مەملەكەت باسشىسىنىڭ «كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەگەن ءسوزى زيالى قاۋىمنىڭ كوڭىلىنەن شىقتى. بۇل ءۇردىستى قاراپايىم حالىق تا قولداپ وتىر. ويتكەنى تەحنولوگيالىق وركەنيەتتىڭ جالت-جۇلت جارناماسى ءسال باسىلىپ, ءار وتباسى ۇرپاق تاربيەسى دەگەن ۇلكەن ماسەلەگە الاڭداي باستاعان.
ء«بىز كەيىنگى 30 جىلدا كىتاپ وقۋدان ايىرىلىپ قالىپ ەدىك. قوعامداعى كوپتەگەن جاعىمسىز قۇبىلىستىڭ سەبەبىن مەن سودان كورەمىن. ادامعا الدىمەن كەرەگى – ءبىلىم, ساۋات, پاراسات, ۇلى تاربيە. مۇنىڭ بارلىعى – كىتاپتا. سوندىقتان بۇل مەرەكە, كىتاپ مەيرامى – وتە كەرەك مەرەكە», دەيدى اقىن, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆا.
ء«بىزدىڭ باتىس قازاقستان وبلىسىندا بۇگىن 356 كىتاپحانا زامان تالابىنا ساي قىزمەت كورسەتەدى. 25 كىتاپحانا جاڭارتۋدان ءوتىپ جاتىر. ياعني وڭىردە وقيتىن قوعام قالىپتاستىرۋ ءۇشىن بارلىق جاعداي جاسالعان. كىتاپ – رۋحاني قازىنا, ءبىلىم مەن تاربيە قۇرالى. اقپاراتتىق تەحنولوگيا قانشا دامىسا دا, كىتاپ وقۋ ارقاشان ترەندتە بولۋى كەرەك. كىتاپقۇمار جاندار قاتارى كوبەيە بەرسىن!» دەدى اباي ەسكەرتكىشى جانىندا جينالعان حالىق الدىندا ءسوز سويلەگەن باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ.
دينا نۇرپەيىسوۆا كوشەسىنىڭ بويىندا, ەل-جۇرت «اربات» دەپ اتاپ كەتكەن جاياۋ كوشەدە وتكەن ءىس-شاراعا حالىق كوپ جينالدى. وڭىردەگى قالامگەرلەر, عالىمدار, ولكەتانۋشىلار دا وسى جەردە باس قوستى. وبلىس ورتالىعىنداعى ەڭ ۇلكەن جۇبان مولداعاليەۆ اتىنداعى وبلىستىق ورتالىق امبەباپ عىلىمي كىتاپحانا, حامزا ەسەنجانوۆ اتىنداعى وبلىستىق بالالار مەن جاسوسپىرىمدەر كىتاپحاناسى, زاعيپ جاندارعا ارنالعان وبلىستىق ارناۋلى كىتاپحانا, ورال قالالىق كىتاپحاناسى بارلىق فيليالىمەن بىرگە جۇمىلىپ, كىتاپ مەرەكەسىنىڭ كورىگىن قىزدىرىپ جىبەردى. كورمەگە ماحامبەت پەن جاڭگىر حان اتىنداعى جانە ينجەنەرلىك تەحنيكالىق ۋنيۆەرسيتەتتەردىڭ عىلىمي كىتاپحانالارى ءوز وقىتۋشى-عالىمدارىنىڭ جازعان ءتۇرلى عىلىمي ەڭبەكتەرىن دە اكەلگەن. كوشە بويىنان «اتامۇرا» كورپوراتسياسىنىڭ «جاڭگىرحان» كىتاپ دۇكەنىن, «Kitapal» دۇكەنىن, «وتباسى حرەستوماتياسى» كىتاپتارىن ۇسىنعان «Zerek» وقۋ ورتالىعىنىڭ ساۋدا سورەلەرىن دە بايقادىق. ەڭ عاجابى, قازاقى ناقىشتاعى سىرت كيىمدەرىمەن ايگىلى «ايكەربەز» ۇلتتىق كيىم جانە قولونەر ورتالىعىنىڭ شاپان-جەلەڭدەرىن كيگەن سۇلۋ قىزدار دا قولىنا كىتاپ ۇستاپ, «ادامدى ادام ەتكەن – كىتاپ, ادامزات ەتكەن – كىتاپحانا» ء(ابىش كەكىلباەۆ) عاجاپ قازىنانى ناسيحاتتاپ ءجۇردى.
جاڭا مەيرامنىڭ بەل ورتاسىندا كىتاپحاناشىلار جۇرگەنىن ايتتىق قوي. شىنىندا دا كىتاپحاناشىلار قاۋىمى كەيىنگى كەزدە كىتاپقۇمار بالالار, وقىرمان وتباسىلار كوبەيگەنىن بايقاپتى.
«كىتاپ قالاشىعى» اللەياسىندا جاڭا ادەبيەتتەر مەن جەرگىلىكتى باسىلىمداردىڭ كورمەسى, شەبەرلىك سىنىپتارى, كىتاپ دۇكەندەرىنىڭ جارمەڭكەسى, ۇلتتىق ويىندار الاڭى, bookcrossing, كىتاپ دەفيلەسى, ادەبي-مۋزىكالىق quiz, ادەبي نون-ستوپ, جاستار مەن بالالارعا ارنالعان الاڭدار ۇيىمداستىرىلدى. حاديشا بوكەەۆا اتىنداعى قازاق دراما تەاترىنىڭ ارتىستەرى سومداعان اباي, جۇبان, قادىر بەينەلەرى كەلۋشىلەر نازارىن اۋداردى.
مەرەكە اياسىندا كىتاپحانانىڭ ەڭ ۇزدىك وقىرماندارى, ەڭ بەلسەندى وتباسىلار جانە كىتاپحانا سەرىكتەستەرى ماراپاتتالدى.
باتىس قازاقستان وبلىسى
