اتاسى ولگەندەردىڭ تىزىمىندە جوق ەكەن

«ەگەمەننىڭ» ورال قالاسىنداعى ءتىلشى قوسىنىنا جاس جىگىت كەلدى. امان-ساۋلىق بىلىسكەننەن كەيىن مىنا ءبىر كۇن سايىنعى قىم-قۋىت جاڭالىقتارى بار ومىردە بارىنەن اسىپ تۇسەتىن «تىڭ جاڭالىق» ايتتى. نە جاڭالىق؟ – دەپ سۇراڭىز. اكەسىنىڭ اكەسى, ياعني اتاسى ولگەندەردىڭ تىزىمىندە جوق كورىنەدى. 1984 جىلى بۇرىنعى 24 پارتسەزد سوۆحوزى, قازىرگى بىرىك اۋىلدىق وكرۋگىندە رەداكتسياعا كەلگەن جاس جىگىتتىڭ اتاسى دۇنيە سالىپتى. ارۋلاپ, جەرلەگەن. تۋما-تۋىستارى, ۇرپاقتارى زيرات باسىنا بارىپ, دۇعا ەتەدى. ەندى 30 جىل وتكەن و دۇنيەلىك بولعان قارت كىمگە كەرەك بولىپ قالدى؟.. نەمەرەسى اسكەري بورىشىن وتەپ كەلگەن سوڭ شەكارا قىزمەتىنە قالماقشى ەكەن. شەكاراشى بولۋ ءۇشىن ونىڭ ارعى تەگىن تەكسەرەتىن كورىنەدى. بىلايشا ايتقاندا, بۇلاردىڭ تەگىندە «شپيون», «تىڭشى», ت.ب. سياقتى «كۇدىكتىلەر» بولماۋ كەرەك... نەمەرەسىنىڭ (جىگىتتىڭ) ايتۋىنشا, ارعى تەكتەرىندە «شپيون» جوق ەكەن. بىراق ءتارتىپ سولاي, قۇجاتتىڭ ءبارى زاڭدىلىققا سايكەس رەسىمدەلۋ كەرەك. ءتيىستى ورگانداردان اتاسىنىڭ قايتىس بولعاندىعى تۋرالى انىقتاما الايىن دەسە, 1984 جىلى مىڭداعان ادام تۇرعان قازىرگى بىرىك اۋىلدىق وكرۋگىندە تەك 2 ادام عانا قايتىس بولعان دەگەن انىقتاما جازىلعان. بۇل قانداي اقىلعا سىيادى؟ ەشكىم دە ماڭگىلىك ەمەس. ءومىر بار جەردە, ءولىم بار ەمەس پە؟! اتاسىنىڭ ومىردەن وتكەنى تۋرالى ەشقانداي قۇجاتتىڭ جوقتىعىنا كىم كىنالى؟ قىزىقتى قاراڭىز. الگىندە ايتقا­نىمىزداي, راسىندا دا ءۇش ءىرى ەلدى مەكەنى بار اۋىلدا ءبىر جىلدا ەكى ادام عانا دۇنيەدەن وتەدى دەگەنگە سەنۋ قيىن-اق. ەندى شەكارا قىزمەتىنە بارعىسى كەلەتىن جىگىت اتاسىنىڭ قايتىس بولعانى تۋرالى قۇجات بولماعاندىقتان, داعدارىپ وتىر. اپىرىم-اي, سوندا دۇنيەدەن وتكەن اتاسىنىڭ قۇجاتى جوقتىعىنان ءوز ەلىنىڭ شەكاراسىن قورعاۋعا نيەت ءبىلدىرىپ وتىرعان جىگىتتىڭ ماقساتى تابانعا تاپتالاتىن بولعانى ما؟ الدە سوناۋ وتكەن عاسىردىڭ 80-ءشى جىلدارىندا بىرىك اۋىلدىق وكرۋگىندە «كاششەي بەسسمەرتنىيلار» ءومىر ءسۇردى مە؟! ەگەر ولاي بولسا, ولار وسى كۇنگە دەيىن ارامىزدا زەينەتاقىلارىن الىپ جۇرمەي مە؟.. تەمىر قۇسايىن, «ەگەمەن قازاقستان». باتىس قازاقستان وبلىسى, قازتالوۆ اۋدانى, ءاجىباي اۋىلى.