نازيپا شانايدىڭ ايتۋىنشا, قازاقستان حالقى اسسامبلەياسىنىڭ انالار كەڭەسى قاتارىندا 1700-دەن استام قۇرىلىم, 16 مىڭنان استام بەلسەندى انا بار. ەڭ ۇلكەنى - 80, ال ەڭ جاسى – 25 جاستا.
«اسسامبلەيا, 1995 جىلى - تاعدىرى ورتاق, ماقساتى ءبىر ازاماتتاردان قۇرىلعان قوعامدىق ۇيىم. ال, بۇگىن اسسامبلەيا – تاريحي سانانى قالىپتاستىرۋشى ىرگەلى ينستيتۋت, مەملەكەتتىڭ ورەلى ىستەرىن ىسكە اسىرۋشى ءىرى قوعامدىق ۇيىم, پاتريوتتار مەكتەبى.
انالار كەڭەسى – سول اسسامبلەيانىڭ ەرەكشە قۇرىلىمدىق بىرلىگى. ال, قازاقستانداعى ءار انانىڭ مىندەتى – ەلىنە ادال ازامات تاربيەلەۋ», دەيدى انالار كەڭەسىنىڭ توراعاسى.
توراعانىڭ ايتۋىنشا, بۇل باعىتتاعى جۇمىستى تەك قانا ءبىلىم مەكەمەلەرىنىڭ موينىنا ءىلىپ قويۋعا بولمايدى.
«مەكتەپ – اتا-انا – وقۋشى» ۇشتىگىنىڭ بىرلىگى عانا وڭ ناتيجە بەرەدى. وسى باعىتتى نىعايتۋ ماقساتىندا انالار كەڭەسىنىڭ بىرىكتىرۋشى ءرولى وراسان. «قازاقستان بالالارى» باعدارلاماسىن ازىرلەۋ, ءتۇسىندىرۋ جانە ىسكە اسىرۋ جۇمىسىنا انالار كەڭەسى بەلسەندى قاتىسۋعا دايىن. جاڭا باعدارلاما - بالا داۋىسىن ەستيتىن, سول داۋىسقا قۇلاق سالاتىن قوعامدىق سانانى قالىپتاستىرادى دەپ سەنەمىز», دەدى ن. شاناي.
بۇگىنگى تاڭدا انالار كەڭەسى ورتالىق جانە جەرگىلىكتى مەملەكەتتىك ورگانداردىڭ سەنىمدى سەرىكتەسىنە اينالدى.
«وتكەن جىلى فارماكولوگيا كوميتەتىمەن بىرلەسىپ «ۆەيپكە تىيىم» جوباسىن جۇرگىزدىك. قوعامعا ءتۇسىندىرۋ جۇمىسىنىڭ ارقاسىندا جانە قر پرەزيدەنتىنىڭ قولداۋىمەن تولىعىمەن تىيىم سالىنعان زاڭ قابىلداندى. بۇل زاڭ - ءبىزدىڭ ۇلت رەتىندە جويىلىپ كەتپەۋىمىزدىڭ الدىن-الىپ وتىر. سول ءۇشىن, سىزگە - بارشا قازاقستان انالارى اتىنان راحمەت ايتامىن.
2023 جىلدان بەرى ءبىزدىڭ كاسىبي پسيحولوگتارىمىز اسكەري ستۋدەنتتەر مەن جاۋىنگەرلەر اراسىندا قۇمار ويىندارىنا تاۋەلدىلىكتەن قۇتىلۋ, ءسۋيتسيدتىڭ الدىن-الۋ, كۇيزەلىستەن شىعۋ جولدارى بويىنشا جۇيەلى جۇمىس جۇرگىزىپ وتىر», دەدى انالار كەڭەسىنىڭ توراعاسى.
ونىڭ ايتۋىنشا, پرەزيدەنتتىڭ قوعامدىق 5 كەسەلگە قارسى كۇرەس جۇرگىزۋ تۋرالى تاپسىرماسى «سالاۋاتتى سانا» جوباسى ارقىلى ورىندالىپ جاتىر.
«انالاردىڭ ماقساتى – سول كەسەلدەردىڭ الدىن-الۋ. ول ءۇشىن, ەڭ الدىمەن, وتباسى ينستيتۋتىن نىعايتۋ قاجەت. تۇرمىستاعى زورلىق-زومبىلىق بويىنشا زاڭناماعا ەنگىزىلگەن وزگەرىستەر, بالالار مەن ايەلدەرگە قاتىستى قىلمىستاردىڭ باسەڭدەۋىنە ىقپال ەتتى. دەگەنمەن, زورلىقسىز قوعام قۇرۋ ءۇشىن - تەرەڭ پاراساتتى اكە, جوعارى مادەنيەتتى انا, ۇلتتىق ساناسى قالىپتاسقان بالا كەرەك. سوندىقتان, ءبىز, ءداستۇرلى جانە وتباسىلىق قۇندىلىقتاردى ساقتاۋ, رۋحاني-ادامگەرشىلىك تاربيە بەرۋدى جۇمىسىمىزدىڭ نەگىزگى باعىتتارىنا اينالدىردىق», دەيدى ول.
اسسامبلەيا انالارى «ازامات تاربيەلەگەن وتباسى», «التىن شاڭىراق», «كۇمىس كەرەگە» دەگەن نوميناتسيالارمەن ۇلگىلى وتباسىلارىن ماراپاتتاۋ, «ەل اناسى» قۇرمەتتى اتاعىن بەرۋ, «ايالى الاقان» القاسىن تاپسىرۋ ارقىلى وتباسى ينستيتۋتىن قولداۋ شارالارىن اتقارىپ ءجۇر.
«مەملەكەتىمىزدە جۇرگىزىلىپ جاتقان رەفورمالاردىڭ ناتيجەسىن ۇرپاقتارىمىزدىڭ ادامي بولمىسىنان, ورەلى ءىس-ارەكەتىنەن كورەتىن كۇن الىس ەمەس. ءبىز, انالار, وعان سەنىمدىمىز», دەيدى ن.شاناي.
ايتا كەتەيىك سەسسياعا قر پارلامەنتىنىڭ دەپۋتاتتارى, ەلىمىزدىڭ بارلىق وڭىرلەرىنەن كەلگەن اسسامبلەيا مۇشەلەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ توراعالارى قاتىستى.
