«Assyltas» قوعامدىق قورىنىڭ نەگىزىن قالاعان ازامات ءوزىنىڭ تۋعان ءوڭىرى – اباي وبلىسىنا 14 مىڭنان استام كىتاپتى سىيعا تارتتى. ەندى وسى وڭىردەگى 233 مەكتەپتىڭ ارقايسىسى 60-تان اسا تاڭداۋلى كوركەم جانە تانىمدىق تۋىندىلاردى الا الادى.
وسىلايشا, دۋلات تاستەكەي وزگە وڭىرلەردەگى مەتسەناتتاردى بۇل اعارتۋشىلىق چەللەندجدى جالعاستىرۋعا شاقىرا وتىرىپ: «ارتىق ءبىلىم – كىتاپتا» اكتسياسى – بۇل اعارتۋشىلىق ەستافەتا. ءبىز ەلىمىزدىڭ باسقا وڭىرلەرىندەگى جومارت جاندار مەن كاسىپكەرلەرگە, جۇرەگى ەل دەپ سوققان بارلىق ازاماتقا ۇندەۋ تاستايمىز. كەلىڭىزدەر, ءوز وبلىستارىڭىزداعى مەكتەپتەرگە دە وسىنداي كىتاپ تارتۋ ءداستۇرىن باستايىق. سەبەبى كىتاپ وقيتىن بالا – ەرتەڭ ەلدىڭ تىرەگى, ال كىتاپتى قۇرمەتتەگەن حالىق – ماڭگى جاسايتىن ۇلت», دەدى دۋلات تاستەكەي.
قۇندى كىتاپتارعا تولى ۇلكەن جۇك كولىكتەرى الماتى قالاسىنان شىعىپ, اباي وبلىسىنىڭ اياگوز قالاسىنا بەت الدى. بۇل كىتاپتار مەكتەپ كىتاپحاناشىلارىنا سالتاناتتى تۇردە تابىستالدى.
جوبانىڭ باستى ماقساتى – وتاندىق وقۋشىلاردى كىتاپ وقۋعا شابىتتاندىرۋ, كىتاپتى كۇشتىڭ, ويدىڭ جانە ءتىلدىڭ قاينار كوزى رەتىندە قايتا جاڭعىرتۋ.
«ارتىق ءبىلىم – كىتاپتا» جوباسى «Assyltas» قورىنىڭ تۇپكى ماقساتىنا تولىق سايكەس كەلەدى. ءاۋ باستان, قوردىڭ كوزدەگەن ماقساتى – ەلىمىزدىڭ اۋىلدىق ايماقتارىنداعى ءاربىر بالاعا ءبىلىم الۋدا, رۋحاني جانە زياتكەرلىك تۇرعىدان تەڭ مۇمكىندىك جاساۋ بولاتىن.
جوبا ۇلى ويشىل اباي قۇنانباي ۇلىنىڭ 180 جىلدىعىنا ارنالادى جانە حالىقارالىق «قازاق ءتىلى» قوعامى مەن اباي وبلىسى اكىمدىگىنىڭ قولداۋىمەن جۇزەگە اسىپ جاتىر.
الماتى
