وتكەن جىلى باتىس قازاقستان ءوڭىرى الاپات سۋ تاسقىنىن باستان كەشىردى. سونىڭ ىشىندە ورال قالاسىنىڭ ماڭىندا تۇراتىن ساياجاي يەلەرى قاتتى زارداپ شەكتى. قايراتتىڭ ءوزىنىڭ دە تالىمباعى ەكى ايداي سۋ استىندا تۇردى. شاعان وزەنى جاعاسىندا ورنالاسقان اۋماعى 7,6 گەكتار بولاتىن بۇل باقتا المانىڭ قاتاڭ كونتينەنتالدى كليماتقا ارنالعان 200-دەن اسا سورتى, 80 ءتۇرلى الما تەلتۇبىرى (پودۆوي), ءجۇزىمنىڭ 200-دەن اسا ەرەكشە ءتۇرى, سونداي-اق دەكوراتيۆتى, ەمدىك قاسيەتى بار تەرەكتەر مەن بۇتالار, قىلقانجاپىراقتى اعاشتىڭ بىرنەشە ءتۇرى وسەتىن. ءدال مۇنداي گەنوفوند, ەرەكشە تالىمباق ەش جەردە جوق ەدى. وكىنىشكە قاراي, كوپجىلعى ەڭبەكتىڭ كوبى ەش كەتتى, كوپ تەرەك سۋ استىندا تۇنشىعىپ قالدى. قازىر قايرات جارى روزامەن بىرگە ەرەكشە تالىمباقتى قالپىنا كەلتىرۋگە كۇش سالىپ جاتىر.
– بىلتىرعى تابيعات اپاتىنان ءبىز عانا ەمەس, كوپتەگەن ساياجاي يەلەرى كوپجىلعى جەمىس اعاشىنان ايىرىلدى. ولاردىڭ مۇڭ-مۇقتاجىن بىزدەن ارتىق بىلەتىن كىم بار؟ سوندىقتان المانىڭ ءار تۇرىنەن, ءبىزدىڭ جەرىمىزگە, قاتاڭ تابيعاتىمىزعا ۇيرەنگەن سورتتارىنان 1 500-دەن اسا ءتۇپ كوشەتتى تەگىن تاراتۋعا شەشىم قابىلدادىق, – دەيدى قايرات بورانباي ۇلى.
قايراتتىڭ بۇل باستاماسىنا ورالدىقتار قاتتى ريزا بولدى. ايگىلى باعباننىڭ قولىنان الما كوشەتىن الۋعا الىس-جاقىننان ارنايى كەلگەندەر از بولمادى. باق يەسى كەلۋشىلەرگە جەمىس اعاشتارىن ءوسىرۋ, كۇتىپ-باپتاۋ تۋرالى اقىل-كەڭەسىن ايامادى. وسىلايشا, باعباننىڭ قاراپايىم اكتسياسى قايىرىمدىلىققا تۇنعان كەرەمەت ءىس-شاراعا اينالدى.
باتىس قازاقستان وبلىسى
