فوتو: اشىق دەرەككوز
ماڭعىستاۋ وڭىرىنە جۇمىس ساپارىمەن بارعان كولىك ءمينيسترى مارات قاراباەۆ ماڭعىستاۋ تەمىرجول ۆوكزالىنداعى جۇمىستاردى تەكسەرىپ, قايتا جاڭارۋ جۇمىستارى اياسىندا جاڭا عيمارات سالىناتىنىن مالىمدەدى.
«ماڭعىستاۋ تەمىرجول ۆوكزالىنىڭ اۋماعى 10 ەسە ارتادى. قايتا جاڭارتۋ جۇمىستارى اياسىندا زاماناۋي ۇلگىدەگى جاڭا عيمارات بوي كوتەرەدى. عيمارات ءۇش قاباتتان تۇرادى. ەرەكشە قاجەتتىلىگى بار جاندارعا جاعداي جاساۋعا باسا نازار اۋداردىق. عيمارات اۋدانىنىڭ ايتارلىقتاي ارتۋىنا بايلانىستى ارنايى انا مەن بالا بولمەلەرىن, زاماناۋي كۇتۋ زالدارىن, ەسكولاتورلار مەن تراۆولاتورلاردى ورناتۋدى قاراستىردىق. جولاۋشىلار اعىنى مەن سانى ارتىپ, تۋريزم دە دامي تۇسپەك», دەدى مارات قاراباەۆ.
سونىمەن قاتار شەتپە ۆوكزالىنىڭ اۋدانى 5 ەسە, ال بەينەۋ ۆوكزالىنىڭ اۋدانى 10 ەسە ارتاتىنى حابارلاندى. سونداي-اق بيىل ماماندار 404 شاقىرىمدىق بەينەۋ-ماڭعىستاۋ تەمىرجولىن جاڭارتادى. پويىز قوزعالاسىن رەتتەيتىن جۇيە (اۆتوبلوكيروۆكا) شالقار-بەينەۋ جانە ماڭعىستاۋ-وزەن تەمىرجولدارىندا ورناتىلادى.
