فوتو: اشىق دەرەككوز
ول سۋ كودەكسىنىڭ باپتارىنا جانە ۇكىمەتتىڭ 2004 جىلعى قاۋلىسىنا سايكەس, ەرەكشە مەملەكەتتىك ماڭىزى بار سۋ وبەكتىلەرى تىزىمىنە كاسپي تەڭىزى, بالقاش, زايسان, الاكول كولدەرى مەن ەرتىس وزەنى ەنگىزىلگەنىن, الايدا بۇعان جايىق وزەنى كىرمەگەندىگىن ايتىپ ءوتتى.
«2023 جىلعى مامىر ايىندا جولداعان دەپۋتاتتىق ساۋالىما جاۋاپ رەتىندە پرەمەر-مينيستر گيدروگەولوگيالىق زەرتتەۋلەر ناتيجەسى بويىنشا بۇل ماسەلە قايتا قارالاتىنىن مالىمدەگەن بولاتىن. قازىر زەرتتەۋلەر اياقتالدى, 51 ميلليون تەڭگەدەن استام مەملەكەتتىك قاراجات جۇمسالدى. الايدا ماسەلە ءالى دە شەشىمىن تاپقان جوق. سونىمەن قاتار, 2021-2024 جىلدارعا ارنالعان قازاقستان-رەسەي جايىق ەكوجۇيەسىن قالپىنا كەلتىرۋ باعدارلاماسىنىڭ مەرزىمى اياقتالعانىمەن, جاڭا باعدارلاما ءالى بەكىتىلمەدى. بۇل جاعداي وڭىردەگى سۋ قاۋىپسىزدىگى داعدارىسىنىڭ ۋشىعۋىمەن قاتار كەلىپ وتىر», دەدى شەنەۋنىك.
بۇل ماسەلەگە جۇرتشىلىق الاڭداپ وتىر. ويتكەنى دەپۋتاتتىڭ ايتۋىنشا, ونەركاسىپتە سۋدى قايتالاما اينالىمعا ەنگىزۋ جۇيەسىنىڭ بولماۋى, سۋ قويمالارىنىڭ كەلىسىلمەي سالىنۋى, لاستانۋ دەڭگەيىنىڭ ارتۋى جانە ەكوجۇيەنىڭ بۇزىلۋى تۇيتكىلدى ءتۇيىن بولىپ تۇر.
وسىعان بايلانستى د. تۇرعانوۆ تومەندەگى ۇسىنىستاردى جەتكىزدى:
- جايىق وزەنىن ەرەكشە مەملەكەتتىك ماڭىزى بار سۋ وبەكتىلەرى تىزبەسىنە ەنگىزۋ تۋرالى ماسەلەنى شۇعىل تۇردە قايتا قاراپ, ءتيىستى شەشىم قابىلداۋ.
- جايىق ەكوجۇيەسىن قالپىنا كەلتىرۋ جونىندەگى جاڭا كەشەندى قازاقستان-رەسەي باعدارلاماسىن ازىرلەپ, بەكىتۋ.
- جايىق وزەنى بويىنداعى ءىرى ونەركاسىپتىك كاسىپورىنداردىڭ سۋ پايدالانۋىنا مەملەكەتتىك باقىلاۋدى كۇشەيتۋ.
- جايىق وزەنى الابىندا كەلىسىلمەگەن جاساندى سۋ قويماسىن سالۋعا قاتاڭ تىيىم سالۋ.
