روبوتتار تاعام ازىرلەيدى
كومپانيادا ISO 9001 حالىقارالىق ستاندارتتارى مەن ناسسر قاعيداتتارى نەگىزىندە ازىرلەنگەن بىرىكتىرىلگەن مەنەدجمەنت جۇيەسى جۇمىس ىستەيدى. زاماناۋي جابدىقتارى بار تەحنولوگيالىق زەرتحانا شيكىزات, جارتىلاي فابريكات جانە دايىن ونىمدەردىڭ ساپاسى مەن قاۋىپسىزدىگىن قاتاڭ باقىلايدى. بولشەك ساۋدا ءبولىمىنىڭ وكىلدەرى «اقساي نان» اسسورتيمەنتى 300-دەن استام پوزيتسيادان تۇراتىنىن, ال كومبينات تاۋلىگىنە 150 توننادان استام ءونىم شىعاراتىنىن اتاپ ءوتتى.
ءبىر ەرەكشەلىگى – فيرمالىق دۇكەندەر بارلىق ءونىمدى كومبينات باعاسىمەن ساتادى. مۇنداعى نان وزگە دۇكەندەرمەن سالىستىرعاندا 20%-عا ارزان. ەكىنشى ماڭىزدى جايت – فيرمالىق دۇكەندەر مەن كافەتەريلەر بىرىكتىرىلگەن. بۇل تاجىريبە ەۋروپانىڭ گاسترونوميالىق يندۋسترياسىنان الىنعان, وندا كافەتەريلەر كوبىنە ءىرى ازىق-ت ۇلىك پەن امبەباپ دۇكەندەردە ۇيىمداستىرىلادى. مۇنداي شەشىم كليەنتتەرگە جاڭا پىسىرىلگەن تاعامداردى سول جەردە تۇتىنۋعا ءارى تولىق تاماقتانۋعا مۇمكىندىك بەرەدى.
«اقساي نان» كافەتەريىنىڭ سوڭعى نوۋ-حاۋىنىڭ ءبىرى – تاعام دايىنداۋ ۇدەرىسىن روبوتتاندىرۋ. روبوت الەمنiڭ ەڭ تانىمال تاعامدارىنىڭ قۇرامىن ەستە ساقتاپ, وندىرىستە ەمىن-ەركىن پايدالانادى. سونىمەن قاتار نان كومبيناتى «دامۋ» قورىنىڭ كومەگىمەن نان پىسىرەتىن تسەحتاردى جاڭارتىپ, اۆتوماتتاندىرۋ ۇلەسىن ارتتىرعان.
نان مەن جەمىس ءدامى ينتەگراتسيالانادى
الداعى ۋاقىتتا «اقساي نان» شىمكەنت قالاسىندا زاۋىت اشۋدى جوسپارلاپ وتىر. قازىر نەگىزگى قۇرىلىس جۇمىستارى اياقتالىپ, كۇردەلى جابدىقتاردى جەتكىزۋ جانە جوندەۋ باستالعان. كاسىپورىن اسسورتيمەنتىندە نان, توقاش, ويىق توقاش جانە كونديتەرلىك ونىمدەردىڭ 320-دان استام ءتۇرى بار.
بۇگىندە «اقساي نان» كۇنىنە 150 توننا دايىن ءونىم شىعارىپ, 1 000-نان استام ادامدى جۇمىسپەن قامتاماسىز ەتىپ وتىر. سونداي-اق كومپانيا 10 دۇكەن مەن اسحانالارى بار فيليالداردى باقىلايدى.
كومبيناتتا ءوندىرىس ۇدەرىسىنە يننوۆاتسيالاردى بەلسەندى ەنگىزەتىن زاماناۋي تەحنولوگيالار ءبولىمى جۇمىس ىستەيدى. كومپانيا عىلىمي-زەرتتەۋ زەرتحانالارىمەن ىنتىماقتاستىق ورناتقان. كاسىپورىن ونىمدەردىڭ قاۋىپسىزدىگى مەن ساپاسىنىڭ جوعارى ستاندارتىن راستايتىن شيكىزات پەن دايىن ءونىم ءوندىرىسىن باقىلاۋعا ەرەكشە نازار اۋدارادى. يجەنەر-تەحنولوگ ءاليا احاتقىزىنىڭ ايتۋىنشا, «اقساي نان» ونىمدەرى ارىسى بيداي, بەرىسى ۇن, اشىتقى, مايى مەن تۇزىنا دەيىن وتاندىق ازىق-ت ۇلىك ونىمدەرىنەن دايىندالادى. ءتىپتى نان كومبيناتى جانىندا نان اشىتقىسىنىڭ بىرنەشە ءتۇرىن دايىندايتىن قوسىمشا تسەحتار جۇمىس ىستەيدى. بۇل «اقساي ناننىڭ» بىرنەشە شاعىن تسەحتىڭ باسىن قوسىپ وتىرعان كومپانيالار توبى دەڭگەيىنە كوتەرىلىپ قالعانىن بىلدىرسە كەرەك.
