالاباقشا مەن مەكتەپتەردەگى ۇيىرمەلەردىڭ جەتەكشىلەرى, كوللەدجدەر مەن ۋنيۆەرسيتەت وكىلدەرى بار, ارقايسىمىزدىڭ ىستەپ وتىرعان ءىسىمىز ءبىر بولعانىمەن, بايلانىسىمىز ءماز ەمەس. سوندىقتان بىرىزدىلىكتى قالىپتاستىرىپ, ورتاق مۇددەگە قىزمەت ەتۋىمىز كەرەك», دەدى ول.
ايتا كەتەيىك, بۇگىندە مينيسترلىكتىڭ قاراماعىندا 10 شىعارماشىلىق ءبىلىم ۇيىمى – 4 جوو, 4 كوللەدج جانە دارىندى بالالارعا ارنالعان 2 مەكتەپ-ينتەرنات بار. ولاردا 10 مىڭنان استام ادام وقيدى جانە 4 مىڭنان استام پەداگوگ پەن قىزمەتكەر جۇمىس ىستەيدى. وقۋ ورىندارىنا كونكۋرس ورتا ەسەپپەن ءبىر ورىنعا 9 ۇمىتكەردەن كەلەدى.
