ايقاستىڭ تاعدىرى ابەرديندە شەشىلەدى

بۇرناعى كۇنى ەۋروپا ليگاسى ىرىكتەۋ ءتۋرنيرىنىڭ ءۇشىنشى راۋندىندا «قايرات» شوتلانديانىڭ «ابەردين» كومانداسىن جەڭدى. الماتىدا بولعان ويىن 2:1 ەسەبىمەن الاڭ يەلەرىنىڭ پايداسىنا شەشىلدى. كەزدەسۋدى قايراتتىقتار وتە بەلسەندى باس­تادى. بىردەن العا ۇمتىلعان ولار 13-مينۋتتا ەسەپ اشىپ ۇلگەردى. مەرگەندىگىمەن العاش كوزگە تۇسكەن ميحايل باكاەۆ. ارادا 9 مينۋت ۋاقىت وتكەندە كوماندا كاپيتانى باۋىرجان يسلامحان ەسەپتى 2:0-گە جەتكىزدى. ونىڭ 40 مەتر جەردەن جاساعان جويقىن سوققىسىنا «ابەردين» قاقپاشىسى دەنني ۋورد توسقاۋىل بولا المادى. جالپى, ويىن بارىسىنداعى باۋىرجاننىڭ بەلسەندىلىگىن ەرەكشە ايتىپ وتكەن ءجون. ەكىنشى تايمدا قوناقتاردىڭ باسىم بولعانىن مويىنداۋىمىز كەرەك. ءتىپتى ۇزىلىستەن كەيىن الاڭعا مۇلدەم باسقا كوماندا شىققانداي اسەر قالدىردى. سوعان بايلانىستى ۆلاديمير ۆايسستىڭ شاكىرتتەرى قورعانىستا كوپ كۇش جۇمساۋعا ءماجبۇر بولدى. ماتچتىڭ 69-مينۋتىندا شوتلاندتار اقىرى دەگەندەرىنە جەتىپ, ەسەپ ايىرماسىن قىسقارتتى. گولدىڭ اۆتورى – كەنني ماكلين. ءوز قاقپالارىنا دوپ كىرگىزىپ العاننان كەيىن عانا الاڭ يەلەرى جيناقىلىق تانىتىپ, بىرنەشە جۇيەلى شابۋىل ۇيىمداستىرىپ كوردى. الايدا, ويىن سوڭىنا دەيىن تابلوداعى ەسەپ وزگەرگەن جوق. قوس كوماندا اراسىنداعى قارىمتا كەزدەسۋ 6 تامىزدا شوتلانديانىڭ ابەردين قالاسىندا وتەدى. سونىڭ ناتيجەسى بويىنشا ىرىكتەۋ ءتۋرنيرىنىڭ پلەي-وفف باسەكەسىنە شىعاتىن جاساق انىقتالادى. ايتا كەتەيىك, وسى جەڭىسىنەن كەيىن «قايرات» ۋەفا-نىڭ كلۋبتىق رەيتينگىندە 4 ساتىعا جوعارى جىلجىپ, 303-ورىنعا تۇراقتادى. بۇگىندە كوماندانىڭ ەنشىسىندە 3,725 ۇپاي بار. بۇعان دەيىن الماتىلىقتار ءتۋرنيردىڭ ءبىرىنشى جانە ەكىنشى راۋندتارىندا تيىسىنشە سەربيانىڭ «تسرۆەنا زۆەزداسى» مەن ارمەنيانىڭ «الاشكەرت» كوماندالارىن جولدان شىعارىپ تاستاعان ەدى. ەلامان قوڭىر, «ەگەمەن قازاقستان».