ءۇشىنشى جىل قاتارىنان وتكىزىلگەن كىتاپ فەستيۆالىنە وڭىرگە ىسساپارمەن كەلگەن پرەزيدەنت كەڭەسشىسى مالىك وتارباەۆ ارنايى ات باسىن بۇردى. سونداي-اق «دارىن» مەملەكەتتىك جاستار سىيلىعىنىڭ لاۋرەاتى ەرلان ءجۇنىس, جازۋشىلار ىرىسبەك دابەي مەن ماقسات مالىك باستاعان وزگە دە قالامگەرلەر ءىس-شارانىڭ جوعارى دەڭگەيدە وتۋىنە اتسالىستى.
ءىس-شارانىڭ اشىلۋ سالتاناتىندا پرەزيدەنت كەڭەسشىسى مالىك وتارباەۆ, وبلىس اكىمىنىڭ ورىنباسارى سەرىك سالەموۆ ءسوز سويلەپ, جانازىققا اينالعان كىتاپتىڭ نەگىزگى رۋحاني بايلىق كوزى ەكەنىن اتاپ ءوتتى. سونداي-اق ۇلتتىق كىتاپحانا وكىلى نۇربالا تەكەسباەۆا دا ىزگى تىلەگىن ءبىلدىردى.
ء«ۇشىنشى رەت وتكىزىلگەن فەستيۆالدىڭ ماقساتى ايقىن. ءبىز قازاق جانە شەتەل ادەبيەتىن ناسيحاتتاۋعا باسىمدىق بەرىپ وتىرمىز. مۇنداي اۋقىمدى ءىس-شارالار جاستاردىڭ كىتاپ وقۋىنا تۇرتكى بولاتىنىنا سەنىمىمىز كامىل. فەستيۆالعا «القا», «ارمان پۆ», «استانا كىتاپ», «قاسىم», «وتباسى حرەستوماتياسى», «تايماس», «اتامۇرا» سەكىلدى ءىرى باسپالار جانە «زيات», «كىتاپ ال», «بۋكينيست», «شەرحان مۇرتازا» كىتاپ دۇكەندەرى قاتىسىپ, جارمەڭكە ۇيىمداستىرىپ وتىر. سول ۇشىندە ولارعا ايتار العىسىم شەكسىز», دەيدى شوقان ءۋاليحانوۆ اتىنداعى وبلىستىق امبەباپ عىلىمي كىتاپحاناسىنىڭ ديرەكتورى ەلميرا ابدينوۆا.
تاعىلىمى مول ءىس-شارادا بىرنەشە جاڭا كىتاپتىڭ تانىستىرىلىمى ۇيىمداستىرىلىپ, ءتۇرلى تاقىرىپتا ترەنينگتەر مەن تانىمدىق اكتسيالار وتكىزىلدى. فەستيۆال اياسىندا بيىل 80 جاسقا تولعان بەلگىلى اقىن, قازاقستاننىڭ ەڭبەك سىڭىرگەن قايراتكەرى قايىربەك اسانوۆتىڭ «ماحاببات», شاپاعات», «پاراسات» اتتى ءۇش تومدىق جيناعىنىڭ تۇساۋى كەسىلدى. وزگە دە بىرنەشە قالامگەردىڭ جاڭا جيناقتارى وقىرمانعا تانىستىرىلدى.
تاراز