ء«بىز تاشكەنت, ماسكەۋ تەحنولوگتارىمەن ۇدايى تاجىريبە الماسامىز. جىل سايىن كەمى ونداعان ءتۇر مەن ءدام جاڭارتىلادى. تۇتىنۋشى تالعامى الماتىنىڭ اۋا رايىنداي قۇبىلىپ تۇرادى. بىردە پىستە ءدانىن جاقسى كورسە, بىرەسە كەبەك دانىنە باسىمدىق بەرەدى. كەيىنگى كەزدەرى جۇگەرى, قاراقۇمىقتان تارتتىرىلعان ۇننان دايىندالعان ناندار كوبىرەك سۇرانىستا. بۇرىن كەبەك جارماسى ارالاسقان نان ءتۇرى سۇرانىستا بولسا, قازىر ترەند باسقا. جاستار جاعى الما, بانان, ورىك ءدامى بار نان ءتۇرىن ىزدەيدى, تورت قۇرامىنداعى ۇن مولشەرىنىڭ بارىنشا از بولعانىن قالايدى. پىستە ءدانى ارالاسقان نان ءتۇرى دە سۇرانىسقا يە. بىزگە بەلگىلى جەمىس تۇرلەرىن نان دامىمەن ينتەگراتسيالاۋعا تىرىسامىز. الەۋمەتتىك ساناتتاعى نان تۇرىنە سۇرانىس كوپ بولعاندىقتان كۇنىنە 60-70 تونناسىن پىسىرەمىز. سودان كەيىن تىلىكتى باتون ءتۇرى دە سۇرانىسقا يە. سونداي-اق باگەت نانىنىڭ ەكى ءتۇرى دايىندالادى. ءبىرى جوعارى سورتتى بيداي ۇنى بولسا, ەكىنشىسى قارا بيداي ۇنىنان پىسىرىلگەن «بورودينسكايا» دەپ اتالاتىن نان ءتۇرى», دەيدى ءاليا احاتقىزى.
نان نارىعىنداعى باسەكە جوعارى
قويمادان جەتكىزىلگەن جۇزدەگەن توننا ۇن كەزەڭ-كەزەڭىمەن قازاندىققا تۇسەدى. ءبىر قازاندىقتا ءبىر مەزگىلدە 250 كيلو قامىر دايىندالادى. نان قۇرامىنا قاجەتتى اشىتقى, ماي, تۇز مولشەرىن ادام ەمەس, روبوت بەلگىلەيدى ەكەن. قازاندىقتا ءيى قانىپ, اشىتقى قوسىلعان قامىردىڭ 2 ساعاتتان كەيىن ءدامى ءتىل ۇيىرەتىن سان الۋان فورماداعى نانعا اينالعانىن كوزبەن كوردىك.
نان ءپىسىرۋ تسەحىنان كەيىنگى بارلاۋ جۇمىستارى رابيلا بالتاكەلديەۆا باسقاراتىن دايىن ونىمدەر بولىمىندە جالعاستى. «اقساي نان» كومبيناتىندا پىسكەن نان ءتۇرىنىڭ بارلىعى وسى تسەحتان شىققان بويدا الماتى دۇكەندەرىنە جىبەرىلەدى. مۇندا ەكى مەزگىلدىك جۇمىس اۋىسىمى بەكىتىلگەن.
«نان نارىعى – باسەكەنىڭ ورتاسى. الماتىدا بىزدەن وزگە, حالىقتىڭ ىقىلاسى ءۇشىن قيامەتتىڭ قىل كوپىرىنەن وتۋگە دايىن تۇرعان 40 شاقتى جەكەمەنشىك ناۋبايحانا جۇمىس ىستەيدى. قالعىپ كەتسەڭ نارىقتاعى ۇلەسىڭنەن ايىرىلىپ قالۋ وپ-وڭاي. قالا ورتالىعىنداعى دۇكەندەردىڭ تاڭعى ساعات 8-دە پەشتەن جاڭا شىققان ناندى قابىلداپ الۋى – قالىپتى جاعداي. ءبىز ءۇشىن حالىقتىڭ تالابى, سۇرانىسى, تالعامى بيزنەسىمىزدىڭ ءومىرىن ۇزارتۋعا بەرىلگەن مۇمكىندىك», دەيدى مامان.
الماتى
